Псалманууд 80 - Библи

¹ [Дуунай бүлэгэй хүтэлбэрилэгшэдэ: гиттит гэжэ хүбшэргэйтэ зэр зэмсэгэй дууряалга доро. Асаапай зохёоһон.]

² Манай хүсэн болохо Бурханиие магтан дуулагты, Яковай Бурханда баяртай хашхаралдагты.

³ Дуу дуулагты, хэсэ сохигты, элдэб янзын ятаг дээрэ наадагты.

⁴ Һарын шэнэдэ үхэр бүреэ үлеэгты, арбан табанай һарада – һайндэртээ.

⁵ Юуб гэбэл, энэ Израильда зорюулһан зарлиг, Яковай Бурханай тогтоол мүн.

⁶ Тэрэ Египедэй нютагаар ябажа байхадаа энэ зарлигые Иосифто үгэһэн юм. Урдань дуулаагүй иимэ хоолой соносоо бэлэйб:

⁷ Тэрэ иигэжэ хэлэжэ байгаа: Мүрнүүдһээшни хүндэ ашаа буулгааб, гарнуудыш арагһаа сүлөөлөөб.

⁸ Гай тодхорто ороод, ши Намайе дуудааш, Би шамайе сүлөөлөөб, туулган хара үүлэн сооһоо шамда харюусааб. Би шамайе Мэрибаагай уһанай хажууда туршааб.

⁹ Арад түмэмни! Уряаем дуулыш! Израиль, Намайе шагна!

¹⁰ Таанарай дунда хариин бурхан бү байг. Таанар ямаршье хариин бурханда мүргэхэ ёһогүйт.

¹¹ Би шинии Эзэн Бурхан мүн. Египедэй газар дайдаһаа шамайе гаргааб. Амаа ангай, Би шамайе эдеэлүүлхэб.

¹² Теэд арад түмэмни Намайе дуулабагүй, Израиль Намайе дахабагүй.

¹³ Тиимэһээ Би тэдэниие дураараа ябуулхын тула зүрхыень үсэд зандань үлөөгөөб.

¹⁴ Минии арад түмэн Намайе дуулажа, Израиль Минии зааһан замаар ябаа һаань, хэды һайн һэм!

¹⁵ Дайсадынь тэрэ дары номгоруулха һэм, дарлагшад руу гараа һунгаха һэм.

¹⁶ Дайсадынь Эзэнэй урда билдагуушалжа эхилхэ һэн, тэдэнэй хэһээлтэнь хэтэ мүнхын байха бэлэй.

¹⁷ Таанадые эрхим шанартай шэниисээр хооллуулха, таанадай түлөө хабсагайһаа зүгын бала урасхуулха һэм!