Псалманууд 72 - Библи

1 [Асаапай псалма.]

¹ [Асаапай псалма.] Израильда Бурхан хэды һайн гээшэб, сэбэр сэдьхэлтэй зондо!

² Харин би хүлөө алдан, бүдэржэ унан алдааб.

³ Юуб гэхэдэ, муу муухай зоной һайн байхые харахадаа, эдэ убайгүйшүүлдэ атаархааб.

⁴ Үхэтэрөө тэдэ зобоногүй, хүсэниинь бууранагүй.

⁵ Тэдэ бусад зондол адли зобоно бэшэ, зоной гай зоболон тэдэнэй бэшэ.

⁶ Тиимэһээ бардамлахань тэдэнэй хүзүүнэй зүүлтэ болодог, хүсэрхэл хубсаһаниинь болодог.

⁷ Таргалжа нюдэниинь ониигоо, хүсэл түсэбынь хизааргүй.

⁸ Тэдэ баһажа, гүжэр үгэ тараадаг, бардамлан дуугардаг.

⁹ Амаа огторгой руу ангайн, хэлэниинь газараар тэнэгшэ.

¹⁰ Иимэ зоной хойноһоо арад түмэмни дагана, дүүрэн адхан уһыень уунал!

¹¹ «Бурхан яагаад мэдэхэб даа? Дээдэ Эзэн мэдэхэ юм аал?» – гэжэ тэдэ хэлэнэ.

¹² Харыт, хорото муу зон ходо һайн байдалтай, баялигаа арьбадхан байнал.

¹³ Тиихэдээ би дэмы зүрхэеэ сэбэр байлгаа, гэмгүй байһанай тэмдэг болгон гараа угаан байгаа гээшэ гүб?

¹⁴ Үдэр бүри шархатуулжа, үглөө бүри зобожо байгаа гээшэ гүб?

¹⁵ Иигэжэ бодомжолжо байгаа гээшэ һаа, Танай хүбүүдэй угай урда гэмтэй байха һэм.

¹⁶ Юундэ иимэ гээшэб даа гэжэ ойлгохые би һэдээб, энээнтэй эбсэхэнь намда хүндэ байгаа.

¹⁷ Энэ Бурханай нангин газарта минии оротор үргэлжэлөө. Тиихэдэл тэдэнэй эсэс болохые ойлгоо бэлэйб.

¹⁸ Үнэндөө Та тэдэнэй харгые халтирхай болгохот, тэдэниие һалгаахат, усадхахат.

¹⁹ Хосоролынь гэнтэ ерэхэ! Тэдэ үхэхэ, эсэсынь угаа муухай байха.

²⁰ Эзэн, хүнэй зүүдэнһөө һэридэгтэл, Та тэдэниие һэргээжэ, юуншье бэшэ болгохот!

²¹ Зүрхэ сэдьхэлэйнгээ үбдэхэдэ, досоогоо зобожо байхадаа,

²² мэдээгүй, ойлгосогүй, Танай урда мал мэтэ байгааб.

²³ Харин би Тантай хододооб, Та намайе гарһаам хүтэлөөд байнат.

²⁴ Зүбшэл үгэн, намайе хүтэлнэт, удаань намайе һүр жабхалантай угтахат.

²⁵ Тэнгэридэ хэн бэшэ намда хэрэгтэйб? Тантай хамта байхадам, газар дээрэшье хэншье намда хэрэгтэй бэшэл.

²⁶ Бэемни, ухаамни һалаха, харин Бурхан – хэтэ мүнхэдөө зүрхэнэймни хатуу түшэг тулгуубари, хубимни мүн!

²⁷ Танһаа холодогшод хосорхо, Танда урбаһан бүхы зониие хюданат.

²⁸ Би Бурханай хажуудаб, намда ехэ зохид. Эзэн Бурхан хорохо газарни, Танай үйлэ хэрэгүүдые тунхагланаб.