Псалманууд 9 - Библи

¹ [Дуунай бүлэгэй хүтэлбэрилэгшэдэ: «Хүбүүнэйнгээ орондо үхэ» гэһэн аялга. Давидай псалма.]

² Эзэн, үнэнхэ зүрхэнһөө Танда һайниие хүргэнэб, гайхамшагта хэрэгүүдыетнай тунхагланаб.

³ Тан тушаа баярлан, баясан байнаб, Дээдэ Бурхан, нэрыетнай магтан дууланаб.

⁴ Эрьехэдэтнай, дайсадни һөөргөө сухарижа, бүдэрэн унаба, хосорбо!

⁵ Иигэжэ Та минии заргалдаан, шүүхын хэрэг шиидхээт, сэнтиидээ залараат, Үнэн шударга шүүгшэ!

⁶ Арадуудые номгоруулаат, хорото муу зониие усадхаат, тэдээн тушаа дурсагдахашье юумэн үгы болоо.

⁷ Дайсад хэтэдээ һандаргагдан һалаа, хотонуудыень үндэһөөрнь абажа хаяат, тэдээн тушаа юуншье һануулнагүй.

⁸ Эзэн хэтэ мүнхэдөө хааншалан байха. Зарга шүүбэри ябуулхын тула Тэрэ шэрээгээ дэлгээ.

⁹ Бүхы дэлхэйе Тэрэ үнэн шударга шүүбэрилхэ, арадуудые шударга сэхээр шүүбэрилхэл.

¹⁰ Дарлагдаад байгаа хүндэ Эзэн хорохо газар, бэрхэшээлтэй сагта хоргодохо газар болохо.

¹¹ Нэрыетнай мэдэдэг зондо Та этигэл найдалынь гээшэт, юуб гэбэл, Таниие бэдэрэн дагагшадые орхидоггүйт.

¹² Сиондо оршодог Эзэндэ магтаал дуулагты, хэһэн үйлэ хэрэгүүдынь зоной дунда тунхаглагты.

¹³ Шуһа урдахуулагшадһаа үһөөгөө Тэрэ абадаг, һанажа байдаг, зобогшодой ёолоон хашхараае мартадаггүй.

¹⁴ Эзэн, намайе үршөөгыт! Дайсад намайе зобоожо байнал, харыт! Үхэлэй хаалгаһаа намайе бодхоонот.

¹⁵ Юунэй түлөө бэ гэхэдэ, Сионой хаалгануудта Таниие магтан байхым тула. Намайе абарһандатнай баясан байхаб!

¹⁶ Үндэһэтэнүүд өөһэдын малтаһан нүхэндэ унаа, өөһэдын нюуһан торон зангада хүлөөрөө орошоо.

¹⁷ Иигэжэ Эзэнэй зарга эли тодо болоо, хорото муу хүн өөрын торон зангада ороо! [Хүгжэм]

¹⁸ Бурханиие мартадаг бүхы үндэһэтэнүүд – хорото муу зон Үхэлэй орон руу бусаха.

¹⁹ Үгытэй хүн хэтэ мүнхэдөө мартагдаа бэшэ, ядуу зонһоо найдалынь мүнхэдөө таһараа бэшэ!

²⁰ Эзэн, заларыт! Хүнэй бардамынь бү илаг лэ! Үндэһэтэнүүд Танай зарга шүүлгэндэ ерэг лэ!

²¹ Эзэн, тэдэниие айлган һүрдүүлыт, яяр хүнүүд гээшэлди гэжэ үндэһэтэн мэдэдэг байг лэ! [Хүгжэм]

²² Эзэн, юундэ Та холо зогсонобта, бэрхэшээлтэй сагта харагданагүйбта?

²³ Бардам зантай хорото муу хүн ядуу хүниие намнажа хойноһоонь ябана. Өөрынгөө зангада тэрэ өөрөө орог лэ!

²⁴ Муу хүн дуратай юумэ абажа шадахаараа һайрхажа, хомхой хүн Эзэниие хараажа, Тэрээнһээ буруу хаража байна гээшэ.

²⁵ Тэрэ бардамаар хаража, «харюусалга гэжэ байхагүй, Бурхан үгы» гэжэ һанадаг.

²⁶ Бүхы замынь амжалтатай байдаг. Танай шиидхэл тэрээнһээ холо, үндэр, бүхы дайсадынь тэрээндэ юуншье бэшэ.

²⁷ «Би оройдоошье бүдэрхэгүйб, үеын үедэ гай зоболонтой ушархагүйб» гэжэ тэрэ һанадаг.

²⁸ Амандань – хараал, мэхэ, худал, хэлэндэнь – һаад түбэг, хорон һанаан.

²⁹ Тэрэ амадаха газарта һуудаг, нюуса газарта гэмгүй хүниие аладаг, ядуу хүниие гэтэн бэдэржэ байдаг.

³⁰ Нүхэндөө байгаа арсалан шэнги тэрэ нюуса газарта хорожо, маряажа,

³¹ ядарһан хүниие барижа шэрэхэеэ хэбтэдэг. Тиигээд ядарһан нэгэниие торон зангадаа оруулжа баридаг.

³² Бэеэ хуряан, маряажа, һүрэн унахадань, азагүйшүүл хүсэтэй һабартань ородог. «Бурхан мартамхай, буруу хараад байна, юушье харанагүй» гэжэ тэрэ хорото хүн һанадаг.

³³ Эзэн, бодыт! Бурхан, гараа һунгыт! Ядуу зон тухай бү мартыт!

³⁴ Хорото муу хүн Бурханиие юундэ хараана бэ? Харюусалгада татахагүй гэжэ Тан тухай һанана гү?

³⁵ Теэд Та харанат, гай тодхор, зоболон ажагланат. Өөрын гараар бүхы юумэнэй түлөө харюулхат! Ядуу хүн өөрыгөө Танда үгэнэ, үншэн хэнзын туһалагша гээшэт.

³⁶ Хорото муу юумэ хэжэ, бузар үйлэдэжэ байгаашын гарые хухалаад, хорон мууень элирүүлээд, олохын арагагүй болотор мууень үгы хыт!

³⁷ Эзэн хадаа хэтэ мүнхэдөө Хаан юм. Газар нютагһаань хариин зон усадхагдаха.

³⁸ Эзэн, Та даруу номгон зоной хүсэл соносоо бэлэйт. Зүрхыень зоригжуулжа, шэхээ табин шагныт!

³⁹ Иигэжэ дэлхэй дээрэ дарлалта үүдхэдэг зоной үгы болохын тула үншэн болон ядуу зоной түлөө оролсыт!