Псалманууд 30 - Библи

¹ [Дуунай бүлэгэй хүтэлбэрилэгшэдэ: Давидай псалма.]

² Эзэн, би хорохо газар Танһаал бэдэрнэб. Хэзээшье эшхэбтэр байдалда намайе бү оруулыт, зүб шударгаараа намайе абарыт! Намайе дуулыт, зайлуулхаяа шамдыт!

^3-4 Намда хабсагай, аршалалта, намайе абарха найдамтай хэрэм болыт! Та бол минии хабсагай, хэрэмни мүн! Өөрынгөө нэрын тула намайе хүтэлжэ, заажа байгыт!

⁵ Намда гэжэ нюусаар табиһан зангаһаань намайе гаргыт, юуб гэхэдэ, Та минии хамгаалалта мүн.

⁶ Танай мэдэлдэ һүнэһөө ябуулнаб. Үнэн Эзэн Бурхан, намайе абарыт!

⁷ Хооһон шүтээнүүдые хүндэлдэг зониие үзэн ядадагби, би Эзэндэл этигэдэгби!

⁸ Танай хайра энэрэлдэ баярлан, баясан байнам. Юуб гэбэл, Та минии ядарал хараат, сэдьхэлэймни зоболонгые мэдээт.

⁹ Та намайе дайсанай гарта тушаагаагүйт, уужам салуу газар руу намайе гарганат.

¹⁰ Намайе хайрлыт, юуб гэбэл, зобожо байнам, уйдхар гашуудалһаа боложо нюдэдни шэргээ, сэдьхэлни болон бүхы бэемни үбдэнэ.

¹¹ Юуб гэхэдэ, би амидаралаа уйдхар гашуудалтайгаар, он жэлнүүдээ һанаа алдан үнгэрүүлнэб. Хүсэ тэнхээмни зоболонһоом боложо һулараа, яһамни хэбэрэг болошоо.

¹² Бүхы дайсадни, үнгэрхэдөө хүршэнэрнишье, намайе доромжолно. Танилнуудтаа айдаһа түрүүлнэб, гудамжада намайе хараад, тэдэ намһаа зайлана.

¹³ Үхэһэн хүндэл би мартагдааб, хахарһан амһарта мэтэб.

¹⁴ Нам тухай олон зоной хоб жэб дууланаб, һүрдэмөөр аймшиг намайе тойроод байна. Зон минии урдаһаа хамтаран зүблэлдэжэ, намайе алахаар хэлсэжэ байна.

¹⁵ Тандаал найданам, Эзэн! «Минии Бурхан Та мүн!» гэжэ хэлэнэм.

¹⁶ Минии ами наһан – Танай гарта! Дайсадһаам болон харшалагшадһаам намайе абарыт!

¹⁷ Зараса руугаа энеэбхилэн харыт, хайра энэрэлээрээ намайе абарыт.

¹⁸ Таниие дуудаһандаа, Эзэн, бү эшэһүүлби. Хорото муу зон эшэжэ, Үхэлэй орондо дуу аниргүй болог лэ!

¹⁹ Бардамлан, доромжолон, зүб шударга хүнэй урдаһаа муу юумэ хэлээшэдэй худалша аман хатаг лэ!

²⁰ Танһаа түбэгшөөгшэдтэ, Танда найдагшадта хэды һайн һайхан зүйл Та бэлдээбта! Зоной нюдэн дээрэ тэдэниие бэлдээт.

²¹ Та тэдэниие хүнэй мэхэһээ аршалан Өөрөө харууһалнат, хэлэ аманһаа нюуса газарта нюунат.

²² Эзэн, магтагдахатнай болтогой! Минии бүһэлэгдөөд байхада Та Өөрын энэрэл хайрые намда гайхамшагаар харуулаат!

²³ Би хүлгөөд байхадаа «Эзэн намайе харахаяа һананагүй» гэжэ бодожо байгааб. Теэд минии дуудахада, Та зальбаралым дуулаат.

²⁴ Эзэндэ үнэн сэхэ зон, Тэрээндэ дуратай байгты! Эзэн этигэлтэй зониие хамгаалдаг, харин бардамлагшадта харюуень үлүү бусаадаг!

²⁵ Эзэндэ найдагша бүхы зон, шанга болон зоригтой байгты!