Псалманууд 54 - Библи

¹ [Дуунай бүлэгэй хүтэлбэрилэгшэдэ: хүбшэргэйтэ зэмсэгэй дууряалга доро. Давидай зохёоһон ирагуу үгэнүүд.]

² Бурхан, зальбаралым соносыт, гуйхадамни, саашаа бү харыт.

³ Намайе анхаран дуулажа, харюусыт. Би тодхор соогоо шаналан, ёолон байнаб.

⁴ Энэ дайсанай дуу хоолойһоо, хорото муу хүнэй дарлалтаһаа мүн. Ушарынь гэбэл, тэдэ хээгүй юумым нам дээр тохоно, уурлан намайе үзэн ядана.

⁵ Досоомни зүрхэм доһолжо, үхэлтэ аймшаг намайе бажуугаал.

⁶ Айдаһан, шэшэрээндэ абтажа, яахаяашье мэдэнэгүйб.

⁷ «Тагтаа мэтэ жэгүүртэй байха байгааб! Ниидэн ошожо, амарха һэм.

⁸ Харагты даа, холын холо руу ябажа, сүл губида байрлаха һэм.

⁹ Хуй һалхи, шуурганһаа хорохо газар руу яаран ошохо бэлэйб», – гээб.

¹⁰ Эзэн, тэдэнэй дунда худхаляа үймүүлыт, хэлэнүүдыень худхалдуулыт. Юуб гэбэл, хотодо хүсэрхэл, эбгүй байдал обёоржо байнаб.

¹¹ Тэдэ үдэр, һүнигүй хэрэм хана дээгүүрнь тойроод ябана, досоонь буруу ябадал, гай тодхор!

¹² Хотын дунда үхэл хатал, хара худал болон мэхэ гудамжануудһаань һаланагүй.

¹³ Ушарынь гэбэл, энэ хадаа дайсамни намайе доромжолно бэшэ, тиигээ һаань, би тэсэхэ һэм. Намайе үзэн ядагша дээгүүрни өөрыгөө үргэнэ бэшэ, тиигээ һаань, би тэрээнһээ хорохо байгааб.

¹⁴ Харин ши, намтай адли ши, минии анда нүхэр, дүтын хүмни!

¹⁵ Хамта һайхан зугаа дэлгэжэ, Бурханай нангин үргөө руу хамта ябагша бэлэйлди…

¹⁶ Дайсад дээр үхэл гэнтэ бууг лэ! Үхэлэй орон руу тэдэ амидыгаар ошог! Юуб гэбэл, байра соонь, тэдэнэй дунда муу муухай оршонол.

¹⁷ Бурханиие дуудахадам, Эзэн намайе абарха.

¹⁸ Үглөө, үдын тэнгээршье гуйн хашхархаб, Тэрэ минии дуу хоолойе дуулаха.

¹⁹ Дайсадай хэды олон байгаашье һаань, минии урдаһаа бодогшодһоо намайе абархал.

²⁰ Хэтын хэтэһээ шэрээ дээрэ заларагша Бурхан соносожо, тэдэниие номгоруулха. [Хүгжэм] Юуб гэбэл, тэдэ өөһэдөө зоргоороо юумэ хэдэг, Бурханһаа айдаггүй.

²¹ Өөһэдтэйнь энхэ тайбан байгаашадай урдаһаа гараа далайжа, тэдэ хэлсээгээ эбдээ.

²² Яряа хүүрынь сүсэгыһээ нялуун, харин һанаандань – дайлал. Үгэнүүдынь тоһонһоошье зөөлэн, харин һугалһан бэлэн һэлмэ мэтэл!

²³ Ашаагаа Эзэндэ даалга, Тэрэ шамайе дүнгэхэ, зүб шударга хүниие Тэрэ хэзээдэшье гунхуулхагүй!

²⁴ Бурхан, Та дайсадые үхэлэй нүхэн руу унагаахат, шуһаар жүрөөдэгшэ, мэхэшэ зон наһанайнгаа хахадыньшье эдлэхэгүй. Харин би Тандаал этигэнэб.