Псалманууд 65 - Библи

1 [Дуунай хүтэлбэрилэгшэдэ: дуун, псалма.]

¹ [Дуунай хүтэлбэрилэгшэдэ: дуун, псалма.] Бүхы газар дэлхэй, Бурханиие магтагты!

² Нэрыень алдаршуулагты, магтаал Тэрээндэ үргэгты!

³ Бурханда иигэжэ хэлэгты: «Хэрэгүүдтнай хэды һүрөөтэйб! Агууехэ хүсэтэйт, дайсадтнай Танай урда билдагуушална.

⁴ Бүхы дэлхэй урдатнай һүгэдэн байг лэ! Таниие магтаг, Танай нэрые алдаршуулаг!» [Хүгжэм]

⁵ Бурханай юу хэһые харыт! Хэһэн хэрэгүүдынь зондо айдаһатайл.

⁶ Тэрэ далайе хуурай газар болгоо. Хүлөөрөө бидэ гол гаталаабди, урдань хүхилдэн баясахабди!

⁷ Өөрын агууехэ хүсөөр Тэрэ хэтэдээ зонхилно, үндэһэтэд нюдэн доронь! Буһалгаашад бү бодог лэ!

⁸ Арадууд, манай Бурханиие магтагты! Магтаал Тэрээндэ шангаар үргэгты!

⁹ Маанад дотор Тэрэ амиды гол байлгана, буруу гэшхүүлнэгүй.

¹⁰ Бурхан, Та маанадые туршаат, мүнгэ хайлуулан сэбэрлэдэг мэтэ маанадые хайлуулан сэбэрлээт.

¹¹ Та маанадые урьхада оруулаат, нюргандамнай ашаа үргэлүүлээт.

¹² Маанад дээрэ хүниие һуулгаат. Гал, уһан дундуур гараабди, гэбэшье Та маанадые баян элбэг газарта асараат.

¹³ Нангин үргөө руутнай түгэс шатаалта үргэлтэй ерэхэб, урдатнай тангаригаа бэелүүлхэб.

¹⁴ Тэдэ тангаригуудые амаараа хэлээ бэлэйб, гай тодхорой үедэ хэлээрээ үгэлэн үргөө бэлэйб.

¹⁵ Түгэс шатаалта үргэл Танда үргэхэб, тарган хусануудые үргэхэб, буха, тэхэнүүдые үргэн шатаахаб. [Хүгжэм]

¹⁶ Бурханһаа түбэгшөөгшэд бултадаа шагныта! намда Тэрэ юу хээб гэжэ би хөөрэхэб.

¹⁷ Амаараа би Тэрэниие дуудаа һэм. Хэлээрээ Тэрэниие үргэмжэлөө һэм.

¹⁸ Зүрхэ сэдьхэлдэм гэм буруу байгаа гээшэ һаань, Эзэн намайе дуулахагүй һэн.

¹⁹ Харин Бурхан намайе дуулаа, зальбаралыем соносоо.

²⁰ Бурхан магтагдаха болтогой! Тэрэ зальбаралым буруу хараагүй, энэрэл хайрань намтай хамта!