Псалманууд 90 - Библи

¹ Ши, Дээдэ Бурханай халхабша доро ажаһуугша, Түгэс Хүсэтэ Бурханай һүүдэр доро амидарагша,

² Эзэн тухай «Тэрэ болбол минии хорохо газар, минии цайза хэрэм, Бурхамни, найдални!» гэжэ хэлэгшэ,

³ Бурхан шамайе ангуушанай урьхаһаа, үхэл хаталһаа абарха,

⁴ үдэ һодоороо хушаха, дали жэгүүрынь шинии халхабша болохо, үнэн сэхэнь бамбай ба хана халхабша болохол.

⁵ Һүниин аймшагһаашье, үглөөнэй эшхэрэн ниидээшэ годлиһоошье айхагүйш.

⁶ Үдэшын амадан ябааша тахал үбшэнһөөшье, үдэ дунда мүлжэгшэ үхэлһөөшье айхагүйш.

⁷ Мянган хүн шинии дэргэдэ, түмэн хүн шинии баруун гар талада унабашье, энэнь шамда халдахагүй.

⁸ Ши гансал нюдөөрөө хараад лэ, нүгэлтэй муу зондо хүрэдэг хэһээлтые харахаш!

⁹ Эзэниие ши өөрын хорохо газар, Дээдэ Бурханай оршохо газар болгоош.

¹⁰ Ямаршье муу юумэн шамтай тохёолдохогүй, ямаршье гай тодхор гэртэшни дүтэлхэгүй.

¹¹ Юуб гэбэл, бүхы замдашни шамайе аршалан хамгаалхые Тэрэ Өөрынгөө Эльгээмэлнүүдтэ захиралта үгэхэ.

¹² Шулуунда бүдэржэ унахагүйншни тула тэдэ шамайе гар дээрээ үргөөд ябаха.

¹³ Арсалангые болон хорото могойе гэшхэн байхаш, залуу арсалан, лууе дэбһэхэш.

¹⁴ Бурхан иигэжэ айладхаа: «Тэрэ Намда дуратай, тиимэһээ тэрэниие абархаб. Тэрэ Намда мүргэдэг, тиимэһээ тэрэниие хамгаалхаб.

¹⁵ Дуудахадань, Би тэрэниие дуулахаб. Гай тодхорто ороходонь, Би тэрээнтэй хамта байхаб. Тэрээндэ туһалхаб, тэрэниие суута хүн болгохоб.

¹⁶ Ута наһа үршөөхэб, Өөрын абарал тэрээндэ үзүүлхэб!»