Псалманууд 7 - Библи

¹ [Давидай гашуудал дуун. Бэньямиинэй обогой Күүш тухай мэдэхэдээ, тэрэ Эзэндэ энэ дуу дуулаа бэлэй.]

² Эзэн Бурхамни! Тандаал найдажа байнаб! мүрдэн намнагшадһаа намайе абарыт, аршалыт!

³ Үгы һаа, дайсан намайе арсаландал таһа татаха, хэһэг болгон зулгааха, хэншье абархагүй!

⁴ Эзэн Бурхамни! Буруу юумэ хээ, гараа бузарлаа гээшэ һаам,

⁵ нүхэртөө муу юумэ хээ һаам, дайсандаа туһалаа һаам,

⁶ хойноһоом дайсан намнажа, хүсэг, ами наһыем газарта шэдэн, нэрэ хүндыем шоройдо худхаг лэ!

⁷ Эзэн, уур хилэнсэглэн бодыт, дайсадайм бушаганажа байгаа сухалай урдаһаа үндыгыт, Бурхамни, һэриит, захиран тогтооһон заргаяа бэелүүлыт!

⁸ Арадууд Таниие тойрон сугларха, тэдээн дээгүүр, үндэртэ, хан шэрээдээ заларыт!

⁹ Та арадуудые шүүхэт. Эзэн, миниишье зарга хэрэгые шиидхыт: би гэмгүйб, зүб гээшэб.

¹⁰ Муу муухай зоной уур сухал эсэслэг! Зүб шударга Бурхан, Та зүрхэ, дотор нэбтэ харадагта, үнэн зүб хүниие дэмжыт!

¹¹ Бурхан – минии бамбай! Зүрхөөр хирэгүй арюун зониие Тэрэ абардаг.

¹² Бурхан – зүб шударга шүүгшэ, үдэр бүри Тэрэ хилэнсэгээ харуулдаг.

¹³ Тэрэ дахин һэлмээ бүлюудэбэ, һурша номоо шангадан татаба,

¹⁴ үхэлтэ зэбсэг Тэрэ гартаа баряад, гал дүлэтэ годлинуудые бэлдэбэл!

¹⁵ Зүб бэшэ юумэ бүрилдүүлэгшэ хүн муу муухай юумээр хээли оложо, худал хуурмагые түрэнэ.

¹⁶ Ондоо хүндэ унаха нүхэ малтагша нэгэн өөрөөл тиишээ халин унаха!

¹⁷ Муу юумэнь өөрынь урдаһаа эрьехэ, өөрынь толгойдо бууха!

¹⁸ Зүб шударга хэрэгэйнь түлөө Эзэндэ һайниие хүргэнэб, Дээдэ Эзэнэй нэрэ магтан дууланаб!