Рүүт 3 - Библи

Рүүт тушаа Бооһазай һанаагаа табилгань

¹ Хадам эхэ Наомиинь тэрээндэ: – Басагамни, шам тухай һанаагаа зобохо, гэр байраар хангаха үбгэ шамда бэдэрхэ һанаатайб.

² Зай, шэбэгшэнэртэйнь хамта шинии байгааша Бооһаз түрэлэймнай хүн гээшэ. Хараарай даа, тэрэ энэ үдэшэ гүмнээ дээрэ ешмээн хиидхүүлхэ.

³ Ши бэеэ угаагаад, һайхан үнэртэй тоһо түрхеэд, эгээл һайхан хубсаһаа үмдөөд, гүмнээ руу ошо. Гэбэшье тэрэ хүнэй эдижэ, уужа дууһатар тэрээндэ бү харагдаарай.

⁴ Хаана унтахаяа хэбтэхыень ши ажаглаарай. Тиигээд ошожо, хүнжэлыень һэхээд, хүлэйнь хажуугаар хэбтээрэй. Юу хэхыешни тэрэ шамда хэлэхэ даа, – гэжэ хэлэбэ.

⁵ Рүүт тэрээндэ: – Танай хэлээшые сүм дүүргэхэб, – гэбэ.

⁶ Тиигээд тэрэ гүмнээ руу ошожо, хадам эжынгээ хэлээшээр бүгэдые сүм бэелүүлбэ.

⁷ Бооһаз эдижэ уужа, сэдьхэл тэниглэн болоод, обоолоотой таряанай хажууда унтахаяа хэбтэбэ. Рүүт һэмээхэн ерэжэ, хүнжэлыень нээгээд, хажуудань хэбтэшэбэ.

⁸ Һүниин тэн багаар Бооһаз гэнтэ һэришэбэ. Эрьелдэхэдэнь, хажуудань нэгэ эхэнэр хэбтэжэ байба ха.

⁹ – Ши хэмши? – гэжэ тэрэ асууба. – Би Рүүт зарасатнай байнаб. Та намайе дали дороо абыт даа, туһа хүргэхэ ёһотой манай түрэл хүн та гээшэт, – гэбэ тэрэнь.

¹⁰ Тиихэдэнь Бооһаз: – Басагамни, шамайе Бурхан буян хэшэгтэ хүртөөг! Гэр бүлэдөө үнэн сэхэ байһанаа урдынхиһаа үлүү һайнаар мүнөө харуулбаш, үгытэй, баяншье залуу хүнэй хойноһоо ябабагүйш.

¹¹ Зай, басагамни, һанаагаа бү зобоорой. Хэлэһэн юумыешни бултыень би дүүргэхэб. Хотымнай бүхы зон шамайе һайн эхэнэр гэжэ мэдэнэ.

¹² Намайе танай түрэл гэдэгынь үнэн, гэбэшье намһаа дүтэ түрэл бии юм.

¹³ Энэ һүниндөө эндээ хоноорой. Үглөө үглөөгүүр тэрэ хүн шамайе аршалалта дороо абаха һаа, абаг. Абаагүй һаань, би абахаб гэжэ Эзэнэй урда тангаригланаб! Үглөө болотор унта даа, – гэбэ.

¹⁴ Рүүт үглөө болотор тэндээ хэбтэжэ, гэгээрхын урда тээ бодобо, юуб гэхэдэ, «эхэнэр гүмнээ руу ерээ һэн гэжэ хэншье бү мэдэг» гэжэ Бооһаз хэлээ бшуу.

¹⁵ – Нэмэргээ үгэ даа. Баряад бай, – гэжэ Бооһаз хэлэбэ. Рүүт нэмэргээ баряад байба. Тиихэдэнь тэрэ зургаан хэмжүүр ешмээн хэмжэжэ, үргэлүүлбэ. Тиигээд Бооһаз хото руу ябаа һэн.

¹⁶ Рүүт хадам эжыдээ ерэбэ. Тэрэнь: – Басагамни, юу бэ? – гэбэ. Бооһазай юу хэһыень бултыень тэрэ хадам эжыдээ хөөрэбэ.

¹⁷ Тэрэ: – Энэ зургаан хэмжүүр ешмээниие тэрэ намда үгөө. «Хадам эжыдээ гар хооһон бү буса даа» гэжэ тэрэ намда хэлээ, – гэбэ.

¹⁸ Хадам эжынь: – Басагамни, хүлеэгөөрэй, энэ хэрэгэй яажа дүүрэхые дары сагтаа мэдэхэш. Юуб гэбэл, Бооһаз мүнөөдэр тэрэниие шиидхээгүй дээрээ амараа үзэхэгүй даа, – гэжэ хэлэбэ.