Псалманууд 50 - Библи

¹ [Дуунай бүлэгэй хүтэлбэрилэгшэдэ: Давидай псалма.

² Давидай Бат-Шээбэтэй унтаһанай дараа лүндэншэ Натаан тэрээн руу ерээ һэн, тиихэдэ Давид энээниие зохёогоо бэлэй.]

³ Бурхан, энэрэл хайраараа Та намайе хайрлыт! Үршөөл ехэтэй Та алдуу эндүүем арилгыт!

⁴ Гэм бурууһаам намайе һайса угаажа, нүгэлһөөм намайе сэбэрлыт!

⁵ Юуб гэбэл, би алдуутайгаа мэдэнэм, нүгэлни ходо урдам байна.

⁶ Танай урдаһаа, гансал Танай урдаһаа нүгэл үйлэдөөб, Танай нюдэнэй урда бузар мууе хээб. Тиимэһээ Та шиидхэбэреэ айладахадаа тон зүбта, зарга шүүбэритнай зүб шударга.

⁷ Харыт даа, гэм буруугай дунда би түрөөб, нүгэл соо эхэмни намайе оложо тээгээ.

⁸ Харин Та сэдьхэлэйнгээ гүндэ үнэн байхые хүсэдэгта, Өөрын сэсэн мэргэн ухаае намда үзүүлээт.

⁹ Минии нүгэлые эсообоор арюудхыт, арюун болохоб, намайе угаагыт, сэбэр болохоб.

¹⁰ Баярай, хүхилдөөнэй абяа дууе намда соносуулыт, Өөрын хухалһан яһые Та баясуулыт.

¹¹ Нүгэлһөөм толгойгоо хазагайруулыт, минии бүхы гэм бурууе арилгыт.

¹² Бурхан, досоомни сэбэр сэдьхэл түхөөгыт, досоомни үнэн сэхэ һүлдэ шэнэлыт.

¹³ Өөрын хажууһаа намайе бү үлдыт, Өөрын Нангин Һүлдые намһаа бү абыт.

¹⁴ Танаар абарагдаха баяр намда һэргээгыт, хүсэлэнтэ Һүлдөөр намайе тэдхыт.

¹⁵ Гэм буруутай зондо Танай харгы зам заахаб, нүгэлтэйшүүл Тан руу эрьехэл.

¹⁶ Бурхан, абаралайм Бурхан, намайе шуһата табиланһаа абарыт! Хэлэмни Танай зүб шударгые баяртай магтахал.

¹⁷ Эзэн, минии амые нээгыт! Амамни Таниие магтахал.

¹⁸ Үргэхэ һэм, харин Та үргэл хүсэнэгүйт, түгэс шатаалта үргэл Танда таалагданагүй.

¹⁹ Бурханда үргэхэ үргэл хадаа гэмэлтэһэн һүлдэ мүн, гэмэлтэһэн сэдьхэлые Бурхан буруушаахагүй.

²⁰ Өөрын дураар Сиондо һайе үйлэдыт, Иерусалимай хэрэм барижа бодхоогыт.

²¹ Тиигээд Та зүб шударга болохын тула үргэл – түгэс шатаалта үргэл, бүтэн шатаалта үргэл – хүсэн абахат. Тиихэдэ үргэлэй шэрээ дээрэтнай залуу буханууд үргэгдэхэ.