Рүүт 1 - Библи

Наомии болон Рүүт

¹ Израилиие хаашуулай захиран зонхилхо үе сагһаа урид тэрэ орондо үлэсхэлэн хооһон байдал тохёолдоо бэлэй. Иудадахи Бэтлэһээм хотын нэгэ хүн һамгантаяа, хоёр хүбүүдтэеэ хамта Моһаабай нютаг руу ажаһуухаар ябаба.

² Тэрэ хүнэй нэрэнь Элимээлэх, һамганайнь нэрэ Наомии, хоёр хүбүүдынь Махлоон ба Хилиһоон һэн. Тэдэ Иудадахи Бэтлэһээмэй, Эпраатын зон бэлэй. Моһаабай орон нютаг руу ерээд байхадаа,

³ Элимээлэх наһа баража, Наомии һамганиинь гансаараа хоёр хүбүүдтэеэ үлэбэ.

⁴ Хүбүүдынь моһаабай басагадые һамга абаа. Нэгэнь Орпаа, нүгөөдэнь Рүүт гэжэ нэрэтэй һэн. Арбаад жэл тэндэ амидарһанай удаа

⁵ Махлоон ба Хилиһоон мүн лэ наһа бараба. Иигэжэ тэрэ эхэнэр хоёр хүүгэдээ болон үбгэеэ үнгэрүүлээ бэлэй.

⁶ Эзэн Өөрын арад түмэн тушаа анхаралаа табижа, һайн ургаса үршөөнэ гэжэ Наомии Моһаабта байхадаа дуулаба. Тиигээд тэрэ хоёр бэритэеэ хамта тэндэһээ гаража ябахаар зэһэбэ.

⁷ Байһан газараа орхижо, тэрэ хоёр бэритэеэ хамта Иудын газар нютаг руу бусаха замда гараба.

⁸ Наомии хоёр бэридээ иигэжэ хэлэбэ: – Эжы эжынгээ гэр руу бусагты даа. Наһа барагшадта болон намда энэрхы һайнаар хандадаг байгаат, Эзэн тон тиимээр таанарта харюулхань болтогой!

⁹ Ондоо үбгэнтэй боложо, өөрын гэртэй, амгалан тайбан байхыетнай Эзэн үршөөхэнь болтогой! Тиигээд тэрэ бэринүүдээ таалаба. Теэд тэдэнь шангаар бархиралдан:

¹⁰ – Арад түмэн руутнай тантай хамта ошохомнай, – гэбэ.

¹¹ Наомии хэлэбэ: – Басагадни, бусагты. Юундэ таанар намтай хамта ябахабта даа. Таанадта үбгэд болохо хүбүүдые би үшөө түрэжэ шадахагүй бшууб.

¹² Бусагты, басагадни, ябагты! Хадамда гаража шадахагүйб, би хүгшэрөөб. Хэрбээ «Найдал намда үшөөл бии» гэжэ хэлээд, энэ һүниндөө үбгэнтэй унтажа, хүбүүдые түрөөшье һаам,

¹³ тэдэнэй томо болотор таанар яажа хүлеэхэбта?! Хадамда гарахаһаа татагалзажа байха юм гүт? Үгы даа, басагадни. Энэнь таанадта орходоо үлүү намда хүндэ байна. Эзэн намайе хэһээгээ.

¹⁴ Тэдэ дахин шангаар уйлалдаба. Орпаа хадам эжыгээ таалан хахасаба, харин Рүүт хадам эжыдээ няалдаад, ошобогүй.

¹⁵ Наомии тэрээндэ: – Хара даа, нүгөө бэримнай арад түмэндээ, бурхадтаа бусаба. Хойноһоонь шишье буса даа, – гэбэ.

¹⁶ Теэд Рүүт: – Таниие орхижо ошохыемни, бусахыемни бү баалыт даа. Юуб гэхэдэ, танай ябаха газар руу би ябахаб, танай хонохо газарта бишье хонохоб. Танай арад түмэн минии арад түмэн, танай Бурхан минии Бурхан болохо!

¹⁷ Танай нүгшэхэ газарта бишье нүгшэхэб, тэндээ хүдөөлүүлэгдэхэб. Хэрбээ үхэлһөө бэшэ ондоо аргаар минии танһаа һалабал, Эзэн намайе шанга хэһээхэнь болтогой! – гэжэ хэлэбэ.

¹⁸ Өөртэйнь хамта ябахаар эрид шиидэһыень Наомии хараад, бэшэ юумэ хэлэхэеэ болибо.

¹⁹ Тиигээд тэдэ хоюулаа ябажа, Бэтлэһээмдэ хүрэжэ ерэбэ. Тэдэнэй ерэхэдэ, хотын бүхы зон хүлгэжэ, эхэнэрнүүд: – Энэ Наомии мүн гү? – гэлдэбэ.

²⁰ Наомии тэдээндэ иигэжэ хэлэбэ: – Намайе Наомии гэжэ бү нэрлэгты. Түгэс Хүсэтэ Бурхан минии ажабайдалые угаа ехэ гашуудалтай болгоһон тула намайе Мараа гэжэ нэрлэгты.

²¹ Би эндэһээ гарахадаа, бүхы юумээр дүүрэн гараһан болобошье, Эзэн намайе хооһон бусааба. Нам тушаа Эзэнэй хатуу харюу айладхаһанай, Түгэс Хүсэтэ Бурханай намда гай зоболон эльгээһэнэй удаа таанад намайе яагаад Наомии гэжэ нэрлэхэбта?!

²² Иигэжэ Наомии моһааб Рүүт бэритэеэ хамта орон нютаг Моһаабһаа бусаа бэлэй. Тэдэ ешмээн хадаха сагай эхиндэ Бэтлэһээм руу ерээ һэн.