Псалманууд 62 - Библи

¹ [Давидай псалма. Иудын сүл губида байхадаа тэрэнэй зохёоһон.]

² Бурхан! Та – минии Бурхан! Таниие үнэнхэ зүрхэнһөө бэдэрнэб, Тан руу сэдьхэлни тэгүүлнэ. Уһагүй, хуурай сүл губида мэтэ Танаар анган мяхан бэемни байна.

³ Нангин газарта Таниие – Танай хүсэ шадал, алдарыетнай үзөө бэлэйб.

⁴ Амидаралһаа үлүүл Танай энэрэл хайра! Амамни Таниие магтан байна.

⁵ Иигэжэ бүхы наһаараа Таниие магтахаб, гараа һунган, Танай нэрые дуудахаб.

⁶ Амтатай эдеэ эдиһэндэл сэдьхэлни, амамни баяртай дуугаар Таниие магтана.

⁷ Би орондоо Таниие һанахадаа, бүхэли һүни Тан тухай бодоноб.

⁸ Юуб гэбэл, Та – минии туһаламжа, дали жэгүүр доротнай баясан дууланаб.

⁹ Сэдьхэлни Танда няалданхай, зүб гартнай намайе дүнгэнэ.

¹⁰ Харин намайе алахаяа бэдэрэгшэд газарай гүн руу шабагдахал!

¹¹ Һэлмээр тэдэниие сабшан усадхаха, сүүбэн шононуудай хүнэһэн болохо.

¹² Бурхан хааниие баярлуулха. Бурханаар тангариглагша хүн бүхэн баяртай байха, юуб гэбэл, худал хэлэдэг зоной аман таглагдаха.