Псалманууд 88 - Библи

¹ [Эзраахай Этаанай ирагуу үгэнүүд.]

² Эзэн, би Танай энэрэл хайра тухай мүнхэдөө дуулан байхаб, үеһөө үедэ Танай үнэн байдалые амаараа мэдүүлэн байхаб.

³ Юуб гэбэл, «энэрэл хайратнай мүнхэдөө байгуулагданхай, Танай үнэн байдалыетнай огторгой мэтэ хододоо оршохо» гэнэб.

Бурхан:

⁴ Шэлэн абаһан нэгэнтэйгээ хэлсээ баталааб, Өөрын зараса Давидта иигэжэ тангариглааб:

⁵ «Хэтэ мүнхэдөө үриеш тогтоожо, хан шэрээеш үеһөө үедэ дамжуулан байгуулхаб». [Хүгжэм]

⁶ Эзэн, Танай гайхамшагта хэрэгүүдые, үнэн байдалыетнай гэгээнтэнэй суглаанда огторгой алдаршуулна.

⁷ Юуб гэбэл, тэнгэридэ Эзэнтэй сасуулмаар хэн байхаб? Бурханай хүбүүдэй дунда хэн Эзэнтэй адли бэ?

⁸ Гэгээнтэнэй ехэ суглаанай дунда Бурхан һүрдэмөөр, тойроод байгаашуулда бултандань Тэрэ аймшагтай.

⁹ Түмэн Сэрэгтэ Эзэн Бурхан! Хэн Тантай адли хүсэтэйб? Үнэн байдалтнай Таниие тойроно.

¹⁰ Та далайн дошхоролые захиран удариданат. Долгинуудайнь хүсэтэй долгилходо Та номгоруулнат.

¹¹ Та Рааһабые бута сохёот, хүсэ шандааһаараа дайсадаа тараагаат.

¹² Огторгой болон газар – Танай, юртэмсые болон тэрэниие бүридүүлэгшэ бүхы юумэ Та байгуулаат.

¹³ Хойто болон урда зүг Та бүтээгээт, Табоор болон Хэрмоон Танай нэрые магтана.

¹⁴ Шадал шандааһантнай хүсэтэй, гартнай шанга, баруун гартнай дээрэ үргөөтэй.

¹⁵ Зүб шударга болон шударга хуули – шэрээгэйтнай һуури мүн, энэрэл хайра болон үнэн байдал урдатнай ябадаг.

¹⁶ Баярай дуу мэдэхэ арад юрөөлтэй! Эзэн, тэдэ нюурайтнай гэрэл соо ябанал.

¹⁷ Бүхэли үдэрөө тэдэ нэрэдэтнай баярлана, зүб шударгаартнай тэдэ үргэмжэлэгдэнэ.

¹⁸ Юуб гэбэл, Та тэдэнэй хүсэ шадалай алдар, талархалаартнай бидэ толгойгоо үргэнэбди.

¹⁹ Юуб гэбэл, бидэнэй бамбай болбол Эзэн, манай хаан – Израилиин арюун Бурхан.

²⁰ Нэгэтэ Та Өөрын арюун зондо үзэгдэл соогоо айладажа: Би нэгэ баатарта туһалжа, арад зон сооһоо шэлэгшэ нэгэниие үргэмжэлөөб.

²¹ Өөрын зараса Давидые оложо, Өөрын арюун тоһоор тэрэниие тоһолооб.

²² Гарни тэрээндэ туһалан байха, шандааһамни тэрэниие бүхэ болгохо.

²³ Дайсан тэрэниие диилэхэгүй, хорото муу хүн тэрэниие зобоохогүй.

²⁴ Хараһаар байтарнь дайсадынь һалгахаб, тэрэниие үзэн ядагшадые бута сохихоб.

²⁵ Минии үнэн байдал болон энэрэл хайрамни тэрээнтэй байха, Минии нэрээр тэрэ эбэрээ дээшэнь үргэхэ.

²⁶ Гарыень далай дээгүүр һунгуулхаб, хүсэ шадалынь гол мүрэн дээгүүр байлгахаб.

²⁷ Тэрэ намайе иигэжэ нэрлэхэ: «Та минии эсэгэт, минии Бурханта, абарагша хабсагаймнит».

²⁸ Би тэрэниие ууган хүбүүн болгохоб, дэлхэйн хаашуулһаа дээгүүр табихаб.

²⁹ Энэрэл хайрамни тэрээнтэй мүнхэдөө байха, тэрээнтэй хэлсээмни бата мүн.

³⁰ Үрииень хэтэ мүнхэ үргэлжэлүүлэн байлгахаб, хан шэрээнь тэнгэриин үдэрнүүдтэл хэтэ байха.

³¹ Хэрбээ үри хүүгэдынь һургаалым орхин мартажа, Минии заабаринуудые сахихаа болёо гээшэ һаань,

³² хуулинуудым эбдэжэ, тогтоол ёһонуудым бэелүүлээгүй һаань,

³³ Би тэдэнэй муу ябадалые баягаараа, гэм бурууень һабаагаар сохин шиидхэхэб.

³⁴ Гэбэшье энэрэл хайраяа тэдээнһээ таһалхагүйб, үнэн байдалаа хубилгахагүйб.

³⁵ Хэлсээгээ эбдэхэгүйб, амалһанаа хубилгахагүйб.

³⁶ Нэгэтэ Би арюун нангинаараа тангариглаа бэлэйб, Давидые мэхэлхэгүйб.

³⁷ Үри һадаһадынь хэтэ мүнхэдөө оршохо, хан шэрээнь урдамни наран мэтэ толорхо.

³⁸ Һарадал адли тэрэ мүнхэдөө шанга байха, тангаригай үнэн гэршэ тэнгэридэ мүн. [Хүгжэм]

Псалма дуулагша:

³⁹ Харин Та Өөрын тоһолон шэлэгшэдээ уурлажа, хаяжа, буруушаажа байнат.

⁴⁰ Өөрын зараса болохо тэрээнтэй хэлсээгээ эбдэжэ, титимынь газар тооһондо унагаабат.

⁴¹ Та тэрэнэй бүхы хана эбдээт, бата хэрэмүүдынь һүйрэл болгоот.

⁴² Хажуугаарнь үнгэрэгшэ бүхэн тэрэниие дээрмэдэнэ, хүршэнэрынь тэрэниие баһана.

⁴³ Дайсадайнь гарые тэрээн руу үргүүлээт, бүхы дайсадынь баярлуулаат.

⁴⁴ Һэлмыень һөөргэнь харуулаат, байлдаанай үедэ туһалаагүйт.

⁴⁵ Хаан титимынь буляагаат, хан шэрээень газарта унагаагаат.

⁴⁶ Залуу наһыень богони болгоот, эшхэбтэр байдалаар тэрэниие хушаат. [Хүгжэм]

⁴⁷ Эзэн, хэды болотор хоргодохобта?! Хэды болотор уур хилэнтнай гал мэтэ дүрэлзэхэб?!

⁴⁸ Ами наһанайм хугасаае һаныт. Та хүнэй хүбүүдые юундэ дэмы бүтээгээбта!

⁴⁹ Хэн хүн үхэл үзэнгүй амидаржа шадахаб? Хэн һүлдэеэ Үхэлэй оронһоо абаржа шадахаб? [Хүгжэм]

⁵⁰ Эзэн, Танай урданай энэрэл хайра хаанаб? Өөрын үнэн байдалаар Та Давидта тангариглаа бэлэйлта.

⁵¹ Танай зарасанарые яажа доромжолһые, Эзэн, хариин зоной баһаһые досоогоо тээжэ-тэсэжэ байналби.

⁵² Эзэн, дайсадайтнай доромжолдогые, алхам бүхэндэнь Танай тоһолон шэлэгшые баһажа байһые һаныт.

⁵³ Эзэн хэтэ мүнхэдөө магтагдахань болтогой! Болтогой! Болтогой!