Псалманууд 56 - Библи

¹ [Дуунай бүлэгэй хүтэлбэрилэгшэдэ: «Бү усадхыт» гэһэн аялга. Саулһаа тэрьедэжэ, агы руу гүйжэ ябахадаа Давидай зохёон бэшэһэн шүлэг.]

² Намайе үршөөгыт, Бурхан, намайе үршөөгыт. Юуб гэбэл, сэдьхэлни хорохо газараа Танай дотор лэ бэдэрдэг. Тодхорой үнгэртэр Танайл дали доро хоргодогшоб.

³ Дээдэ Бурханда, намда һайе хэдэг Бурханда, хандан хашхарнаб.

⁴ Тэрэ тэнгэриһээ намда туһа эльгээжэ, намайе абарха. Тэрэ намайе залгихаа забдагшадые мохоохо! [Хүгжэм] Бурхан хайра энэрэлээ болон үнэнөө эльгээхэл!

⁵ Арьяатанай дунда ажаһуунаб. Бэе бэеэ залгихаар бэлэн зоной дунда хэбтэнэб. Тэдэнэй шүдэн жада ба годлинууд, хэлэнь – хурса һэлмэ мүн.

⁶ Бурхан, огторгойһоо дээгүүр үргэмжэлэгдыт, бүхы дэлхэй дээгүүр алдар солотнай нэрьег лэ!

⁷ Тэдэ хүлдэм урьха занга табяа, сэдьхэлни гуниглаад байна. Урдамни нүхэ малтаа, харин өөһэдөө тэрээн руугаа унаа.

⁸ Зүрхэмни Тандаал үнэн сэхэ, зүрхэмни Тандаал үнэн сэхэ. Дуу дуулахаб, магтаал татахаб!

⁹ Сэдьхэлни, һэрииш! Ятага, морин хуур, һэриит! Би үүрэй толониие һэреэхэб.

¹⁰ Эзэн, арадуудай дунда Таниие алдаршуулхаб, бүхы обогуудай дунда Таниие магтан байхаб.

¹¹ Юуб гэбэл, энэрэл хайратнай тэнгэри тулама агууехэ, үнэн сэхэтнай – үүлэ тулама.

¹² Бурхан, тэнгэриһээ дээгүүр үргэмжэлүүлэгдыт! Бүхы дэлхэйгээр алдар солотнай байг лэ!