Псалманууд 68 - Библи

¹ [Дуунай бүлэгэй хүтэлбэрилэгшэдэ: «Сараана» гэдэг аялга, Давидай зохёоһон.]

² Бурхан, намайе абарыт, юуб гэбэл, ехэ уһан аминдамни хүрэжэ байнал.

³ Би гүнзэгы намагта шабагдааб, хүлөө табиха газар үгы. Гүнзэгы уһанда орооб, түргэн урасхалда абтааб.

⁴ Хашхарһаар би ехэ хүсэгүй болооб, хоолоймни хаташоо. Бурханаа хүлеэһээр нюдэдни һохор боложо байна.

⁵ Ямаршье шалтаггүй аад, намайе үзэн ядагшад толгойн үһэнһөөмни олон байна. Зүб бэшэ аад, намайе мүрдэгшэд хүсэтэй. Хулгайлаагүй юумэеэ бусааха ёһотойлби.

⁶ Бурхан! Та минии мунхаг тэнэгые мэдэнэт, буруу байһамни Танһаа нюуса бэшэ.

⁷ Минии буруу Танда этигэдэг зониие эшхэбтэр байдалда бү оруулаг, Түмэн Сэрэгтэ Эзэн Бурхан! Минии буруу Таниие бэдэрэгшэ зониие эшхэбтэр байдалда бү оруулаг, Израилиин Бурхан!

⁸ Юуб гэбэл, би Танай түлөө шэбшэг муухай байдал тэсэн байнаб, нюурыем эшэгүүр бүглөөд байна.

⁹ Аха дүүнэртээ хариин хүн мэтэ болооб, тэдээндэ гадаада хүн болооб.

¹⁰ Танай Гэртэ дуратай байһамни намайе дүлэн мэтээр бадараана, Таниие доромжолһон баһалтанууд нам дээрэ буугаа.

¹¹ Би масаг барин сэдьхэлдээ уйлааб, иигэжэ баһажа-наадалуулжа байбаб.

¹² Гашуудалай хубсаһа үмдэжэ, ябаган зугаа болооб.

¹³ Хотын бартаануудай хажууда нам тухай хэлсэнэ, һогтуу зоной дуун соо дурдагданаб.

¹⁴ Эзэн, таатай сагта зальбарални Танда шэглэдэг, Бурхан, агуу энэрэл хайраараа, үнэн абаралаараа намда харюулыт.

¹⁵ Намайе намагһаа татан гаргыт, бү шэнгүүлыт. Дайсадһаа, гүн ехэ уһанһаа абарыт.

¹⁶ Урасхалда намайе бү абтаагыт, гүн уһан намайе бү шэнгээг, Дээгүүрни нүхэнэй аман бү хаагдаг лэ.

¹⁷ Та үнэн сэхэ ба энэрхы сэдьхэлтэйт, намда харюусыт! Угаа ехэ үршөөлтэй Та нам руу эрьеыт!

¹⁸ Өөрын богоолһоо буруу бү харыт, Юуб гэбэл, би зоболондо абтаад байнаб. Түргөөр намда харюусыт!

¹⁹ Дүтэлыт, ами наһым абарыт, дайсадайм урдаһаа зорюута намайе абыт.

²⁰ Намайе яажа буруу болгон хэлэдэгые, эшхэбтэр байдалда оруулан доромжолдогые Та мэдэнэт. Минии дайсад бултадаа Танай урда.

²¹ Намайе буруу болгон хэлэдэгынь зүрхыем эмтэрүүлжэ, ехэ зобоод байнам. Хэн нэгэн намайе хайрлаха гэһэмни, хэншье үгы. Сэдьхэлым тэгшэрүүлхэ нэгэниие харагшалхадам, хэншье байхагүй.

²² Эдеэн гэжэ намда хоро үгэнэ. Ангажа байхадам, уксус уулгана.

²³ Тэдэнэй урда байгааша эдеэнэй шэрээнь тэдэндэ занга болог лэ, амгалан тайбан хоол барилгань урьха болог лэ.

²⁴ Тэдэ хаража шадахаа болиг, нюдэниинь балартаг, бэрхэшээл зоболонгуудта дарагдан хэтын хэтэдэ тахииг лэ!

²⁵ Уур хилэнсэгээ тэдээн дээр адхыт, дүрэлзэн байгаа ууртнай тэдээн дээр бууг лэ!

²⁶ Гэр байрань хооһорог, майхануудтань хэншье ажаһуухаа болиг!

²⁷ Юуб гэбэл, Танай шархатуулһан хүниие тэдэ шахан намнан байна, Танай хадхаһан зондо тэдэ үшөө зоболон ушаруулна.

²⁸ Нүгэл дээрээ нүгэл хэһыень һануулыт, Танай урда тэдэ зүб бү болог.

²⁹ Амиды мэндэ зоной номһоо тэдэ хаһагдан аршагдаг, зүб шударга зонтой хамта бү бэшэгдэг.

³⁰ Харин би үгытэй ядууб, зобожо байнам. Бурхан, абаралтнай намайе өөдэнь үргэг лэ!

³¹ Бурханай нэрые дуугаар магтахаб, үгэ хэлэн, Тэрэниие үргэмжэлхэб.

³² Энэ бол Бурханда эбэртэй, туруутай буха үргэлһөө үлүү зохид байхал.

³³ Ядуу зон энэниие харахадаа хүхилдэхэ, Бурханиие бэдэрэгшэдэй зүрхэн һэргэн амидырхал.

³⁴ Юуб гэбэл, Бурхан ядаржа байгаашадые дууладаг, шорондошье байгаа Өөрын зониие анхаралаараа орхихогүй.

³⁵ Тэнгэри ба газар, далай болон тэндэ амидарагша бүхэн Тэрэниие магтахань болтогой!

³⁶ Бурхан Сиониие абарха, Иудын хотонуудые бодхоохо, зон тэндэ дахяад һуужа, өөрын газарые эзэмшэн байхал.

³⁷ Зарасанарайнь уг удам тэрэниие уг залгамжалжа, Тэрээндэ дуратайшуул тэндэ оршон һуухал.