Псалманууд 57 - Библи

¹ [Дуунай бүлэгэй хүтэлбэрилэгшэдэ: «Бү усадхыт» гэдэг аялга. Давидай бэшэһэн шүлэг.]

² Удамаршад, таанад үнэхөөр зүб шударгаар хэрэг шиидхэдэг гүт? Үнэн зүбөөр зониие шүүбэрилдэг юм гүт?

³ Таанад зүб шударга бэшые һанаандаа түсэблэнэт, газар дэлхэй дээрэ гараараа хэһэн муу муухайгаа шэгнэнэт.

⁴ Хорото муу зон түрэхэһөө эхилээд, гажуу ябадалтай, худалшад эхын хэбэлһээ эхилэн төөридэг.

⁵ Тэдэ могойн хорондол адли хоротой, тэдэ шэхээ бүтүүлһэн дүлии нажа могойтой адли.

⁶ Иигэжэ тэдэ тарни шадамар уншагша шэдитэнэй дуу хоолойе шагнадаггүй юм.

⁷ Бурхан! Тэдэнэй амандахи шүдые түүрэ сохиит! Эзэн! Арсалангуудай үрүүе хухалыт!

⁸ Тэдэниие урдажа байгаа уһандал урдахуулан ябуулыт! Һурша номоо татажа байхадань, годлиинь хухарһан мэтэ болгыт!

⁹ Тэдэниие ябаха үедээ хайлан үгы болодог эмэ хумһан мэтэ болгыт! Нара хэзээшье үзэхэгүй дутуу түрэһэн хүүгэн мэтэ болгыт!

¹⁰ Юу тэдэнтэй болоһые тэдэ ойлгожошье үрдихэгүй. Үүргэнэ, адаалхай мэтэ, хог ногоон, хуурай үбһэн мэтэ тэдэниие хуй һалхин үлеэн абаашахал!

¹¹ Тэдэнтэй юу болоһые харахадаа, зүб шударга хүн баярлаха, хорото муу хүнэй шуһанда хүлөө угааха.

¹² «Үнэхээр зүб шударга хүндэ шагнал байдаг! Үнэхээр газар дэлхэй дээрэ зарга шүүгшэ Бурхан бии!» гэжэ зон хэлэхэ.