Римэйхиндэ 15 - Библи

Ганса бэе тухайгаа бү бодогты, бусадта аша туһатай байгты

¹ Бата һүзэгтэй бидэнэр ганса бэе тухайгаа бодохо ёһогүйбди, харин һүзэгөөр бирагүйхэн зониие дэмжэхэ ёһотойбди.

² Бусад һүзэглэгшэдэй эрхим һайн байхын түлөө, һүзэгынь бата бэхи болгохын тула бидэ булта тэдэндэ аша туһатай юумэ хэхэ ёһотойбди.

³ Юундэб гэбэл, Христоосшье ганса бэеэ бодожо байгаагүй. Харин: «Таниие доромжолһон баһалтанууд Нам дээрэ буугаа», – гэжэ Нангин Бэшэг соо бэшэгдэһэнэй ёһоор болоо.

⁴ Нангин Бэшэг соо хэлээтэй бүхы юумэнүүд маанадта найдал үгэхэ зуураа һургаха, тэсэбэритэй болгохо, урмашуулха зорилготойгоор бэшээтэй.

⁵ Маанадые тэсэбэритэй байлгадаг, урмашуулдаг Бурхан Христоос Иисүүсэй жэшээгээр таанадые нэгэ һанал бодолтой байлгаһай.

⁶ Тиигэбэл таанад бултадаа нэгэ дуугаар Бурханда, манай Эзэн Иисүүс Христоосой Эсэгэдэ алдар соло дуудахат.

Һайн Мэдээсэл еврейнүүдтэ болон бусад арадуудта үгтөө

⁷ Христоосой таанадые хүндэлдэг байһандал адляар таанадшье бэе бэеэ хүндэлжэ, Бурханда магтаал соло дуудажа байгты.

⁸ Бурханай үбгэ эсэгэнэртэ үгэһэн найдуулгын бүтэһые харуулан, Христоос еврейнүүдэй зарасань болон ерээ гэжэ би хэлэнэб.

⁹ Баһа бусад арадуудай үршөөл хайрынь түлөө Бурханда магтаал соло дуудажа байхын тула Христоос ерээ. «Энээнэйтнай түлөө үндэһэтэдэй хоорондо Таниие магтан дуулан байхаб, Танай нэрэ алдарта магтаалнуудые дуулахаб, Эзэн», – гэжэ Нангин Бэшэг соо бэшээтэй байдаг.

¹⁰ «Бусад яһатад, Бурханай арадтай хамта баярлагты», – гэжэ баһа бэшээтэй байдаг.

¹¹ «Бүхы үндэһэтэд, Эзэниие магтагты! Бүхы арадууд, Тэрэниие үргэмжэлэгты!» – гэжэ баһа бэшээтэй байдаг.

¹² «Ишайн үри һадаһан бии болохо, Тэрэ бусад арадые захирхаяа ерэхэ, харин тэдэнэрынь Тэрээндэ найдажа байха», – гэжэ баһа Исай хэлэнэ.

¹³ Найдал үршөөдэг Бурхан һүзэгэйтнай ашаар таанадые бүтэн баяр жаргалаар ба амгалан байдалаар дүүргэг лэ, тиигэжэ Арюун Һүлдын хүсөөр этигэл найдалтнай нэмэгдэжэ байг лэ.

Павелай сэхыень бэшэһэнэй шалтагаан

¹⁴ Аха дүүнэрни, таанад эрхим һайнта, элдэб янзын эрдэм мэдэрэлтэйт, бэе бэеэ һургаха аргатайт гэжэ би хатуу этигэлтэйб.

¹⁵ Энэ бэшэг соогоо зарим юумэнүүдые һануулхадаа, би сэхыень хэлээб. Бурханай үршөөл хайраар би

¹⁶ бусад арадуудай аша туһада Христоос Иисүүсэй зараса болооб. Бусад арадые Арюун Һүлдын ашаар Бурханда зохистой арюун нангин үргэл болгохын тула би Бурханай Һайн Мэдээсэлые номнон, санаартанай ажал ябуулнаб.

¹⁷ Иисүүс Христоосой ашаар Бурханда алба хэжэ байһанаараа би бахархаха аргатайб.

^18-19 Бусад арадуудые Бурханай мэдэлдэ оруулхын тула Христоос гайхамшагта тэмдэгүүдээр ба үйлэ хэрэгүүдээр, Бурханай Һүлдын хүсэ шадалаар намаар юу хэлүүлээ, хүүлээ һэм, тэрээн лэ тухай би хөөрэхэеэ зүрхэлхэб. Аяншалжа ябахадаа, би Иерусалимһаа Иллирик хүрэтэр хаа хаанагүй Христоос тухай Һайн Мэдээсэл тунхаглажа байгааб.

²⁰ Тиихэдээ би ондоо хүнэй татаһан һуури дээрэ барихагүйн тула Христоос тухай хүнүүдэй огто дуулаагүй нютагуудаар номнохо гэжэ оролдооб.

²¹ Нангин Бэшэгэй хэлэһэн ёһоор: «Тэрээн тухай мэдээсэлгүй байһан хүнүүд хараха, Тэрээн тухай юумэ дуулаагүй хүнүүд ойлгохо».

Павел Рим ошохые түлэблэнэ

²² Таанадта оло дахин ошохо гэхэдэмни, энэ ажални намайе табидаггүй байгаа.

²³ Харин мүнөө эдэ нютагуудта ажалаа дүүргэһэн, олон жэлэй туршада таанадтай ошожо уулзаха һанаатай байһан хадаа

²⁴ Испани ошохо замдаа таанадтай уулзахаб. Тиигээд хэдэн сагай туршада таанадтайгаа уулзан баярлахаб, һүүлдэнь замаа үргэлжэлүүлхэдэмни туһалхат гэжэ найданаб.

^25-26 Харин мүнөө би Македониин ба Ахайяын һүзэглэгшэдэй һайн дураараа суглуулһан алта мүнгэ дуталдажа байһан Бурханай хүнүүдтэ хубаажа үгэхөөр Иерусалим ошоноб.

²⁷ Тэдэ һүзэглэгшэд туһалха гэһэн шиидхэбэри өөһэдөө гаргаа. Гэхэтэй зэргэ үнэн бодолоороо тэдэнэр туһалха ёһотойшье юм. Хэрбээ еврейнүүд оюун сэдьхэлэй буян хэшэгээрээ бусад арадуудтай хубаалдаһан байбал, бусад арадуудшье алта мүнгэнэй буян хэшэгээрээ еврейнүүдтэ туһалха ёһотой юм.

²⁸ Тэдэндэ суглуулагдаһан алта мүнгэ хүргэхэ ажалаа бүтээгээд, би таанадаа дайран, Испани руу ябахаб.

²⁹ Таанадта ерэхэдээ, би Христоосой буян хэшэгээр таанадтай элбэг дэлбэгээр хубаалсахаб гэжэ мэдэнэб.

³⁰ Аха дүүнэр, намтай хамта минии түлөө Бурханда ханалгатайгаар зальбаржа байгыт даа гэжэ гуйнаб. Бидэ манай Эзэн Иисүүс Христоосто нэгэ адли һүзэгтэй, Һүлдын үршөөдэг нэгэ адли хайра дуратай ха юмбибди.

³¹ Иудейн һүзэггүй зонһоо Бурхан намайе аршалһай, Иерусалимда хэхэ ажални тэндэхи Бурханай зондо һайшаагдаһай гэжэ зальбарыт даа.

³² Тиигэбэл би, Бурханай хүсөө һаа, таанадта баяр жаргалтай ерэхэб, таанадтайгаа уулзаад, һанаагаа амархаб.

³³ Амгалан байдал үршөөдэг Бурхан та бүхэнтэй оршожо байхань болтогой!