Псалманууд 44 - Библи

¹ [Дуунай бүлэгые хүтэлбэрилэгшэдэ: «Сараана» гэдэг аялга. Коорахай уг удамай ирагуу үгэнүүд, инаг дуранай дуун.]

² Гоё һайхан үгэнүүд досоомни дүүрэн байна, дуугаа хаанда зорюулнаб. Минии хэлэн шадамар зохёолшын гуурһан мэтэ.

³ Зоной дундаһаа ши эгээл гоё һайханши, нигүүлэсхы үгэнүүдые хэлэдэгши. Тиимэһээ Бурхан хэтэ мүнхэдөө шамайе үреэгөө.

⁴ Хүсэтэ хаан, һэлмэеэ ташаандаа зүүгыш, алдар солотойш, һүр жабхалантайш.

⁵ Үнэн зүбэй, номхоной, зүб шударгын түлөө мордожо, урагшаа соёрыш! Гаршни илалта туйлахал!

⁶ Годлинуудшни хурса, урдашни арадууд унан һүгэдэхэл, хаанай дайсад зоригоо мохохо.

⁷ Хан шэрээшни Бурханай шэрээ мэтэ, хэтэ мүнхэдөө оршохо. Хаанта баягшни – зүб шударга ёһын баяг.

⁸ Ши үнэн зүбтэ дуратайш, муу юумэ үзэн яданаш. Энээнэй түлөө Бурхан, шинии Бурхан, хажуудашни байгаа хэнииешье баярай тоһоор тоһодоогүй, харин гансал шамайе тоһодон ёһолоол!

⁹ Бүхы хубсаһаншни гүгэл, зуун наһатын болон кассиягай үнэртэй. Заанай яһан ордонһоо гарагша хүбшэргэйтэ зэмсэгүүдэй хүгжэм шамайе баясуулна.

¹⁰ Хаашуулай басагад шинии хүреэлэнгэй дунда. Баруун гар таладашни Опиирой эрхим алтаар шэмэглэгдэнхэй хатан зогсоно.

¹¹ Шагнаарай, охин, харан, анхаралтай соносоорой, өөрын арад түмэниие болон эсэгынгээ гэрые мартаарай.

¹² Шинии гоо һайханда хаан татагдаха, тэрэ шинии эзэн мүн, тиимэһээ тэрээндэ һүгэдэн байгаарай.

¹³ Тиир хотын зон танда бэлэг асарха, эгээл баян зон танай хайра хэшэг гуйн байха.

¹⁴ Хаанай басаган ордон соогоо сог жабхалантай, хубсаһа хунарынь алтаар шэмэглэгдэнхэй.

¹⁵ Хээтэй хубсаһа үмдэһэн тэрэниие хаанда дүтэлүүлэн асарна, тэрээнэй нүхэд басагадые хойноһоонь дахуулан хаанда абаашана.

¹⁶ Тэдэ баяр баясхалантайгаар дүтэлжэ, хаанай ордондо ороно.

¹⁷ Уг удамтнай элинсэгүүдэйнгээ һуури эзэлхэ, бүхы дэлхэйдэ ноёдоор тэдэниие табихаш.

¹⁸ Нэрыешни үеын үедэ дурдан, һануулан байхаб. Тиимэһээ арадууд хэтэ мүнхэдөө шамда магтаал үргэн байха.