Псалманууд 87 - Библи

¹ [Дуулал. Коорахай уг удамай псалма. Дуунай бүлэгэй хүтэлбэрилэгшэдэ: үлеэдэг хүгжэмтэ зэмсэгэй дууряалга доро, зоболон тушаа хүгжэм. Эзраахай Һэмаанай ирагуу үгэнүүд.]

² Намайе абардаг Эзэн Бурхан, үдэр, һүнигүй Таниие дууданаб.

³ Зальбарални Тан руу ошог лэ, гуйхадам шэхээ табиит.

⁴ Юуб гэхэдэ, сэдьхэлни зоболоноор дүүрэнхэй, ами наһам Үхэлэй орондо ойртоол.

⁵ Нүхэн руу буугшад шэнги болооб, хүсэгүй хүндэл адлиб.

⁶ Үхэһэн зоной дунда хаягдаһан, агы нүхэн хуурсаг руу табигдаһан үхэнхэй хүндэл адли болооб. Та тэдээн тухай дахин һанахагүйт, тэдэ Танай мэдэлэй бэшэ.

⁷ Та намайе угаа гүнзэгы нүхэндэ, харанхы газарта, гүн руу табяат.

⁸ Уур хилэнтнай намайе хүндөөр дараа. Өөрын уур сухалай долгёор намайе зобоогоот. [Хүгжэм]

⁹ Нүхэдым намһаа холодуулаат, тэдэ намһаа жэрхэнэ. Би шорондо мэтэ зобоноб, гаража шадахагүйб.

¹⁰ Зоболоной нёлбоһодһоо боложо нюдэмни һулараа. Бүхэли үдэрөө Таниие, Эзэн, дууданаб, Тан руу альгаа дэлгэнэб.

¹¹ Та үхэһэн зондо гайхамшаг үйлэнүүдые үзүүлхэ юм гүт?! Һүүдэр болоһон зон бодожо, Таниие магтаха юм гү?! [Хүгжэм]

¹² Танай энэрэл хайра булашада, Танай үнэн зүб үмхэй газарта тунхаглагдаха юм гү?!

¹³ Танай гайхамшагта үйлэнүүд харанхыда мэдэгдэхэ юм гү?! Зүб шударгатнай марталгын газарта ойлгогдохо юм гү?!

¹⁴ Эзэн, би Таниие дууданаб! Эртэ үглөө зальбарални Танай урда ерэхэл.

¹⁵ Эзэн, юундэ Та намайе орхёобта? Юундэ намһаа буруу хараат?

¹⁶ Би залууһаа зобоноб, үхэхэ туйлдаа хүрөөб, Танай хэрзэгыһээ боложо хүсэгүй болонхойб.

¹⁷ Уур хилэнэйтнай долгин намайе бүдэрөөгөө, Танай эльгэһэн аймшагууд намайе һүнөөнэ,

¹⁸ үдэр бүри намайе уһандал хүреэлнэ, тэдэ хамтадаа намайе бүһэлөө.

¹⁹ Та амарагыем болон анда нүхэдыем намһаа зайлуулаат, минии танил тала – харанхы.