Псалманууд 29 - Библи

¹ [Давидай псалма. Эзэнэй нангин үргөө нээлтын баярта дуулаһан дуун.]

² Эзэн, Таниие магтан дууланаб. Та намайе дээшэнь үргэжэ, дайсадтам баярлаха арга үгөөгүйт.

³ Эзэн Бурхамни! Туһа гуйн дуудахадам, Та намайе эдэгээгээт.

⁴ Үхэлэй оронһоо һүнэһым татан гаргаат, нүхэн хүүр руу уруудажа байхадам, намайе амидыруулаат.

⁵ Бурханда үнэн сэхэ зон, Эзэндэ магтаал дуулагты, нангин нэрэдэнь талархал үргэгты.

⁶ Уур хилэнгынь агшан зуурын, энэрэл хайрань бүхы наһанай. Үдэшэ уйлаан байжа болохо, харин үглөө баяр баясхалан болодог.

⁷ Би зохид байдалдаа дашууран, «хэзээшье ганхахагүйб» гээ бэлэйб.

⁸ Эзэн, Та Өөрын эрхээр намайе хада мэтэ бата болгоо бэлэйт. Харин буруу харахадатнай, һүрдэн зобожо байнам.

⁹ Эзэн, Таниие дууданаб. Эзэндээ гуйлта үргэнэб.

¹⁰ Хүүр руу минии уруудабал, шуһандам ямар ашаг үрэ байхаб?! Хүүрэй тооһо шорой Таниие магтаха аал, Танай үнэниие тунхаглаха аал?!

¹¹ Эзэн, дуулажа, намайе хайрлыт! Эзэн, намда туһа болыт!

¹² Та уйлааем хүхюутэй хатар болгон хубилгахат, Гашуудалай хубсаһым тайлахат, баяр наадаар хубсалуулхат.

¹³ Зүрхэмни таһалдангүй Танда магтаал дуулаха. Эзэн Бурхамни! Таниие хэтэ мүнхэдөө магтан байхаб.