Псалманууд 35 - Библи

¹ [Дуунай бүлэгэй хүтэлбэрилэгшэдэ: Эзэнэй зараса Давид зохёогоо.]

² Муу хүн нүгэлдэ дуратай, тэрэнь – зүрхэн соонь, харин Бурханһаа айха гээшэ тэрээндэ байхагүй.

³ Юуб гэхэдэ, өөрын гэм бэдэрэн, үзэн ядан байһан мэтээр тэрэ өөрөө өөртөө худалаар хэлэжэ байна.

⁴ Аманһаань гараһан үгэнүүд – хорон муу болон худал, Тэрэ сэсэн ухаан болон һайн үйлэ хэрэгүүд руу эрмэлзэдэггүй.

⁵ Тэрэ орондоо ороод, муу муухай хэрэг түсэблэдэг, буруу зам руу хадууран, бузар муухай хэрэгүүдһээ жэгшэдэггүй.

⁶ Эзэн, энэрэл хайратнай тэнгэри хүрэтэр, үнэншэ этигэлтнай огторгой хүрэтэр лэ!

⁷ Танай зүб шударга агууехэ хада ууланууд мэтэ, Танай үнэн шиидхэбэринүүд гүнзэгы далай мэтэ. Эзэн, Та хүн болон амитадые абаран байнат.

⁸ Бурхан, Танай энэрэл хайра хэды үнэтэй гээшэб! Зон Танай жэгүүрэй һүүдэр доро хородог.

⁹ Тэдэ үргөөгэйтнай баян хэшэгээр садхалан байдаг, тэдэниие Өөрын тааламжатай голһоо ундалуулнат.

¹⁰ Юуб гэбэл, амидаралай эхин Танда бии, Танай гэрэл дорол гэгээн гэрэл үзэдэгбди.

¹¹ Таниие танидаг зондо энэрэл хайраа үршөөгыт, үнэн сэхэ сэдьхэлтэйшүүлдэ зүб шударгаа хүртүүлыт!

¹² Бардамшалха гээшэ намтай бү тохёолдог, муу хүнэй гараар намайе бү зайлуулыт!

¹³ Хорото хэрэгүүдые үйлэдэгшэд тэндэ унаа! Газарта унаад, бодожо шаданагүй.