Псалманууд 48 - Библи

¹ [Дуунай бүлэгэй хүтэлбэрилэгшэдэ: Коорахай уг удамай зохёоһон. Псалма.]

² Бүхы арадууд, шагныта! Газар дэлхэйн бии оршогшод, анхарыт,

³ юрын болон онсошье зон, баян, үгытэйшье хамтадаа!

⁴ Минии аман сэсэн мэргэн үгэ хэлэхэ, минии ухаанай бисалгал ойлгоходо туһалха.

⁵ Һургаал үгэдэ шэхээ табихаб, удхыень бүтүүлэн хэлэһэнээ ятагын дууряалгаар тайлахаб.

⁶ Гэм буруу тойроод байхада, зобохо зүдэрхэ үдэртөө би юунһээ айхабиб?

⁷ Өөһэдын хүсэ шадалда найдажа, элбэг-дэлбэг баялигаараа һайрхагша таанад,

⁸ ямаршье хүн ямаршье аргаар аха дүүгээ абаржа шадахагүй, тэрэнэй түлөө түлбэри Бурханда үгэжэ шадахагүйл.

⁹ Түлбэринь угаа ехэ! Мүнхэдөө түлэбэшье, барашагүй,

¹⁰ хэтэдээ хэн нэгэнэй амидархын тула, хүүр булашаа харахагүйн тула.

¹¹ Сэсэн мэргэн зоншье мунхаг, тэнэг зондол үхэнэ, хосорно, ондоо зондо баялигаа орхино гэжэ таанад харанат.

¹² Тэдэ досоогоо «гэрнүүднай мүнхэ, оршохо газарнай үеһөө үедэ манай байха» гэжэ бододог. Газар уһаяа тэдэ өөһэдын нэрээр нэрлээл.

¹³ Харин хүн хүндэлүүлжэ хододоо байхагүй, үхэдэг амитадтал адлил.

¹⁴ Иимэл даа, мунхаг зондо найдагшадай, ухаагүй зоной үгэдэ этигэгшэдэй харгы зам! [Хүгжэм]

¹⁵ Тэдэ хонидтол Үхэлэй орон руу туугдан оруулагдаха, Үхэл тэдэнэй хонишон болохо, үнэн сэхэ зон үглөө тэдэниие захирха, бэень шалзаран һалаха, хүүр гэрынь болохо.

¹⁶ Харин Бурхан намайе абажа, Үхэлэй оронһоо абарха. [Хүгжэм]

¹⁷ Хүнэй баян боложо, гэр оронойнь эд зөөриин олошорхо үедэ бү айгаарай.

¹⁸ Юуб гэбэл, үхэхэдөө, тэрэ юушье абаад ябахагүй, алдар солоньшье хойноһоонь дахан ошохо бэшэ.

¹⁹ Юуб гэхэдэ, амиды байхадань баяр хүргэбэшье, тэниглэн байхадаш бусад шамайе магтадаг шуу –

²⁰ гэрэл хэзээшье харахагүй элинсэг хулинсагтаа тэрэ заабол ошохол.

²¹ Агууехээр хүндэлэгдэбэшье, ухаагүй хүн хадаа үхэхэ табилантай адагуусандал адли мүн.