Римэйхиндэ 11 - Библи

Израильда үгтэһэн Бурханай үршөөл хайра

¹ Зай, тиихэдээ Бурхан Өөрын арадһаа арсаба гү гэжэ би һуранаб. Үгыл даа! Би өөрөөшье Израилиин хүн, Абраһаамай үри һадаһан, Бэньямиинэй обогой хүмби.

² Эхинһээ нааша шэлэжэ абаһан арадһаа Бурхан арсаагүй. Нангин Бэшэг соо Израилиин арадые зэмэлэн, Элияагай Бурханда хандаһые һананагүй аалта?

³ Тэрэ: «Эзэн, тэдэнэр Танай лүндэншэдые алаа, тахил үргэдэг үргэлэй шэрээнүүдые һандаргаа, би гансаараа үлөөб, харин намайешье алахаяа һэдэнэ», – гээ һэн.

⁴ Бурхан харюудань юун гэжэ хэлээ һэм? «Хуурмаг бурхан Баалда һүгэдөөгүй долоо мянган хүниие Би Өөртөө үлөөгөөб».

⁵ Мүнөөнэйшье сагта тон тиимэ: Бурханай үршөөл хайраар шэлэгдэжэ абтаһан хүнүүд үшөөл бии.

⁶ Тэрэ хүнүүдые хэһэн хэрэгүүдээрнь бэшэ, харин үршөөл хайраараа шэлэжэ абадаг. Тиимэ бэшэ һаа, Тэрэнэй үршөөл хайра бодото бэшэ байха һэн.

⁷ Зай, юун болоноб? Израилиин арад зон бэдэрһэн юумэеэ олоогүй. Зүгөөр үсөөхэн лэ Бурханай шэлэжэ абаһан хүнүүд бэдэрээшэеэ олоо, харин бусад зониинь Бурханай уряалые анхараагүй.

⁸ Нангин Бэшэг соо хэлэһэнэй ёһоор: «Бурхан тэдэнэй сэдьхэлые мэдэрэлгүй болгоо, тиин тэдэнэр мүнөөдэршье болотор хараха гү, али дуулаха аргагүй байна».

⁹ «Эдеэнэй шэрээнь тэдэндэ занга, урьха болог, бүдэржэ унагааг, хэһээлтэдэ оруулаг!

¹⁰ Тэдэ хаража шадахаа болиг, нюдэниинь балартаг! Бэрхэшээл зоболонгуудта дарагдан, хэтын хэтэдэ тахииг лэ!» – гэжэ Давид бэшэнэ.

¹¹ Тиигэбэл еврейнүүд дахин хэзээшье һэргэжэ бодохогүйгөөр бүдэржэ унаа гү гэжэ би һуранаб. Үгыл даа! Тэдэнэй нүгэл шэбэлдэ унахада, атаархалынь хүргэжэ байхаар бусад арадууд абаралда хүртөө.

¹² Еврейнүүдэй нүгэлһөө боложо газар дэлхэйнхид элбэг дэлбэгээр буян хэшэгтэ хүртөө, тэдэнэй оюун сэдьхэлэй ядуу байһанһаа бусад арадууд баян бардамаар буян хэшэгтэ хүртөө. Тиихэдэ еврейнүүдэй Бурханда хандабалнь, буян хэшэг бүришье элбэг дэлбэгээр үгтэхэ бэшэ аал.

Бусад арадуудай абаралга

¹³ Бусад арадууд, мүнөө би таанадта ханданаб. Бусад арадуудай элшэнээр ажаллажа байһандаа би бахархажа байхаб.

¹⁴ Тиигэжэ өөрынгөө яһанай аха дүүнэрэй дунда атаархал түрүүлжэ, заримыеньшье абаржа магадгүйб.

¹⁵ Тэдэнһээ арсахадаа, Бурхан бусад арадуудтай эбгүй байһанаа эбтэй эетэй болоо. Харин Бурханай еврейнүүдые ойртуулбалнь, юун болохоб? Тиигэбэл үхэһэн хүнүүдэй амидырһантай адли байха!

¹⁶ Хэрбээ дээжынь Бурханда зорюулаатай байбал, үлэһэнииньшье арюун сэбэр байхал. Хэрбээ модоной үндэһэниинь Бурханда зорюулаатай байбал, эшэ һалаануудыньшье баһа арюун сэбэр байха.

¹⁷ Һуулгагдаһан модоной зарим һалаануудыень таһалаад, орондонь зэрлиг оливай һалаануудые һуурижуулба ха. Бусад арадуудай түлөөлэгшэ таанад эгээл тэрэ зэрлиг оливай модотой адлит, мүнөө таанад үндэһэндэ, шэмэ шүүһэндэ баһа хабаатай болобот.

¹⁸ Тиимэһээ таанад үнөөхи һалаануудта адляар таһалагдажа хаягдаһан хүнүүдые доогуур бү харагты. Яахадаа таанад хамараа дээгүүр үргэбэбта? Таанад миин лэ һалаанууд ха юмта, таанад үндэһэ тэнжүүлэн баринагүйт, харин үндэһэн таанадые тэнжүүлэн барина.

¹⁹ «Минии һуурижахын лэ тула һалаанууд таһалагдаа», – гээд таанад хэлэхэт.

²⁰ Тэрэтнай зүб. Тэдэнэр һүзэггүй байһан хадаа таһаржа унаа, харин таанад һүзэгөөрөөл тэрэ һууринда няагдабат. Тиимэһээ тэрээгүүрээ бү бахархагты, зүгөөр айжа һүрдэжэ байгты.

²¹ Бурхан жэнхэни һалаанууд болохо еврейнүүдыешье хайрлаагүй, тиихэдэ Тэрээндэ үһэрхэбэлтнай, Тэрэ таанадые бүришье хайрлахагүй.

²² Бурхан ямар үршөөл хайратай, ямар уур сухалтай байдаг бэ гэжэ таанад эндэһээ харабат. Бурхан Өөртэнь үһэрхэһэн зондо уур сухалтайгаар, зүгөөр Тэрэнэй үршөөл хайрада байһан танда үршөөл хайратайгаар хандадаг. Тэрэнэй үршөөл хайрадань оршоогүй һаатнай, таанадые баһал таһалжа хаяха.

²³ Харин үнөөхи һүзэггүй еврейнүүд хубилбал, дахин һууриндаа байрлуулагдаха. Бурхан тэдэниие бусаажа һууриндань байрлуулха арга хүсэтэй юм.

²⁴ Бусад арадууд, таанад зэрлиг оливай һалаа набшаһадта адлит. Хэрбээ өөһэдынгөө зэрлиг модонһоо таһалагдаад, ондоо таримал оливай модондо һуурижуулагдадаг байхадань, таримал модоной һалаада адли еврейнүүдые түрэл һууриндань һуулгахада Бурханда бүришье амархан бэшэ гү?

Бүхы зондо үзүүлһэн Бурханай үршөөл

²⁵ Аха дүүнэр, өөһэдыгөө сэсэн ухаатайбди гэжэ бодожо байхагүйнтнай тула энэ нюуса үнэниие таанадта мэдүүлхэ һанаатайб. Израилиин зарим зон хододоо тиимэ зүрюу байхагүй, тэдэнэр шэлэгдэһэн бусад арадуудай бүрин Бурханда ерэтэр лэ тиимэ байха.

²⁶ Тиигэжэ Израилиин бүхы арад зон абарагдаха. «Сион хадаһаа Абарагша ерэхэ, Яковай үри һадаһадһаа нүгэл шэбэлые зайсуулха.

²⁷ Тэдэнэй нүгэл шэбэлыень зайсуулаад, Би тэдэнтэй энэ хэлсээ баталхаб», – гэжэ Нангин Бэшэг соо бэшээтэй байдаг.

²⁸ Бусад арадууд таанадай аша туһада Һайн Мэдээсэлые буруушааһан еврейнүүд Бурханай дайсадынь болоо. Харин Бурханай шэлэжэ абаһанай, үбгэ эсэгэнэртэнь үгэһэн найдуулгын ашаар тэдэнэр Бурханай нүхэдынь юм.

²⁹ Ушарынь юуб гэбэл, Бурхан шэлэжэ абаһан, буян хэшэгтээ хүртөөһэн хүнүүд тухайгаа һаналаа хубилгадаггүй.

³⁰ Бусад арад таанадай урдань Бурханай үгэ дууладаггүй байһантайтнайл адляар мүнөө еврейнүүд баһа Бурханай үгэ дууладаггүй. Тэрээнһээнь боложо таанад Бурханай үршөөл хайрада хүртэбэт.

³¹ Тон тиигэжэл танай хүртэһэн үршөөл хайрада хүртэхын тула еврейнүүд Бурханай үгэ дууланагүй.

³² Үршөөл хайраяа бултанда хайрлахын тула Бурхан бүхы хүнүүдые үсэд зүрюу ябадалай барлагууд болгоо.

³³ Хэн Бурханай баян бардамые, сэсэн ухааниие, мэдэрэл ойлгосые хэмжэхэ аргатайб? Хэн Тэрэнэй шиидхэбэриие тайлбарилжа шадахаб? Хэн Тэрэнэй харгы замые ойлгохоб?

³⁴ Эзэнэй һанал бодолые хэн мэдэрээб? Хэн Тэрээндэ заабарилжа, зүбшэл үгэжэ байхаб?

³⁵ Бусаажа үгэхэ уялгатайгаар Эзэндэ юумэ зээлидэһэн хүн байха аал?

³⁶ Бүхы юумые Тэрэ бүтээгээ, бүхы юумэн Тэрэнэй ашаар ба Тэрэнэй тулада оршоно ха юм. Бурхан хэтын хэтэдэ алдар солотой байһай! Болтогой.