Римэйхиндэ 7 - Библи

Гэрлэлгэһээ жэшээ дурдая

¹ Аха дүүнэрни, таанад Хуули ойлгонот, тиимэһээ Хуули гансал амиды хүнүүдые захиржа шадаха гэжэ мэдэнэт.

² Жэшээлбэл, хуулиин ёһоор хадамтай эхэнэр нүхэрэйнгөө амиды байха үедэл нүхэртэйгөө холбоотой; хэрбээ нүхэрынгөө наһа барабалнь, тэрэ эхэнэр гэрлэлгын Хуулиһаа сүлөөлэгдэнэ.

³ Тиимэһээ нүхэрэйнгөө амиды байха сагта ондоо хүнтэй ханилбалнь, тэрэ эхэнэр эрэдээ урбагша гэжэ нэрлэгдэхэ, харин нүхэрэйнь нүгшэһэн байбал, тэрэ эхэнэр хуулиин ёһоор сүлөөтэй болоод, ондоо хүнтэй һугаашье һаа, эрэдээ урбагша гэжэ тоологдохогүй.

⁴ Аха дүүнэрни, таанадай нүхэсэл тон тиимэ. Таанад мүнөө Христоосой бэеын эрхэтэн болоод, Хуулитай холбоогоо таһалбат. Мүнөө таанад Бурханда алба хэжэ аша туһатай байхын тула үхөөд амидырһан Христоосой хүнүүд болобот.

⁵ Энэ дэлхэйн жама ёһоор ажамидархадамнай Хуули бэеымнай нүгэлтэ хүсэлэнгүүдые һэргээдэг байгаа, бидэ булта үхэхэ хойшолонтой байгаабди.

⁶ Харин мүнөө бидэ урдань маанадые хүлеэд байһан Хуулиин талаар үхөөд, эрхэ мэдэлһээнь мултараабди. Саашадаа бидэ бэшэгдэһэн Хуули сахижа, хуушан аргаар алба хэхэгүйбди, харин шэнэ аргаар Һүлдын мэдэлдэ байгаад, Бурханда алба хэхэбди.

Хуули ба нүгэл

⁷ Зай, тиигээд Хуули өөрөө нүгэлтэй гэжэ хэлэхэмнай гү? Үгыл даа! Зүгөөр Хуулиин үгы байбал, би нүгэл гээшэ юун бэ гэжэ мэдэхэгүй һэнби. «Хүнэй юумэндэ бү һанаарха», – гэжэ Хуулиин хэлээгүй һаа, би тиигэжэ һанаархахань нүгэл гэжэ мэдэхэгүй һэм.

⁸ Зүгөөр нүгэл тэрэ захяа заабариин ашаар элдэб янзын харата хүсэлэнгүүдые зосоомни түрүүлээ. Нүгэл Хуулигүйгөөр ямаршье хүсэнгүй.

⁹ Урдань Хуули мэдэхэгүй байхадаа би амиды ябааб, теэд энэ захяа заабариие дуулахадаа, зосоомни нүгэл бүрилдэбэ,

¹⁰ тиигээд би хосорооб. Тиигэжэ амидарал асарха ёһотой байһан захяа заабари намда үхэл асараа.

¹¹ Нүгэл энэ захяа заабариие өөрын зэбсэг мэтэ ашаглан, намайе мэхэлээ, тиигээд алаа.

¹² Тиибэ яабашье Хуули өөрөө нангин, захяа заабаринуудынь баһа нангин, үнэн зүб, дэмбэрэлтэй юм.

¹³ Зай, тиихэдээ үлзы дэмбэрэлтэй юумэн намда үхэл асараа гү? Үгыл даа, нүгэл үхэлые асараа. Үнэн байдалаа элирүүлхын тула нүгэл үлзы дэмбэрэлтэй юумые хэрэглэн, зосоомни үхэл түрүүлээ. Тиимэһээ захяа заабариин ашаар нүгэлэй бүришье аймшагтай, бүришье бузар булай байһаниинь харуулагдаа.

¹⁴ Хуули оюун сэдьхэлтэй холбоотой, харин би бэе махабадтаа хүлюулээд, нүгэлэй богоолынь болон худалдагдаһан байгааб гэжэ би мэдэнэб.

¹⁵ Би юу хэжэ байһанаашье ойлгоногүйб, юундэб гэхэдэ, би хэхэ дуратай юумэеэ хэнэгүйб, харин хэхэ дурагүй байһан юумэеэ үйлэдэжэ байнаб.

¹⁶ Хэхэ дурагүй юумэеэ хэжэ байхадаа, би Хуулиин үнэн зүб байһые баталнаб.

¹⁷ Тиимэһээ үнэндөө болбол би бэшэ, харин зосоомни оршожо байһан нүгэл тиимэ юумэ үйлэдэнэ.

¹⁸ Үлзы дэмбэрэлтэй юумэн зосоомни, бэе соомни оршоногүй гэжэ би мэдэнэб. Үлзы дэмбэрэлтэй юумэ бүтээхэ хүсэлтэй байдагшье һаа, үнэндөө бүтээжэ шададаггүй хүм.

¹⁹ Хэхэ дуратай байһан үлзы дэмбэрэлтэй юумые хэнэгүйб, харин орондонь хэхэ дурагүй байһан харатай муухай юумые үйлэдэнэб.

²⁰ Хэрбээ хэхэ дурагүй байһан юумэеэ хэжэ байгаа юм хадаа би өөрөө тиимэ юумэ хэнэгүйб, харин зосоомни оршожо байһан нүгэл тиимэ юумэ үйлэдэнэ.

²¹ Тиимэһээ үлзы дэмбэрэлтэй юумэ бүтээхэ дуратай байхадамни, харата һаналнууд намда һаалта болодог заншалтай.

²² Зүрхэ сэдьхэлдээ би Бурханай Хуули дэмжэжэ байна ха юмбиб.

²³ Харин бэеымни эрхэтэнүүдые хүдэлгэдэг ёһон ухаан бодолоймни дэмжэдэг хуулита ёһонтой тулалдадаг юм. Бэе соомни хүдэлдэг нүгэлэй ёһон намайе богоолшолоод байна.

²⁴ Ямар азагүй хүн гээшэбиб! Үхэлдэ хүргэжэ байһан энэ бэеһээмни хэн намайе аршалхань гээшэб?

²⁵ Бурханда баяр баясхалан хүргэнэб, Тэрэ манай Эзэн Иисүүс Христоосой ашаар аршалха. Зай, иигээд би бэеэрээ нүгэлэй хуулида, харин ухаан бодолоороо Бурханай Хуулида алба хэдэг хүнби.