Псалманууд 59 - Библи

¹ [Дуунай бүлэгэй хүтэлбэрилэгшэдэ: «Найдуулгын сараана» гэдэг аялга. Сээжэлдэхын тула Давидай бэшэһэн шүлэг.

² Араам-Наһарааим болон Араам-Цобаае һамна бута сохиходоо, Ёһаабай бусамсаараа Дабһата хүндыдэ арбан хоёр мянган эдоомуудые усадхахада Давид энээниие зохёогоо бэлэй.]

³ Бурхан, Та маанадые орхёот, һалгаат. Та уурланат. Маанадтаа һөөргөө эрьеыт!

⁴ Та газар хүдэлгөөт, хахалаат. Газар доһолоол! Шархыень эдэгээгыт!

⁵ Хэсүү юумэн юун гээшэб гэжэ арад түмэндөө харуулаат, гай зоболониие зондоо дүүрэн амасуулаат.

⁶ Таниие хүндэлдэг зоной годлинуудһаа зайсахын тула тэмдэг тэдээндэ үгөөт. [Хүгжэм]

⁷ Танда хайратай зоной амиды мэндэ үлэхын тула баруун гараараа тэдэниие абарыт! Маанадта харюу үгыт!

⁸ Бурхан нангин үргөөдөө иигэжэ айладхаа: «Угаа баярлан, Шэхээмые хубаахаб, Суккоот нюруугай газар хэмжэхэб.

⁹ Галаад – Минии, Мэнашшээ – Минии, Эпрааим – толгоймни дуулга, Иуда – Минии баяг.

¹⁰ Моһааб – угаалгын һабамни, Эдоом руу гуталаа шэдэхэб. Пилиштын дээгүүр шангаар хашхархаб!»

¹¹ Хэн намайе бүхэлэгдэһэн хото руу оруулхаб? Хэн намайе Эдоом руу дахуулан абаашахаб?

¹² Бурхан, Та бидэнһээ буруу хараат, сэрэгтэймнай хамта байлдаанда гаранагүйт!

¹³ Хашагдаад байһан үедэмнай туһалыт, зондо найдаха гээшэ худал.

¹⁴ Бурханай туһаламжаар илахабди, Тэрэ дайсадымнай диилэхэ.