Псалманууд 37 - Библи

¹ [Давидай псалма. Мартахагүйн тула шангаар.]

² Эзэн, уур хилэн соогоо намайе бү зэмэлыт, уур сухал соогоо намайе бү хэһээгыт.

³ Юуб гэхэдэ, годлинуудтнай намайе нэбтэ харбаа, гартнай намайе доошоо дарана.

⁴ Танай хилэнһээ боложо, бэедэм элүүр газар үгы, нүгэлһөөм боложо, яһамни үбдэнэ.

⁵ Юуб гэбэл, минии гэм буруу намайе толгойтойм хушаа, хүндэ ашааень би даажа шадахагүйб.

⁶ Минии толгой муутайһаа шархануудни эдеэртэжэ, муухай үнэртэй болоо.

⁷ Би бүхыгөөб, угаа доошоо тонгойгооб, бүхэлиин үдэр гай гасалантай ябанам.

⁸ Юуб гэбэл, бэемни халууржа байна, бэедэм элүүр газар үгы.

⁹ Би һуларааб, угаа доройтооб, сэдьхэлэй шаналалһаа боложо ёолоноб.

¹⁰ Эзэн Бурхамнай, бүхы хүсэлыем Та мэдэнэт, һанаа алдахам Танһаа нюуса бэшэ.

¹¹ Зүрхэмни һалганана, хүсэгүй болооб, нюдэндэм гэрэлшье харагдахаа болёо.

¹² Минии анда нүхэд, танилнуудни хамшагһаамни зайлан байна, түрэл гарални холодон зогсоно.

¹³ Намайе алахаяа һанаашад урьха занга табина, намда мууе хүсэгшэд минии эсэс тушаа ярилдана, мэхэ гохо хэхэ тухай бүхэлиин үдэрөө хэлсэнэ.

¹⁴ Харин би дүлии мэтэ дууланагүйб, хэлэгүй хүн мэтэ амаа нээнэгүйб.

¹⁵ Огто дуулахагүй, харюусажа шадахагүй хүн шэнги болооб.

¹⁶ Эзэн, Тандаал найданаб, Эзэн Бурхамнай, Та харюусахат.

¹⁷ Юуб гэхэдэ, «Буруу гэшхэхэдэм, өөһэдыгөө намһаа дээгүүр тоолодог тэдэ бү баярлаг лэ!» гэжэ хэлээб.

¹⁸ Мэнэ-мэнэ унахаа байнам. Үбшэмни хододоо намтай.

¹⁹ Гэм буруугаа мэдэрнэм. Нүгэл тухайгаа сэдьхэлээ зобоон байнам.

²⁰ Харин дайсадни амиды мэндэ, хүсэтэй болоно, ямаршье шалтаггүй намайе үзэн ядагшад олошорно.

²¹ Һайн руу эрмэлзэдэг туламни туһые уһаар харюулдаг зон урдаһаам тулана.

²² Эзэн Бурхамни, намайе бү орхиит, намһаа бү холодыт!

²³ Абарални, Эзэмни, яаран намда туһалыт!