Псалманууд 74 - Библи

¹ [Дуунай бүлэгэй хүтэлбэрилэгшэдэ: «Бү усадхыт» гэдэг аялга. Асаапай псалма. Дуун.]

² Бидэ Танда магтаал үргэжэ байнамди, магтанамди, аманһаамнай Танай нэрэ унанагүй, Танай гайхамшагта хэрэгүүдые тунхагланабди.

Бурхан:

³ – Би саг хугасаа тодорхойлхоб, зүб зарга шүүбэри ябуулхаб.

⁴ Газар дэлхэй болон ажаһуугшадынь шэшэрэлдэн байна, харин Би һуурииень бүхэлөөб. [Хүгжэм]

⁵ Би бардамлагшадта «Бү бардамлагты» гэнэб, хорото муу зондо «хамараа бү үргэгты,

⁶ тэнгэри тулама тэдэниие бү үргэгты! Толгойгоо омог бардамаар үргэн бү дуугарагты!» гэнэб.

Псалма дуулагша:

⁷ – Зарга шүүлгэ зүүн зүгһөө бэшэ, баруун тээһээшье бэшэ, сүл губиһаашье бэшэ, хада уулаһаашье бэшэ ерэдэг.

⁸ Бурхан – Шүүгшэ! Нэгые панхаруутуулжа, нүгөөдые үргэдэг.

⁹ Эзэнэй гарта аяга байна, тэрээн соо үзэмэй дараһан архи хөөһэрнэ. Дэлхэйн хорото муу бүхы зондо тэрэниие аягалхадань, тэдэ шабхарууень шахан ууха юм.

¹⁰ Харин би хэтэ мүнхэдөө магтаал дуулахаб, Яковай Бурханда магтаал үргэхэб!

Бурхан:

¹¹ – Хорото муу зоной эбэрнүүдые хухалхаб, зүб шударга хүнэй эбэр дээшээ үргэгдэхэ!