Псалманууд 55 - Библи

¹ [Дуунай бүлэгэй хүтэлбэрилэгшэдэ: холодо эмэ тагтаагай аниргүй байгаа тухай. Пилиштын зоной Гаадта Давидые бариха үедэ тэрэ энээниие бэшээ бэлэй.]

² Эзэн, намайе хайрлыт! Зон намайе залгихаяа һананал, бүхэли үдэрөө намда добтолон, намайе харшалнал.

³ Дайсадни намайе залгихаар бүхэлиин үдэр бэдэрнэ. Юуб гэбэл, урдаһаам бардамлан добтологшо тэдэ олуулаа юм.

⁴ Айжа байхадаа би Тандал найданаб.

⁵ Бурхандал найданаб, үгыень магтан байнаб, айнагүйб. Хүн намда юу хэжэ шадаха юм?

⁶ Бүхэли үдэрөө тэдэ үгыем ондоо болгоно, намда муу юумэ хэхэеэ һанаашална.

⁷ Добтолхоор бэлдэн тэдэ маряана, Ами наһыем абахаяа алхам бүхэниием ажаглан байна.

⁸ Хорон муугайнгаа түлөө тэдэ харюусахагүй юм аал? Хилэнсэглэн, Бурхан, зониие номгодходог бэлэйлта!

⁹ Минии зоболон тушаа Та мэдэхэгүй юм гүт? Сурхирса уйлахым дууланагүй юм гүт? Ном соотнай минии зоболон бэшэгдээгүй юм гү?

¹⁰ Бурханиие дуудаһан үдэртэм дайсадни һөөргөө сухарина, Бурхан минии түлөө гэжэ энээнһээ ойлгоноб.

¹¹ Үгыень магтадаг Бурхандаа, үгыень магтадаг Эзэндээ,

¹² Бурхандаа найданаб, айнагүйб. Хүн намда юу хэжэ шадахаб даа?

¹³ Бурхан, тангаригаа бэелүүлхэб, Танда магтаал үргэхэб.

¹⁴ Юуб гэбэл, Та намайе үхэлһөө абараат, мүн хүлыем бүдэрхэһөө һэргылээт, Танай, Бурханай, урда, амиды юумэ гэгээрүүлэгшэ Гэрэлэй урда, ябахымни тула!