Псалманууд 43 - Библи

¹ [Дуунай бүлэгэй хүтэлбэрилэгшэдэ: Коорахай уг удамай ирагуу үгэнүүд.]

² Бидэ үбгэ эсэгэнэрэймнай үедэ, тэрэ холын сагта, Танай юу хэһые эсэгэнэрһээ өөрын шэхээр дуулаа бэлэйлди.

³ Ондоо арадуудые Та Өөрын гараар усадхаат, харин үбгэ эсэгэнэрымнай сэсэрлиг мэтээр һуулгаат, бусад обогуудые һамна бута сохёот, тэрэ газарһаа үлдөөт.

⁴ Тэдэ һэлмээрээ газар нютаг эзэлээ бэшэ, хүсэтэй байһань илалта туйлуулаа бэшэ, харин Танай гар, хүсэ шадалтнай, Танай шарайн гэрэл туяа! Юуб гэбэл, Та тэдээндэ онсо һайнаар хандадаг бэлэйт.

⁵ Бурхан, Та болбол минии Хаан! Захиржа, Яковта абарал эльгыт!

⁶ Тантай хамта бидэ, буханууд мэтэ, дайсадаа эбэрээрээ мүргэхэбди, урдаһаамнай буһалгаалагшадые Танай нэрээр гэшхэхэбди.

⁷ Өөрынгөө һурша номдо найданагүйб, һэлмэмни намайе абархагүй,

⁸ харин Та маанадые дайсадһаамнай абараат, маанадые үзэн ядагшадые эшхэбтэр байдалда оруулаат.

⁹ Бүхэлиин үдэр Бурханиие магтан байнабди, хэтэ мүнхэдөө Танай нэрые алдаршуулнабди! [Хүгжэм]

¹⁰ Гэбэшье юундэ Та маанадые орхижо, эшхэбтэр байдалда оруулаад, сэрэгтэймнай хамта дабхинагүйбта?

¹¹ Маанадые дайсадаймнай урда зугадуулаат, маанадые үзэн ядагшад бидэниие дээрмэдэжэ байнал.

¹² Та бидэниие эдишын хонид мэтээр үгөөт, маанадые улас үндэһэтэнүүдэй дунда тараагаат.

¹³ Өөрын арадые үнэгүйгөөр худалдаат, худалдаһанһаа ямаршье ашаг олзо олоогүйт.

¹⁴ Та маанадые хүршэнүүдэймнай наадалал, доромжолол, аашада дамжуулаат.

¹⁵ Та маанадые улас үндэһэтэнүүдэй дунда хэлсэхэ зүйл болгоот, бүхы арадууд маанад руу заажа байнал.

¹⁶ Минии доромжолол бүхэли үдэрөө урдамни, эшэһэмни нюуртам харагдана.

¹⁷ Намайе буруушааха, зэмлэхэ абяан, дайсанай болон үһөөгөө абагшын хараса!

¹⁸ Эдэ бүгэдэ бидэнтэй тохёолдоһоншье һаань, Таниие мартаагүйбди, Тантай баталһан хэлсээгээ эбдээгүйбди.

¹⁹ Гэдэргээ ябаагүйбди, Танай замһаа хадуураагүйбди.

²⁰ Гэбэшье Та сүүбэн шонын газарта маанадые ниса дараат, үхэлэй харанхыгаар бидэниие хушаат.

²¹ Хэрбээ бидэ Бурханайнгаа нэрэ мартажа, хариин бурханда зальбараа гээшэ һаамнай,

²² энэ Бурханһаа нюуса байха юм аал? Сэдьхэлдэ юу байһые Тэрэ мэдэнэ бшуу!

²³ Танай түлөө бидэниие үдэр бүри алана, үүсэлэн гаргуулха хонид мэтэ болообди.

²⁴ Эзэн, бодыт! Юундэ унтажа байнабта! Һэриит, маанадые хэтэ мүнхэ бү орхиит!

²⁵ Юундэ Та нюураа бүглэжэ, бидэнэй зоболон, доройдолые харанагүйбта?

²⁶ Амидаралнай тооһо шоройдо хаягданхай, бэемнай газарта няалданхай.

²⁷ Бодыт, бидэндэ туһалыт! Энэрэл хайраяа бидэндэ үзүүлжэ, абарыт!