Псалманууд 49 - Библи

1 [Асаапай псалма.]

¹ [Асаапай псалма.] Бурханай Эзэн Бурхан айладан, наранай мандаха зүгһөө жаргаха зүг хүрэтэрнь бүхы газар дэлхэйе дуудана.

² Үзэсхэлэн һайханай эгээл дээдэнь болохо Сионһоо Бурхан Өөрыгөө харуулан заларна.

³ Бурхамнай заларна! Тэрэ абяа шэмээгүй бэшэ. Урдань гал бушаганана, тойроод – һалхи шуурган.

⁴ Өөрын арад түмэниие шүүхын тула Тэрэ дээдэ тэнгэриие болон газар дэлхэйе дуудана:

⁵ «Минии үнэн зониие Нам руу суглуулагты! Тэдэ үргэлэй аргаар Намтай хэлсээ баталһан юм».

⁶ Тэнгэри Тэрэнэй зүб шударгые тунхаглана, юуб гэхэдэ, Бурхан Өөрөө шүүгшэ мүн. [Хүгжэм]

⁷ – Арад зомни, намайе шагнагты, Би айладахам! Израиль, Би шинии урдаһаа гэршэлэн гэмнэхэб, Би хадаа Бурхан, шинии Бурхан мүн.

⁸ Үргэлнүүдһээш боложо шамайе зэмэлхэгүйб, түгэс шатаалта үргэлнүүдшни хододоо урдамни байна.

⁹ Би шамһаа залуу бухыешье, хашааһааш хусыешье абахагүйб.

¹⁰ Юуб гэбэл, ойн бүхы амитад, мянгаад толгойдо бэлшэгшэ мал – Минии.

¹¹ Хада уулын шубуу бүхэниие мэдэдэгби, хээрэ талын амитад бултадаа Минии.

¹² Би үлдэжэ байгаашье һаа, шамда айладахагүй һэм, юуб гэбэл, дэлхэй болон тэрэниие дүүргэгшэ бүхэн – Минии.

¹³ Би бухануудай мяха эдидэг, хусануудай шуһа уудаг юм гүб?!

¹⁴ Би Дээдэ Бурхан мүн! Гансал Намда Талархалай үргэл үргэ болон Намда амалһанаа бэелүүл!

¹⁵ Зоболонто үдэртэ намайе дуудахадашни Би шамайе абархаб, ши Намайе хүндэлэн алдаршуулхаш.

¹⁶ Харин хорото муу хүндэ Бурхан иигэжэ айладаха: Минии хуули ёһонуудым зарлан, хэлсээем амандаа юундэ байлганаш?

¹⁷ Өөрөө заабариим үзэн ядана, үгэнүүдым тооногүй бшууш!

¹⁸ Хулгайшаниие харахадаа баярланаш, забхайрагшадтай нэгэдэнэш.

¹⁹ Аманшни бузар мууе хэлэнэ. Хэлэншни мэхэ гохо зохёоно.

²⁰ Һуугаад, аха дүүгээ муулан дуугарнаш, эхынгээ хүбүүе худалаар хардажа байнаш.

²¹ Шинии энээниие хэхэдэ, Би аниргүй байгааб. Ши Намайе өөртэйгөө адляар бодоош. Үгы, шамайе гэмнэжэ, бурууеш элирүүлэн харуулхаб.

²² Намайе мартагшад, энээн тухай бодогты. Үгы һаатнай, таһа татажа хаяхаб, абарха хэншье байхагүй.

²³ Талархалай үргэл үргэгшэ нэгэн Намайе хүндэлнэ, үйлэ хэрэгээ заһан-сахин байгаашада Би, Бурхан, абарал үршөөхэб.