Псалманууд 67 - Библи

¹ [Дуунай бүлэгэй хүтэлбэрилэгшэдэ. Давидай псалма. Дуун.]

² Бурхан бодожо, дайсад тунан үгы боложо, Өөрыень үзэн ядагшад зугадаг лэ!

³ Утаанай тунадагтал, тэдэниие тунаан үгы болгыт. Гал дүлэнһөө дабирхайн хайладагтал, Бурханай урда муу муухай зон хосорог лэ!

⁴ Харин үнэн шударга зон хүхиг! Бурханай урда тэдэ баярлаг, хүхилдэн хөөрэн байг лэ!

⁵ Манай Бурханиие магтан дуулагты, нэрэдэнь магтаал үргэгты, Тэнгэреэр Ябагшада замынь заһагты! Тэрэнэй нэрэнь – Эзэн. Урдань баясан байгты!

⁶ Тэрэ үншэн хэнзэнүүдэй ба бэлбэһэн эхэнэрнүүдэй эсэгэ. Бурхан Өөрын нангин байра соо.

⁷ Гансаардаһан зондо Бурхан гэр байра болон гэр бүлэ үршөөдэг, баряанда байгшадые гэнжэһээнь сүлөөлдэг. Харин буһалгаата зон сүл губида үлэг лэ!

⁸ Бурхан! Арад түмэнэйнгөө урда ябахадатнай, сүл губиие гаталхадатнай [Хүгжэм]

⁹ газар доһолон байгаа, огторгойһоо хура бороо адхараа, Синайн Бурханай урда, Бурханай, Израилиин Бурханай урда.

¹⁰ Бурхан, Та хура бороо мэтээр хэшэгээ урасхуулаат, орон нютагайнгаа зобон зүдэрхэдэ Та тэрэниие дүнгөөт.

¹¹ Танай һүрэг мал энэ дэлхэй дээр бэлшэнэ. Та, Бурхан, үгытэй хүндэ хэрэгтэйень бэлдэнэт.

¹² Эзэн үгэеэ эльгэнэ, айладхагшадынь түмэн сэрэг мэтэ олон!

¹³ Түмэн сэрэгэй хаашуул зугадана, зугаданал! Харин ши, гэртээ үлөөшэ, олзо хубаагыш!

¹⁴ Таанад түүдэгэй һуурида хэбтэбэл. Тагтаагай далинууд мүнгэн, үдэнүүдынь алтан!

¹⁵ Түгэс Хүсэтын энэ дэлхэйн хаашуулые намнахада, Цалмоон дээр саһан сайжа байгаа бэлэй.

¹⁶ Бурханай хада, Башаан хада! Үндэр хада, Башаан хада!

¹⁷ Үндэр хада ууланууд, Бурханай оршохо, Эзэнэй хэтэдээ оршодог хада руу юундэ иигэжэ харанабта?

¹⁸ Бурханай дайшалхы тэргэнүүд үй түмэн, Эзэн тэдэнэй дунда. Синайн Бурхан арюун нангин газарта.

¹⁹ Та үндэр газарта дабшан гараат, баряан руу зониие туугаат, эсэргүүсэгшэ зонһоо ясаг абаат, тэндэ байра байдал зохёогоот, оо, Эзэн Бурхан!

²⁰ Үдэрһөө үдэртэ Эзэн үреэлтэй байг! Тэрэ манай ашаа даажа ябана, Бурхан – манай абарал! [Хүгжэм]

²¹ Бурхан маанадта абарагша Бурхан юм. Үхэлһөө зайлаха гээшэ Эзэн Бурханай мэдэлэй.

²² Бурхан дайсадайнгаа толгойе, гэм ходо хэжэ байгаашын толгойн оройе няса сохихо.

²³ «Би тэдэниие Башаанһаа бусаахаб, далайн гүнһөө гаргахаб», – гэжэ Эзэн айладаа бэлэйл.

²⁴ Энэ хадаа дайсадай шуһанда шинии хүлөө, нохойнуудайш хэлээ дүрөөхын тула бэлэйл.

²⁵ Бурхан, Танай заларан ерэлгэ, Бурханайм, Хаанайм нангин газарта залархань харагдана.

²⁶ Урдань дуушад, хойнонь хүгжэмшэд, дундань хэсэ хэнгэрэг сохиһон залуу эхэнэрнүүд.

²⁷ Израилиин үри һадаһад, Эзэн Бурханиие ехэ суглаанай дунда магтан дуулагты!

²⁸ Тэндэ – одхон Бэньямиин түрүүлнэ, Иудын ноёд өөһэдын түмэн зонтой, Зэбүлүүнэй ноёд, Напталиигай ноёд.

²⁹ Бурхан, Өөрын хүсэндэ, бидэндэ туһа болгон эльгэдэг хүсэндээ захирыт!

³⁰ Танай нангин үргөөдэ, Иерусалимда, хаашуул Танда бэлэгүүдые асарха.

³¹ Хулһан соо байгааша амитанда, хүсэтэ бухануудай – арадуудай һүрэгтэ занаарайт. Хүлдэ һүгэдэн унаг, мүнгэ асараг! Дайгаар жүрөөдэһэн арадуудые тараан үлдөөрэйт.

³² Египедһээ элшэн сайдууд ерэхэ, Эфиопи Бурхан руу гараа һунгаха.

³³ Дэлхэйн хан түрэнүүд! Бурханда магтаал үргэгты! Эзэниие магтагты! [Хүгжэм]

³⁴ Тэрэ эртэ урдын огторгой тэнгэридэ мордоод заларан ябана. Анхарыт, һүрөөтэй дуу хоолойгоор захирна.

³⁵ Бурханда алдар соло дуулагты! Хүсэниинь Израилиие аршалһан нэмэргэ мэтэ, хүсэ шадалынь үүлэн дээрэ байна.

³⁶ Бурхан, Израилиин Бурхан, Та нангин газартаа һүрдэмөөр байнат! Тэрэ арадтаа хүсэ, шадал үршөөдэг. Бурхан магтагдаха болтогой!