Псалманууд 73 - Библи

1 [Асаапай ирагуу үгэнүүд.]

¹ [Асаапай ирагуу үгэнүүд.] Бурхан, юундэ Та бидэниие хэтэдээ орхёобта? Юундэ ууртнай Өөрын хонин һүрэгтэ дүрэлзөөд байнаб?

² Эртэ урдаһаа оложо шэлэһэн зониие, худалдан абаһан, Өөрын болгоһон обогые, Өөрын байрлаһан Сион хадые һаныт.

³ Хэтэдээ һандарал болоһон газарта ерыт. Эндэ нангин газарта дайсан бүхы юумэ һандаргаал.

⁴ Танай заларһан газарта мүнөө дайсадтнай архиран байна. Тэдэ өөрын тугуудые илалтын тэмдэг болгон бодхоо.

⁵ Энэнь хэн нэгэн ой модондо һүхэеэ далайһан мэтэл.

⁶ Мүнөө тэрээн доторхи һиилүүр гоёолтонуудые һүхэ, лантуугаар сабшан усадхажа байна.

⁷ Тэдэ нагин газарыетнай дууһан шатаагаа, нэрынтнай оршодог газарые бузарлаа.

⁸ «Дууһан усадхая!» гэжэ шиидэн, Бурханай заларагша бүхы газарнуудые дэлхэй дээр галдаа.

⁹ Бидэ тэмдэгүүдээ бэшэ харанагүйбди, лүндэншэшье үгы, хэр удаан иимэ байхые хэншье мэдэнэгүй.

¹⁰ Бурхан! Дайсан хэды болотор баһажа, нэрыетнай хараал шэрээл болгон байхаб?!

¹¹ Юундэ Та баруун гараа татаад байнабта? Үбэрһөө гаргаад, тэдэниие усадхыт.

¹² Бурхан – эртэ урдын сагһаа минии Хаан, дэлхэйн дунда абаралай ажал ябуулагша.

¹³ Өөрын хүсэ шадалаар Та далайе хубаагаат, уһан дотор могойнуудай тархи бута сохёот.

¹⁴ Та Левиатанай толгой бута сохёот, сүл губиин арадуудта эдишэ болгон үгөөт.

¹⁵ Та горхон ба булагуудые урдахуулаат, билтарма уһатай голнуудые хатаагаат.

¹⁶ Үдэр болон һүни Танай мэдэлэй, һара, нара байгуулаат.

¹⁷ Газар дэлхэйн бүхы хилэнүүдые тогтоогоот, зун, үбэлые бии болгоот.

¹⁸ Эзэниие дайсанай баһадагые, мунхаг зоной Танай нэрые хараадагые һаныт.

¹⁹ Тагтаагайнгаа ами наһа зэрлиг амитадта бү үгыт, зобоһон зоноо хэтэдээ бү мартыт.

²⁰ Хэлсээнтэй юу болоһые харыт! Газар дэлхэйн харанхы булангууд хүсэрхэлөөр дүүрэнхэйл.

²¹ Дарлагдаһан хэн нэгэн эшхэбтэр байдалда оронхой бү бусаг, үгытэй, ядуу зон нэрыетнай алдаршуулаг лэ.

²² Бурхан, бодожо, хэрэгээ аршалыт, мунхаг хүнэй Таниие бүхэли үдэрөө хараажа байһые һаныт.

²³ Дайсадайнгаа хашхаран байһые, урдаһаатнай эсэргүүсэгшэдэй шууяа гаргадагые бү мартыт.