Псалманууд 32 - Библи

¹ Зүб шударга улад зон, Эзэн тухай баясан хүхилдэн байгты! Сэхэ сэбэр зантай зоной Эзэндэ магтаал үргэхэнь угаа таатай.

² Ятагын ирагуу хүгжэмөөр Эзэндэ талархалаа үргэгты, арбан утаһан морин хуураар Тэрээндэ магтаал дуулагты.

³ Тэрээндэ шэнэ дуу дуулагты, уранаар наадажа, баярай абяа хашхаран байгты!

⁴ Юуб гэхэдэ, Эзэнэй үгэ зүб сэхэ, бүхы хэрэгүүдынь үнэн шударга.

⁵ Тэрэ зүб болон шударга байдалда дуратай, дэлхэй энэрэл хайраарнь дүүрэнхэйл.

⁶ Эзэнэй үгөөр тэнгэри, аманайнь амисхалаар нара, һара, одо мүшэд бултадаа бүтээгдэнхэй.

⁷ Тэрэ далайн уһые уута руу суглуулһандал суглуулаа, гүн уһые суургалан хадагалаа.

⁸ Бүхы дэлхэй Эзэнһээ айн һүрдэн байг, юртэмсын бүхы оршин һуугаашад урдань шэшэрэлдэг лэ!

⁹ Айладахадань, тэрэнь бүтэбэ; захирхадань, бии болобо!

¹⁰ Эзэн арадуудай түсэбые үгы хэдэг, улад зоной зорилгые юуншье бэшэ болгодог.

¹¹ Эзэнэй шиидхэбэри хэтэ мүнхэдөө хубилхагүй, тогтоолынь үеын үедэ байхал.

¹² Бурханиинь Эзэн байгааша арад жаргалтайл! Өөрынь шэлэгшэ арад түмэн – угайнь!

¹³ Эзэн тэнгэриһээ адаглажа, бултыемнай харадаг.

¹⁴ Өөрын байгаа һууриһаа Тэрэ дэлхэйн бүхы оршин һуугаашадые харадаг.

¹⁵ Бултанай оюун ухаа Тэрэ бүтээгээ, бултанай хэрэгүүдые сүм мэдэдэг.

¹⁶ Хүсэтэ олон сэрэгээр абарагдаха хаан гэжэ үгы, агуу хүсөөрөө халхалагдаха баатар гэжэ байхагүй.

¹⁷ Абарха гэжэ мориндо найдаха арга үгы, ямаршье хүсэн зайсуулхагүй.

¹⁸ Харагты, Эзэнэй нюдэд Өөрыень хүндэлдэг, энэрэл хайрадань найдагшад руу ханданхай.

¹⁹ Тэрэ тэдэниие үхэлһөө абарха, үлэсхэлэн хооһон байдалай үедэ амиды үлөөхэ.

²⁰ Бидэнэй сэдьхэл Эзэниие хүсэн хүлеэнэ, Тэрэ хадаа манай туһаламжа болон бамбай мүн.

²¹ Тэрэнэй нангин нэрэдэ этигэдэг ушарһаа манай зүрхэн баярлан байнал.

²² Эзэн, маанадай Танда найдаһанай ёһоор, энэрэл хайратнай бидэнтэй хамта байхань болтогой!