Псалманууд 63 - Библи

¹ [Дуунай бүлэгэй хүтэлбэрилэгшэдэ: Давидай псалма.]

² Бурхан! Минии дуу хоолой, зальбаралым дуулыт! Дайсадһаа айнам! Ами наһым абарыт!

³ Муу муухай зоной нюуса хэлсээнһээ, гэмтэ муу зоной үймөөн буһалгаанһаа аршалыт!

⁴ Тэдэ хэлэеэ һэлмэ мэтээр бүлюүдээ, һурша номоо татан, хорото үгэеэ табихаа байна.

⁵ Нюуса далда газарһаа гэм зэмэгүй хүниие харбахын тула. Тэдэ гэнтэ харбаха, юунһээшье айхагүй.

⁶ Тэдэ хорото зорилго хэхэеэ батаар хэлсээ, урьха занга яажа табихаа хөөрэлдэжэ байна, «хэн маанадые хараха юм?

⁷ Нюуһан муу муухай хэрэгыемнай хэн обёорхоб даа» гэлдэнэ. Хүниие нэбтэ, зүрхэнэйнь оёор хүрэтэр харадаг Нэгэн энээниие хараха!

⁸ Эзэн тэдээн руу годлиёо харбаха, тэдэ гэнтэ шархатаха.

⁹ Өөһэдынь хэлэн өөһэдыень усадхаха. Энээниие харагша бүхы зон зайлаха.

¹⁰ Зон угаа ехээр айха, Бурханай юу үйлэдэһые тунхаглаха, Тэрэнэй хэһээһые ойлгохо.

¹¹ Зүб шударга хүн хорохо газар Эзэн дотор оложо баярлаха. Сэбэр һэшхэлтэй бүхы зон Тэрэниие магтан баясаха.