Псалманууд 76 - Библи

¹ [Дуунай бүлэгэй хүтэлбэрилэгшэдэ: Едүтүүнэй аялга. Асаапай псалма.]

² Бурханда ханданаб, Бурханиие дууданаб, Тэрэ намайе дуулана.

³ Зобожо байһан үдэртөө Эзэниие бэдэрээб, бүхэли һүниндөө гараа үргэн наманшалааб, сэдьхэлни амараагүй.

⁴ Бурханиие һанаад, зобон шаналан байхаб, хээли алдан иигэжэ хэлэхэб: [Хүгжэм]

⁵ «Нюдыем анюулнагүйт, угаа ехэ сохилто абаад, дуугаржа шадахаа болёод байнам».

⁶ Эртэ урдын саг тушаа, үнгэрһэн жэлнүүд тухай бодоноб.

⁷ Һүниндөө дуунуудаа һананаб, зүрхэнтэеэ хөөрэлдэнэб, һүнэһэм харюу бэдэрнэ.

⁸ Эзэн хэтэ мүнхэдөө буруу хараа юм гү? Саашадаа Тэрэ нигүүлэсхыгээр хандахагүй юм гү?

⁹ Тэрэнэй энэрэл хайра хэтэдээ барагдаа юм гү? Үгэниинь хэтэ мүнхэдөө дуулдахаа болёо юм гү?

¹⁰ Бурхан хайрлахаа мартаа юм гү? Уурлан, үршөөлөө хуряагаа гээшэ гү? [Хүгжэм]

¹¹ Би иигэжэ хэлээб: «Дээдэ Бурханай баруун гарай ондоо болоһониинь минии уйдхар гашуудал мүн».

¹² Эзэнэй хэрэгүүдые һанахаб, эртэ урда сагта Танай түхөөһэн гайхамшагта хэрэгүүдые һанахаб.

¹³ Танай хэрэгүүдые бултыень ойлгон, Танай агууехэ хэрэгүүд тушаа бодохоб.

¹⁴ Бурхан, замтнай арюун. Бурхандал адли иимэ агууехэ бурхан үшөө бии юм гү?

¹⁵ Та гайхамшагта үйлэ хэрэгүүдые хэдэг Бурханта. Та арадуудта Өөрын хүсэ шадал харуулаат.

¹⁶ Шанга гараараа Та Өөрын арад түмэниие – Яковай болон Иосифой уг удамые абараат. [Хүгжэм]

¹⁷ Бурхан! Таниие ехэ уһан хараад, айгаа, гүн шэшэрээ.

¹⁸ Үүлэнһөө аадар адхараа, туулган үүлэнһөө дуун гараа, годлинуудтай эшхэрэн ниидээл.

¹⁹ Тэнгэриин дуунтнай хуй һалхин дунда, сахилгаан түби дэлхэйе гэрэлтүүлээ. Газар дэлхэй һалганан, шэшэрэн байгаа.

²⁰ Замтнай далайгаар, харгытнай агууехэ уһан дунда, хэншье Танай хайшаа шэглэһые мэдэхэгүй.

²¹ Та Өөрын арад түмэниие хонин һүрэг мэтээр Моисей болон Аһарооной гараар хүтэлэн ябаат.