Римэйхиндэ 4 - Библи

Абраһаам үльгэр жэшээ мүн

¹ Зай, өөрынгөө үбгэ эсэгэ Абраһаам тухай юун гэжэ хэлэхэбибди?

² Хэрбээ тэрэ хэһэн хэрэгүүдээрээ Бурханай урда үнэн сэдьхэлтэн гэжэ тоологдобол, бахархаха юумэтэй байха. Гэхэтэй сасуу Абраһаам тэрэ хэрэгүүдээрээ Бурханай урда хэзээшье бахархажа шадахагүй.

³ «Абраһаам Бурханда этигэбэ, Бурхан тэрэниие үнэн сэдьхэлтэн гэжэ тоолобо», – гэжэ Нангин Бэшэг соо хэлэгдэнэ.

⁴ Хүдэлмэришэндэ түлэгдэһэн мүнгэн болбол бэлэг бэшэ юм. Тэрэ мүнгые хүн хүлһөөрөө олоно.

⁵ Хүнүүд хэһэн юумээрээ бэшэ, харин һүзэгөөрөө Бурханай урда үнэн сэдьхэлтэн гэжэ тоологдохо.

⁶ Хэһэн хэрэгүүдтэйнь холбонгүй хүниие үнэн сэдьхэлтэн гэжэ Бурханай тоолоходонь, тиимэ хүниие Давид аза жаргалтай гэжэ нэрлэбэ.

⁷ «Гэмынь хүлисэгдэһэн болон нүгэлынь наманшалагдаһан хүнүүд жаргалтай,

⁸ гэмтэй гэжэ Эзэнэй тоолодоггүй тиимэ хүн жаргалтай».

⁹ Үнөөхи Давидай хэлээшэ аза жаргал гансал отолуулһан зондо хабаатай аал? Үгыл даа. Тэрэнь отолуулаагүйшье зондо адлихан хабаатай. «Абраһаам Бурханда этигэбэ, Бурхан тэрэниие үнэн сэдьхэлтэн гэжэ тоолобо», – гэжэ Нангин Бэшэг соо хэлэгдэһые бидэ дурдаа һэмди.

¹⁰ Тэрэнь хэзээ ушарһан байгааб? Абраһаамай отолуулһанһаа урда гү, али отолуулһан хойнонь гү? Отолуулһанайнь хойно бэшэ, харин отолуулхынь урда тээ ушараа.

¹¹ Абраһаам һүзэгэйнгөө түлөө үшөө отолуулхынгаа урда тээ үнэн сэдьхэлтэнэй тоодо ороод, тэрэнээ баталан отолуулаа. Тиигэжэл Абраһаам отолуулаагүй аад, Бурханда һүзэглэһэнэйнгөө ашаар үнэн сэдьхэлтэн гэжэ тоологдоһон бүхы һүзэглэгшэдэй эсэгэнь болоо.

¹² Тэрэнэй отолуулхынгаа урда тээ Бурханда һүзэглэдэгтэйнь адляар һүзэглэдэг отолуулһаншье хүн бүхэнэй эсэгэнь болоо.

Һүзэглэгшэдтэ Бурханай үгэһэн найдуулга

¹³ Бурхан Абраһаамда, тэрэнэй үри һадаһадта газар дэлхэйе залгамжалан абахаш гэһэн найдуулга үгөө. Абраһаамай Хуули сахижа байһандань бэшэ, харин Бурханда һүзэглөөд, үнэн сэдьхэлтэй болоһон хадань тэрэ найдуулга үгтөө.

¹⁴ Хэрбээ тэрэ найдуулгын Хуули сахиһанай түлөө үгтэһэн байбалнь, этигэл һүзэг юуншье бэшэ, найдуулга ямаршье үрэ дүнгүй байха һэн.

¹⁵ Хуули эбдэхэдэ Бурханай уур сухалынь хүрэдэг. Харин Хуулиин үгы байбал, тэрэниие эбдэхын аргагүй юм.

¹⁶ Тиимэһээ найдуулга этигэл һүзэг дээрэ үндэһэлнэ, тиин Абраһаамай бүхы үри һадаһадта, гансашье Хуули сахидаг бэшэ, харин Абраһаамдал адляар һүзэглэһэн хүн бүхэндэ Бурханай агууехэ үршөөл хайраар тэрэ найдуулгань батаар үгтэбэ. Абраһаам бултанаймнай эсэгэ.

¹⁷ Нангин Бэшэг соо: «Би шамайе үнэр олон арад зоной элинсэг эсэгэ болгооб», – гэжэ хэлээтэй байдаг. Үхэһэн юумые амидыруулдаг, байхагүй юумые захиралтаараа бии болгодог Бурханда һүзэглэһэн Абраһаам манай эсэгэ юм.

¹⁸ Найдаха шалтагаанайшье үгы байхада, Абраһаам этигээ, найдаа, тиимэһээ «үнэр олон арад зоной элинсэг эсэгэ» болоо, Нангин Бэшэг соо хэлэгдэһэн ёһоор үри һадаһадынь одо мүшэдтэл адли тоогүй олон байха.

¹⁹ Тэрэ үедэ Абраһаам зуун наһа шахажа байгаа, зүгөөр үхэхын наана болоһон бэе тухайгаа, үри хүүгэдые түрэхэ сагайнь үнгэрһэн Сарра тухайгаа бодоходоо, тэрэнэй этигэл һүзэгынь һулараагүй.

²⁰ Абраһаам Бурханай найдуулгые һэжэглээгүй, Тэрээндэ бата этигэжэ байгаа, тиин һүзэгынь бүришье ехэ болоо. Тэрээгээрээ Абраһаам Бурханиие алдаршуулаа.

²¹ Бурхан найдуулһан юумэеэ дүүргэхэ аргатай гэжэ Абраһаам бата этигэлтэй байгаа.

²² Тиимэһээл Абраһаам һүзэгэйнгөө ашаар «үнэн сэдьхэлтэн гэжэ тоологдобо».

²³ «Үнэн сэдьхэлтэн гэжэ тоологдоо», – гэдэгынь гансал Абраһаамда хабаатай бэшэ.

²⁴ Тэрэнь баһал манай Эзэн Иисүүс Христоосые амидыруулһан Бурханда һүзэглөөд, үнэн сэдьхэлтэнэй тоодо ороһон маанадта хабаатай.

²⁵ Бурхан манай нүгэл шэбэлэй түлөө Иисүүсые үхэлдэ үгөөд, үнэн сэдьхэлтэй байхымнай тула һүүлдэнь Тэрэниие амидыруулаа юм.