Псалманууд 83 - Библи

¹ [Дуунай бүлэгэй хүтэлбэрилэгшэдэ: гиттит гэжэ хүбшэргэйтэ зэр зэмсэгэй дууряалга доро. Коорахай уг удамай зохёоһон.]

² Түмэн Сэрэгтэ Эзэн! Танай оршодог газар хэды зохид һайхан бэ!

³ Эзэнэй нангин үргөөгэй хашаа руу орохоо хэды ехэ һананабиб! Зүрхэмни, бэемни Амиды Бурханай урда баясан дуулана.

⁴ Минии Хаан! Минии Бурхан! Түмэн Сэрэгтэ Эзэн! Танай үргэлэй шэрээндэ шубууншье оршохо газараа, хараасгайшье ангаахайнуудаа хэхэ уурхай олодог.

⁵ Танай нангин үргөө соо оршогшод угаа ехэ юрөөлтэй! Тэдэ хододоо Таниие магтан байхал.

⁶ Хүсэниинь Танай дотор, зүрхэндэнь Тан руу замууд байгааша хүн юрөөлтэй!

⁷ Нулимсын нюруугаар гарахадаа, тэдэ тэрэниие булаг болгодог, бороо тэрэниие нуураар дүүргэдэг.

⁸ Тэдэ хүсэ нэмээн ябана, Сиондо Бурханай урда ерэнэ.

⁹ Түмэн Сэрэгтэ Эзэн! Зальбаралым соносыт! Яковай Бурхан! Намайе шагныт! [Хүгжэм]

¹⁰ Маанадта аршалагша бамбай болоһон Бурхан! Өөрын шэлэһэн хүниие харыт, анхарыт.

¹¹ Юуб гэхэдэ, Танай нангин үргөөгэй хашаа соо нэгэ үдэр байха гээшэ мянган үдэрһөө дээрэ! Хорото муухай зоной майхангуудта байнхаар Бурханайнгаа нангин үргөөгэй богоһо дээрэ зогсоһон дээрэ!

¹² Ушарынь гэбэл, Эзэн Бурхан наран болон бамбай мүн! Эзэн нигүүлэл болон алдар соло үршөөдэг. Зүб замаар ябагшадые тэрэ юугээршье дутагдуулдаггүй.

¹³ Түмэн Сэрэгтэ Эзэн! Танда этигэдэг хүн юрөөлтэй!