Псалманууд 39 - Библи

¹ [Дуунай бүлэгэй хүтэлбэрилэгшэдэ: Давидай псалма.]

² Би Эзэндэ ехэ найдан хүлеэгөөб, Тэрэ нам руу дүтэлжэ, хашхархыем дуулаал.

³ Тэрэ намайе аймшагтай нүхэнһөө, шабар шабхаһаа татан гаргаа. Алхамым бата болгон, хүлымни хабсагай дээрэ табяа.

⁴ Тэрэ минии аманда шэнэ дуу – манай Бурханда магтаалай дуу оруулаа. Олон хүн хараад, айха, Эзэндэ этигэхэ.

⁵ Эзэндэ этигэдэг, бардамлагшад руу эрьедэггүй, худал руу хазайдаггүй хүн үнэн шударга!

⁶ Эзэн Бурхамнай! Хэды олон юумэ бүтээгээ гээшэбта! Хэды олон гайхамшагта хэрэгүүдые маанад тушаа түсэблөөт, хэниишье Тантай сасуулмаар бэшэ. Би тэрэ гайхамшагта үйлэнүүдые олондо зарлан хэлэхэб, гэбэшье тэдэ тоолошогүй олон юм.

⁷ Үргэл болон бэлэгүүдые хүсэнэгүйт, түгэс шатаалта үргэл болон нүгэл сагааруулгын үргэл үргэхые зандараагүйт. Таниие дуулахаар болгон шэхыем нээгээт.

⁸ Тиигээд би: «Харыт, би ерээб. Нам тушаа хуйламал ном соо бэшээтэй.

⁹ Бурхамни, Танай хүсэл бэелүүлхэ һанаатайб, һургаалтнай сэдьхэлдэм байна» гэжэ хэлээб.

¹⁰ Зүб шударгые агууехэ хурал дээрэ тунхаглааб, харыт, уралаа жэмыгээд байгаагүйб. Эзэн, Та мэдэнэт!

¹¹ Зүб шударгыетнай досоогоо нюужа байгаагүйб, Танай үнэншые, абардагыетнай тунхаглааб. Үргэн суглаанай урда Танай энэрэл хайрые, Танай үнэниие нюужа байбагүйб.

¹² Эзэн, үршөөлөө намһаа бү хаһыт! Энэрэл хайратнай, үнэнтнай намайе үргэлжэ хамгаалжа байг лэ!

¹³ Юуб гэбэл, тоо томшогүй муу юумэн намайе тойроод байна. Хаража шадахагүй болотороо гэм буруудаа баригдааб. Толгойм үһэнһөө тэдэ олон, зоригни мохоод байна.

¹⁴ Эзэн, һайн боложо, намайе абарыт! Эзэн, намда туһалхаар яарыт!

¹⁵ Намайе алахаяа һанагшад бултадаа эшхэбтэр муухайда унажа, доромжолуулагдаг лэ! Намда мууе хүсэгшэд доромжолуулагдан, һөөргэлэг!

¹⁶ Намда «Ха, ха!» гэгшэд эшхэбтэр байдалда орон, буруу хараг!

¹⁷ Харин Тан руу эрмэлзэгшэ бүхы зон баясан, баярлан байг! Абарагшадаа дуратайшуул «Эзэн агууехэ!» гэжэ хододоо хэлэн байг!

¹⁸ Би үгытэй, ядууб, гэбэшье Эзэн нам тушаа һанаагаа табина. Та хадаа минии туһалагша, минии абарагша мүн, тиимэһээ, Бурхамни, бү удаарыт!