Псалманууд 70 - Библи

¹ Эзэн, би хорохо газар Танһаал бэдэрнэб. Хэзээшье эшхэбтэр байдалда намайе бү оруулыт,

² зүб шударгаараа намда туһалыт, абарыт! Намайе дуулыт, зайлуулыт!

³ Намда хабсагай, аршалалта, хододоо хорохо газарни болыт! Минии абаралта тухай захирыт, юуб гэбэл, Та бол минии хабсагай, хэрэмни мүн!

⁴ Бурхамни, муу муухай хүнһөө, гэм хэгшэһээ, хэрзэгы дарлагшаһаа намайе зайлуулыт.

⁵ Юуб гэбэл, Та, Эзэн Бурхан, минии найдал, эдир наһанһаа эхилжэ найдагшамни болонот.

⁶ Эхын умайда бүрилдэһэнһөөм хойшо минии түшэг гээшэт, умайһаа намайе гаргаат, хододоо Таниие магтан байхаб.

⁷ Олондо би жэшээ болооб, Та минии бата тулгуубари мүн.

⁸ Аманһаам Танда магтаал гарана, үдэр бүри Танда алдар үргэнэб.

⁹ Үбгэрхэ үедэм намайе бү орхиит, хүсэ шадалайм буурахада, намайе бү хаяыт.

¹⁰ Дайсад нам тушаа хэлсэжэ, үхэхыем хүлеэнэ, зүбшэнэ.

¹¹ Тэдэ иигэжэ хэлсэнэ: «Бурхан тэрэниие орхёо. Намнагты! Баригты, юуб гэбэл, абарха хэншье байхагүй!»

¹² Бурхан, хажуу тээшээ болоод бү байгыт! Бурхамни, туһалхаа яарыт!

¹³ Намайе үзэн ядагшад аягүй байдалда орог, үгы болог! Намда мууе һанагшад эшхэбтэр байдалда орог, доромжологдог!

¹⁴ Харин би хододоо Танда найдажа ябахаб, дахяад Таниие магтан байхаб.

¹⁵ Үдэр бүри Танай зүб шударгые магтахаб, Намайе абархадаа юу хэһыетнай тунхаглахаб, харин бүгэдые тооложо боломоор бэшэ олон юм.

¹⁶ Танай хүсэн тушаа хөөрэхэб, Танай ори гансаараа зүб шударга тухай!

¹⁷ Бурхан, бага наһанһаам эхилэн намайе һурганат, би Танай гайхамшагта хэрэгүүдые мүнөөшье хүрэтэр магтан байхаб.

¹⁸ Үбгэрхэ, буурал болоходомнишье намайе бү орхиит! Танай шадалые зондо тунхаглахаб, хүсыетнай ерэхэ үенүүдтэ хөөрэхэб.

¹⁹ Бурхан, Танай зүб шударга тэнгэри тулама. Хэһэн үйлэ хэрэгүүдтнай агууехэ. Бурхан, Тандал адли хэншье байхагүй!

²⁰ Хэды олон зоболон намда үзүүлээ гээшэбта! Харин намайе дахин-дахин һэргээжэ, газарай гүнһөө татан гаргадаг байгаат.

²¹ Дахяад намайе үргыт, һанааем тэгшэрүүлыт.

²² Би ятагаар дууряалан Таниие магтахаб, Бурхамни, Танай үнэн сэхые дуулахаб! Ятагаар наадан, Таниие магтахаб, Израилиин Арюун!

²³ Танда дуулахадаа амамни баярлана, Танай абарһан сэдьхэлни баясана.

²⁴ Үдэр бүри хэлэмни Танай үнэниие тунхаглана, юуб гэбэл, намда мууе һанаашад доромжолуулжа шоодбори болоол!