Псалманууд 18 - Библи

¹ [Дуунай бүлэгэй хүтэлбэрилэгшэдэ: Давидай псалма.]

² Тэнгэри Бурханай һүр жабхалангые зарлан тунхаглана, огторгой Тэрэнэй хэһэн бүтээлнүүдые айладхана.

³ Үдэр дараадахи үдэртэ яряа дамжуулна, һүни нүгөөдэ һүнидэ эрдэм мэдээсэнэ.

⁴ Шэмээгүй, үгэшье соностоногүй, дуу хоолойньшье дуулданагүй.

⁵ Тэдэнэй хэлээшэнь бүхы газар дэлхэйгээр тараа, тэдэнэй үгэнүүдынь газар дэлхэйн заха хизаар хүрөө. Тэндэ Бурхан наранда гэжэ майхан табяа.

⁶ Хуримаа наадажа байгаа залуу хүндэл наран тэрэ үргөөһөө гарана, урилдаанай баатар мэтэ тэрэ баясана.

⁷ Мандахань тэнгэриин нэгэ захаһаа, тойрохонь нүгөө заха хүрэтэр, халуунһаань хорохо арга байхагүй.

⁸ Эзэнэй һургаал тэгшэ түгэлдэр, һүр һүлдэ һэргээдэг. Эзэнэй заабари бата, гэнэн хүниие ухаатай болгодог.

⁹ Эзэнэй захиралтань зүб, зүрхэ баясуулдаг, һургаал заабаринь һаруул тодорхой, нюдэ онгойлгодог.

¹⁰ Эзэнһээ айхань сэбэр, хэтэ мүнхэдөө оршодог. Эзэнэй зарга шүүбэринүүд үнэн, бүгэдэ зүб шударга.

¹¹ Тэдэ алтанһаа, обоо шэжэр алтанһаа үлүү хүсэмөөр. Зүгын балаһаа, зүгын һархинагһаа дуһагша юумэнһээ үлүү амтатай.

¹² Би, Танай богоол, тэдэниие сахидагби, тэдэниие сахиһанай түлөө агууехэ шагнал байдаг.

¹³ Өөрын бурууе хэн ойлгожо шадахаб даа. Далда байгаа бурууһаам намайе арюудхыт.

¹⁴ Һанаашалһан нүгэлнүүдһээм намайе зайлуулыт, богоолыетнай тэдэ бү зонхилог. Тиигэбэл, би гэмгүй боложо, агууехэ нүгэлһөө сүлөө болохоб.

¹⁵ Минии Хабсагай, минии Абарагша болохо Эзэн! Аманһаамни гарагша үгэнүүд, сэдьхэлэймни бодолнууд Танда тааламжатай байхань болтогой!