Псалманууд 28 - Библи

1 [Давидай псалма.]

¹ [Давидай псалма.] Бурханай Эльгээмэлнүүд, хүндэлһэнөө Эзэндэ мэдүүлэгты! Эзэндэ алдар соло дуудагты, хүсэ шадалынь магтагты!

² Нэрэдэнь хүрэмэ алдар соло Эзэндэ дуулагты, нангин алдарынь үмдөөд, урдань һүгэдэн мүргэгты!

³ Эзэнэй дуу хоолой – уһан дээгүүр, алдарта Бурхан нэернэ, Эзэн – уһанай уудам дээгүүр!

⁴ Эзэнэй дуу хоолой хүсэтэй, Эзэнэй дуу хоолой һүр жабхалантай.

⁵ Эзэнэй дуу хоолой хуша модо унагаадаг, Эзэн Ливаанай хуша модые зомгоол болгодог.

⁶ Ливаанай хадануудые буруу мэтэ, Сириһоон хадые залуу зэрлиг үхэр мэтэ соёргодог.

⁷ Эзэнэй дуу хоолой гал сахин гаргадаг.

⁸ Эзэнэй дуу хоолой сүл губи шэшэрүүлдэг. Эзэн Кадээш сүл губиие шэшэрүүлдэг.

⁹ Эзэнэй дуу хоолойһоо һогоон тугалладаг, ой модон нюсэгэртэрөө хуу татагдадаг. Нангин үргөөнь Өөртэнь соло магтаалаар дүүрэнхэй.

¹⁰ Эзэн үерэй уһан дээрэ оршоно, хэтэ мүнхэдөө Тэрэ хаан шэрээдэ һууна.

¹¹ Эзэн Өөрын арад түмэндэ хүсэ шадал хайрлаха, Эзэн Өөрын арадта амар амгаланиие юрөөн үршөөхэ!