Псалманууд 21 - Библи

¹ [Дуунай бүлэгые хүтэлбэрилэгшэдэ: «Үүрэй толоной задархада» гэдэг аялга. Давидай псалма.]

² Бурхамни, Бурхамни, юундэ намайе орхибот? Холот, туһалхагүйт, ёолохым дуулахагүйт.

³ Бурхамни! Үдэр, һүнигүй Таниие дууданаб, теэд харюусанагүйт, һанааем тэгшэлнэгүйт.

⁴ Арюун нангинтнай Израильда магтуулан, хан шэрээ дээрээ заларан һуунат.

⁵ Элинсэг хулинсагнай Танда этигэн байгаа, этигэн байгаа, тэдэниие абараат.

⁶ Туһа эрин, Таниие дуудахадаа, тэдэ абарагдаа. Танда этигэхэдээ, тэдэ эшхэбтэр байдалда ороогүй.

⁷ Би болбол хүн бэшэ, үтэ хорхой гээшэб. Зон намайе хараана, баһана.

⁸ Намайе харахадаа, тэдэ баһан энеэлдэнэ, толгойгоо һэжэрэн, хэлээ бүлюүдэнэ:

⁹ «Тэрэ Эзэндэ этигэдэг байгаа, тиимэ хадань Эзэниинь лэ абараг! Тэрээндэ Эзэн дуратай һаа, абараг!»

¹⁰ Эзэн, Та намайе эхын хэбэлһээ гарган мүндэлүүлээт, эхымни энгэртэ тэбэрин бөөмэйлжэ, амар амгалан байлгаат.

¹¹ Хэбэлһээ гараһанһаа хойшо Танай харууһан доро байгааб, бүрилдэһэн сагһаам хойшо Та минии Бурхан мүн.

¹² Гай тодхор дүтэлжэл байна, намһаа бү холодыт. Хэншье намда туһалхагүйл.

¹³ Бухадал адли хүлзэжэ, дайсад намайе тойроол! Башаанай тобир буханууд намайе хүреэлөө.

¹⁴ Олзолһон олзо дээрээ архиран байгааша арсаландал тэдэ нам руу амаа ангайн архиран байна!

¹⁵ Һалхинда туугдаһан тэмээн халаахайдал би хүсэ шадалгүйб. Яһамни бутаран һалаа, зүрхэмни дэнгэй өөхэндэл сээжэдэм мүхэнэ.

¹⁶ Хүсэмни голой уһандал адли шэргэшоо. Хэлэмни тангалайдаа няалдашоо. Та намайе үхэхыем шорой руу табибат.

¹⁷ Хорото дайсад намайе хүреэлбэ, бүлэг нохойдол намайе бүһэлбэ, гар, хүлыем нэбтэ хазаба.

¹⁸ Бүхы яһыем тооломоор. Тэдэ нам руу ехэ хомхойгоор хаража байна.

¹⁹ Хубсаһыем хоорондоо хубаажа, хубсаһыем жээрэблэн абана.

²⁰ Харин Та, Эзэн, бү холодыт, хүсэмни, намдаа туһалхаар шамдыт!

²¹ Намайе һэлмэһээ, ами наһым нохойнуудһаа абарыт!

²² Арсалангай аманһаа, бухын эбэрһээ абарыт! Намда харюу үгыт!

²³ Би аха дүүнэртээ Танай нэрые хэлэхэб, сугларагшадай дунда Таниие магтахаб:

²⁴ «Эзэнһээ айдаг зон, Тэрэниие магтагты! Яковай уг удам болохо та бүгэдэн, Тэрэниие алдаршуулагты! Израилиин үринэр, Тэрээнһээ түбэгшөөн, хүндэлэн байгты!

²⁵ Зобоһон хүнэй зоболонһоо Тэрэ жэгшээгүй, үзэн ядаагүй, тэрээнһээ буруу хараагүй. Туһа гуйжа тэрэнэй дуудахада, Тэрэ дуулаа».

²⁶ Ехэ хуралай дунда Таниие магтанаб. Танһаа айдаг зоной хараһаар байтар тангаригаа бэелүүлхэб.

²⁷ Ядуу зон эдижэ садаха, Эзэниие дуудагшад Тэрэниие магтаха. Хэтэ мүнхэдөө тэдэ амар амгалан ажаһууг лэ!

²⁸ Дэлхэйн бүхы заха хизаараар зон Эзэниие һанажа, Тэрээн руу эрьехэ, үндэһэ яһатанай бүхы обогууд Тэрэниие хүндэлэн мүргэхэ.

²⁹ Юуб гэбэл, хаанай засаг Эзэнэй мэдэлэй, тэрэл үндэһэ яһатаниие захиран зонхилдог.

³⁰ Дэлхэйн шандааһатай хүн бүхэн Тэрэнэй урда мүргэхэ, Наратада байгаа бүхы зон урдань һүгэдэхэ.

³¹ Тэдэнэрэй уг удам Тэрээндэ алба хэжэ, ерэхэ үенүүдтэ Эзэн тухай хөөрэхэ,

³² Эзэнэй сэхэ шударга тухай, хэрэгүүд тухайнь зарлаха!