Псалманууд 31 - Библи

1 [Давидай ирагуу үгэнүүд.]

¹ [Давидай ирагуу үгэнүүд.] Гэмынь хүлисэгдэһэн болон нүгэлынь наманшалагдаһан хүнүүд жаргалтай юм!

² Гэмтэй гэжэ Эзэнэй тоолодоггүй, мэхэ гохогүй хүн жаргалтай юм!

³ Юуб гэбэл, гэмээ мэдэрэнгүй дуугүй байхадам, яһамни үйрэн бутаржа, бүхэлиин үдэр хашхардаг бэлэйб.

⁴ Үдэр, һүнигүй гартнай намайе хүндөөр даража, шэмэ шүүһэмни зунай ганда мэтэ хатадаг һэн. [Хүгжэм]

⁵ Би Танда нүгэлөө нюунгүй хэлээб, гэмээ нюужа байгаагүйб; «Гэмээ Эзэндэ дуулгахам» гэжэ хэлээб, тиигээд Та минии гэм зэмые арюудхаат. [Хүгжэм]

⁶ Тиимэһээ үнэн шударга хүн бүхэн Танда гай тодхорой үедэ зальбараг лэ, тиигэбэл, ехэ уһанай үер тэдэндэ хүрэхэгүйл.

⁷ Та бол минии хорохо газар, намайе зоболонһоо аршалнат, Та намайе абараат, иигэжэ тойроод намайе – энээн тушаа баяртай дуун! [Хүгжэм]

⁸ «Би шинии ябаха ёһотой замые заажа үгэхэб, һургахаб, зүблэл үгэхэб, хойноһоош хаража ябахаб.

⁹ Хазаар ногтоор ооһорложо баряагүй һаа, тан руу дүтэлэн ерэдэггүй ухаагүй адуун, али луус шэнги бү бай» гэжэ Эзэн айладхана.

¹⁰ Хорото муу хүндэ зоболон тодхор олон, харин Эзэндэ этигэдэг хүниие хайра дуран хүреэлэн байдаг.

¹¹ Зүб шударга зон Эзэндэ баярлан, баясан байха, сэхэ зантай бүхы зон һайндэрлэхэ!