Псалманууд 38 - Библи

¹ [Дуунай бүлэгэй хүтэлбэрилэгшэдэ, Едүтүүндэ. Давидай псалма.]

² «Би хэлээрээ нүгэл хэхэгүйн тула зам мүрөө сахихам. Хорон муу хүнэй урдамни байха зуура амаа хазаарлахам» гэжэ хэлээб.

³ Би аниргүй, үгэ дуугүй байгааб, һайешье дуугараагүйб, зоболомни бүри ехэ боложо байгаа.

⁴ Досоогоо гал дүрэлзэхые мэдэрбэб, гүн ухаандам гал нособо, тиихэдэнь би дуугаржа эхилбэб.

⁵ Эзэн, наһанайм эсэс хэзээ гээшэб, хэды үдэр үшөө үлөөб, хэды наһа наһалха гээшэбиб гэжэ намда мэдүүлыт.

⁶ Харыт, Та минии үдэрнүүдые тоолон хэмжээт. Минии наһан Танай урда юуншье бэшэ. Үнэндээ хүн бүхэнэй наһан нэгэ дахин амяа абаха агшам юм. [Хүгжэм]

⁷ Үнэндээ хүн һүүдэр мэтэ ябана, дэмы юумэндэ оролдодог, суглуулдаг, харин хэндэ суглуулһанаа мэдэхэгүй.

⁸ Мүнөө би юу хүлеэхэ гээшэбиб, Эзэмни? Минии найдал – Тандаа.

⁹ Гэм бурууһаам намайе зайлуулыт, тэнэг зоноор намайе бү зэмэлүүлыт.

¹⁰ Танай энэниие хэһэн ушарһаа би хэлэгүй болооб, амаа нээнэгүйб.

¹¹ Өөрын хэһээлтэһээ намайе зайлуулыт, гарайтнай сохилто доро үгы болонолби.

¹² Гэмэйнь түлөө зэмэлэн, Та хүниие хэһээнэт, арюун юумэнь хибэндэл адли һалаха. Үнэн дээрээ хүн бүхэн нэгэ амисхал юм. [Хүгжэм]

¹³ Эзэн, минии зальбаралые дуулыт, минии хашхархада, шэхээ табиит. Нулимсыем үзэн, абяагүй бү байгыт. Би Танда ерүүл хүн, үбгэ эсэгэнэртээл адли, богонихон хугасаада Танай гэртэ би айлшан мүн.

¹⁴ Мордожо ошохым, үгы болохым урда тээ түр зуурашье һаа, баяр үзэхым тула намайе бү хэһээгыт!