Псалманууд 58 - Библи

¹ [Дуунай бүлэгэй хүтэлбэрилэгшэдэ: «Бү усадхыт» гэдэг аялга. Гэрыень һахин гэтэжэ, өөрыень алахаар зониие Саулай эльгээхэ үедэ Давидай бэшэһэн шүлэг.]

² Бурхамни! Дайсадһаамни намайе абарыт! Урдаһаам һөөргэдэн бодогшодһоо намайе аршалыт!

³ Гэм бурууе хэгшэдһээ намайе зайлуулыт! Алууршадһаа абарыт!

⁴ Үзыт, тэдэ минии ами хороохоор отожо байна. Хүсэтэй дайсад урдаһаам сугларжа байна. Харин би ямаршье гэмгүй, нүгэлгүйб, Эзэн!

⁵ Ямаршье гэмгүй намда тэдэ гүйжэ ерэн, урдаһаам добтолхо һанаатайл! Намда туһалхаяа бодыт, харыт!

⁶ Түмэн Сэрэгтэ Эзэн Бурхан, Израилиин Бурхан, бүхы үндэһэтэнүүдые шиидхэхээр бодыт! Гэм буруутай зоной нэгыньшье бү хайрлыт! [Хүгжэм]

⁷ Үдэшэ болоходо, тэдэ һөөргөө бусажа, нохой мэтэ архиржа, хотые тойрон ябана.

⁸ Тэдэ үгэ хэлэхэдээ, һэлмэ аманһаа гаргаһан мэтэ, «Хэн бидэниие шагнахаб даа?» гэжэ һанана.

⁹ Харин Та, Эзэн, тэдэниие наада барижа энеэхэт. Бүхы үндэһэтэдые шоо наадан болгохот.

¹⁰ Минии Хүсэ шадал! Би Тан руу харанаб. Юуб гэбэл, Бурхан минии хорохо газар мүн.

¹¹ Минии Бурхан Өөрын энэрэл хайраар намайе угтан абаха, дайсадайм нюдэ руу айнгүй хараха боломжо намда үгэхэ.

¹² Минии арад түмэнэй мартахагүйн тула тэдэниие бү усадхаарайт. Манай бамбай болохо Эзэн, хүсэ шадалаараа тэдэниие тараагыт, доройхон болгыт.

¹³ Аманһаань нүгэл үгэ гарадаг мүн. Хараал шэрээл, худалайнгаа түлөө тэдэ бардамлахынгаа зангада орожо баригдаг лэ!

¹⁴ Уурлан тэдэниие усадхыт! Тэдэнэй үгы болотор усадхыт! Бурхан Яковые газар дэлхэйн хизаар хүрэтэр зонхилдогые бүгэдэдэ танюулыт! [Хүгжэм]

¹⁵ Дайсад үдэшэ бусажа, нохой мэтэ архиржа, хотые тойрон ябана.

¹⁶ Тэдэ эдеэ хоол бэдэржэ зайна, садангүй бүхэли һүни архирна.

¹⁷ Харин би Танай хүсые магтан дууланаб, эртэ үглөөнһөө энэрэл хайра тухайтнай баяртайгаар тунхаглахаб, юуб гэбэл, Та минии хорохо газар, гай зоболонгойм үдэр аршалалтам байгаа бэлэйт.

¹⁸ Минии Хүсэн! Таниие магтан дуулахаб: «Бурхан – хорохо газарни, Бурхамни намда энэрэл хайрал үзүүлдэг юм»!