Псалманууд 77 - Библи

1 [Ирагуу үгэнүүд. Асаапай зохёоһон.]

¹ [Ирагуу үгэнүүд. Асаапай зохёоһон.] Арад зомни! Минии һургаалые анхарыт! Аманһаам гараһан үгэнүүдые дуулыт.

² Амаа нээхэдээ һургаалта үгэнүүдые хэлэхэб, эртэ урдын нюусануудые дуугархаб.

³ Тэдэниие бидэ дуулаһан, мэдэһэн, эсэгэнэрнай бидэндэ хөөрэһэн юм.

⁴ Бидэ тэдэниие хүүгэдһээнь нюухагүйбди, Эзэнэй алдарта, хүсэ шадалтайе, хэһэн гайхамшагта үйлэ хэрэгүүдыень ерэхэ үеынхидтэ тунхаглахабди.

⁵ Юуб гэбэл, Тэрэ Яковтай хэлсээ баталжа, Израильда һургаал хуули тогтооһон юм. Тэдэниие үхи хүүгэдтээ заагаарай гэжэ Тэрэ манай үбгэ эсэгэнэртэ захяа бэлэй.

⁶ Иигэжэ ерэхэ үеынхидэй мэдэхын, үхибүүдтэй болоод, тэдээндээ хөөрэхын тула.

⁷ Бурханда этигэжэ, үйлэ хэрэгүүдынь мартангүй, захяа заабаринуудыень сахихын тула.

⁸ Үсэд болон буһалгааша, Бурхантай хамта үнэнхэ зүрхэнһөө байгаагүй, Тэрээндэ үнэн сэхэ байгаагүй үбгэ эсэгэнэртээ адли байхагүйн тула.

⁹ Эпрааимай хүбүүд һурша номоор зэбсэгжэһэн харбаашад бэлэй, гэбэшье тэдэшье байлдаанай үдэр тэрьедэхэ баатай болоо һэн.

¹⁰ Тэдэ Бурхантай баталһан хэлсээгээ эбдээ, һургаал хуулииень сахяагүй.

¹¹ Хэһэн хэрэгүүдынь, харуулһан гайхамшагта үйлэнүүдынь тэдэ мартаа.

¹² Тэрэ элинсэг хулинсагайнь хараһаар байтар Египедэй газар дайдада Цооһанда гайхамшагта үйлэнүүдые хээ бэлэй:

¹³ далайе хубаагаад, дундуурнь тэдэниие хүтэлэн гаргаа, ехэ уһые хана мэтээр зогсоогоо;

¹⁴ үдэртөө урдуурнь үүлээр, һүниндөө галай гэрэлээр хүтэлэн ябаа;

¹⁵ Тэрэ сүл губида хабсагай хахалан, уһа гаргажа, агууехэ гүнһөө мэтээр тэдэниие ундалуулаа;

¹⁶ хабсагайһаа урасхал гаргаа, тэрэнь гол мэтээр урдаа.

¹⁷ Харин үбгэ эсэгэнэр урдань баһа нүгэл хээ, сүл губида Дээдэ Эзэнэй урдаһаа эсэргүүсээ.

¹⁸ Эдеэ хоол эрин, Бурханиие туршахаа һанаа.

¹⁹ Бурханда эсэргүүсэжэ, иигэжэ хэлээ: «Бурхан сүл губида эдеэнэй шэрээ бэлдэжэ шадаха гү?

²⁰ Тэрэ хабсагайе хахалжа, уһан урдаа, горход зурыгаа. Хилээмэ үгэжэ шадаха аалам? Арад түмэнөө мяхаар хооллуулха гү?».

²¹ Эзэн дуулажа, уур хилэн болобо, Яковта уурынь дүрэлзэбэ, Израильда сухалынь бушаганаба.

²² Тэдэ Бурханда этигээгүй, абарха гэжэ найдаагүй бшуу.

²³ Тэрэ дээрэ байһан үүлэдтэ захиржа, тэнгэриин үүдэнүүдые онгойлгобо.

²⁴ Тэдээн дээрэ будаа бороо шэнгеэр оруулаа, эдихыень тэнгэриин хоол үгөө.

²⁵ Зон Бурханай Эльгээмэлнүүдэй эдеэ, Тэрэ садатарынь эдеэлүүлээ.

²⁶ Тэнгэридэ зүүн зүгэй һалхи үлеэлгэбэ, урда зүгэй һалхи Өөрын хүсэ шадалаар туун асарба.

²⁷ Тэдээн дээрэ мяха тооһон мэтээр, шубуудые далайн элһэн мэтээр буулгаба.

²⁸ Шубуудые хото хүреэнэй дунда, майхангуудай хажууда унагааба.

²⁹ Тэдэ эдижэ садаа, хүсэһэн юумыень Тэрэ тэдээндэ үгөө.

³⁰ Гэбэшье хүсэһэн юумэеэ хүсэд эдлэжэ үрдеэгүй байхадань, эдеэ хоолойнь амандань байхада,

³¹ Бурханай уур сухал тэдээн дээр буужа, хүсэтэйень алаба, Израилиин эрэшүүлые сохин унагааба.

³² Иимэ байдалда тэдэ нүгэл үйлэдэһөөр лэ байгаа, гайхамшагта хэрэгүүдтэнь этигээгүй бэлэй.

³³ Тэрэ наһыень богони болгобо, айн-шэшэрэлдэн тэдэ ажаһуугаа һэн.

³⁴ Тэрэнэй тэдэниие алахада, тэдэ Өөртэнь бусадаг байгаа. Бурханиие дахин бэдэржэ эхилдэг һэн.

³⁵ Бурхан тэдэнэй хорохо газар, Дээдэ Бурхан Абарагшань гэжэ тэдэ һанадаг бэлэй.

³⁶ Урдань билдагуушалжа, худалаар хэлэжэ байдаг һэн.

³⁷ Теэд зүрхэниинь Тэрээнтэй хамта бэшэ бэлэй, тэдэ хэлсээе сахидаггүй һэн.

³⁸ Теэд Тэрэ нигүүлэсхы сэдьхэл үзүүлэн, нүгэлынь хүлисэдэг, тэдэниие хюдадаггүй, оло дахин уур хилэнгээ зайлуулдаг, уураа номгоруулдаг байгаа.

³⁹ Тэрэ тэдэниие юрэдөө миин лэ мяхан бэе, һалхилан ошоод дахин бусадаггүй һэбшээн гэжэ һанадаг һэн.

⁴⁰ Сүл губида тэдэ хэды дахин буһалгаалаа, эзэгүй хооһон газарта хэды дахин сухалынь хүргөөгөө гээшэб!

⁴¹ Бурханиие дахин-дахин туршажа, Израилиин Арюуниие муулажа байгаа.

⁴² Гарайнь хүсэ шадалтайе, дайсанһаа абарһыень тэдэ һанаагүй.

⁴³ Египедтэ гайхамшагта үйлэ хэрэгүүдые хэһыень, Цооһан талада тэмдэгүүдые харуулһыень;

⁴⁴ Египедэй бүхы гол горходые шуһаар урдахуулһыень, тэндэһээ уһа уужа болохоор бэшэ байһые;

⁴⁵ Египедэй зониие хазахыень һононуудые. Хосороохыень баха эльгэһыень;

⁴⁶ ургасыень хорхой шумуулда, ажалайнь үрэ дүн – таршаада үгөө.

⁴⁷ Уһан үзэмэйнь мүшэрые мүндэртэ, инжир мододые мүльһэн хюрууда сохюулаа.

⁴⁸ Малынь мүндэртэ, һүрэгынь сахилгаанда сохюулаа.

⁴⁹ Тэдээн руу бушаганама уур сухалаа, зэбүүрхэһэнээ, хилэнгээ, гай гасалан эльгээ, усадхагша бүлэг Эльгээмэлнүүдээ ябуулаа.

⁵⁰ Уур сухалайнгаа зам тэгшэлээ, ами наһынь хайрлаагүй, малынь тарбаган тахалда хюдуулаа.

⁵¹ Египедтэ ууган хүбүүдые, Хаамай майхангуудта ууганиие усадхаа.

⁵² Арад түмэнөө хонид мэтээр дахуулаа, сүл губяар һүрэг шэнгеэр хүтэлөө.

⁵³ Тэдэнэй айхаар бэшээр, аюулгүйгөөр тэдэниие хүтэлөө, харин дайсадынь далайн уһанда абтаа.

⁵⁴ Тэрэ тэдэниие арюун газартаа, баруун гарайнгаа баряад байгааша тэрэ хадада асараа.

⁵⁵ Тэдэнэй хажууһаа арадуудые үлдэн намнаа, уг залгамжалан эдлэхыень газарыень хубаажа үгөө, Израилиин обогуудые майхангуудтань һуурижуулаа.

⁵⁶ Харин тэдэ Тэрэниие туршажа байгаа, Дээдэ Бурханай урдаһаа эсэргүүсээ, хэлсээгээ сахяагүй.

⁵⁷ Элинсэг хулинсагтаа адли, урбажа, мэхэлжэ, Найдалгүй һурша номдол хазагайржа байгаа.

⁵⁸ Юуб гэбэл, тэдэ мүргэдэг обоонуудаараа уурынь, онгонуудаараа хилэнгынь хүдэлгэжэ байгаа.

⁵⁹ Бурхан дуулажа, уур хилэнтэбэ, Израильда үзэн ядатараа ехэ сухалдаба.

⁶⁰ Шилоодохи байраяа, зоной дунда ажамидарһан майхангаа орхижо,

⁶¹ Өөрын хүсэ шадалые баряанда абхуулба, Өөрын алдарые дайсанда үгэбэ.

⁶² Өөрын арад түмэниие һэлмээр сабшуулба, Өөрын зөөридэ уурлаба.

⁶³ Гал дүлэндэ хүбүүдынь хосорбо, басагадта хуримай дуу дуулажа үрдингүй.

⁶⁴ Санаартад һэлмээр сабшагдаа, бэлбэһэн эхэнэрнүүд хүдөөлгэндэ уйлажашье шадаагүй.

⁶⁵ Гэбэшье нойрһоо һэриһэндэл Эзэн һэргэжэ, архида һогтоод тэлэрһэн баатартал бодожо,

⁶⁶ дайсадаа хюдаба, намнаба, хэтэ мүнхын эшхэбтэр байдалда оруулба.

⁶⁷ Иосифой майхан буруушаажа, Эпрааимай обогые шэлэбэгүй,

⁶⁸ Иудын обог шэлэбэ, Сион хадада дурлаба.

⁶⁹ Өөрын нангин газарые огторгойдол адляар байгуулба, газартал адляар хэтэдээ баталба.

⁷⁰ Тэрэ Өөрын зараса Давидые шэлэжэ, хониной хашааһаа абаба,

⁷¹ хурьгатай хонидые дахан ябадаг тэрэниие Тэрэ Өөрын арад түмэн болохо Яковые, Өөрын угай зөөри Израилиие адуулуулхаар асарба.

⁷² Иигэжэ Давид тэдэниие гүн сэдьхэлһээ оролдон адуулаа, ухаатай уран гараараа тэдэниие ударидан ябаа.