Псалманууд 16 - Библи

1 [Давидай зальбарал.]

¹ [Давидай зальбарал.] Эзэн, хашхархыем дуулыт! Үнэн зүб тухай гуйналби. Гуйлтыем анхарыт, худалша бэшэл минии хэлэн.

² Зарга хэрэгыем шиидхэхэт, хэн зүб бэ гэжэ нюдэнтнай хаража байна.

³ Та минии зүрхэн руу шэртэн хараат, һүниндөө намайе туршахаа ерээт, намда ямаршье гэм үгы байһые ойлгоот, аманһаамни муу юумэн гараагүй.

⁴ Зоной юушье хээ хадань би Танайл үгэ дуулаад байнам, гэмтэнтэй адли болохогүйб.

⁵ Танай харгы замаар алхалхыем, хүлэймни буруу гэшхэхэгүйень баталжа-шангалжа үгыт.

⁶ Бурхан, Таниие дууданалби, харюусыт! Шэхээ нам руу табиит, үгыем шагныт!

⁷ Танда этигэн найдагшадта хайраа үзүүлыт, гараараа дайсадһаа аршалыт.

⁸ Нюдэнэй сэсэгы мэтэ намайе хамгаалыт, далиингаа һүүдэртэ хоруулыт.

⁹ Намда добтолоошо муу зонһоо, намайе хүреэлэн, алахаяа һанаашадһаа аршалыт.

¹⁰ Өөхөөр тэдэ хушагдаа, бардамлан дуугарна.

¹¹ Алхам бүхэндэмни тэдэ намайе хүреэлжэ, газарта унагаахаяа гэтэн байна.

¹² Тэдэ олзоор жүрөөдэһэн арсаландал, нюуса газарта гэтэгшэ залуу арсаландал адли.

¹³ Эзэн, бодыт! Урдаһаань гарыт, доро дохюулыт! Тэдэ муу муухай зонһоо намайе һэлмээрээ аршалыт,

¹⁴ гараараа тэдэ зонһоо, тэдэ зонһоо, Эзэн! Хубинь – амиды зоной дунда. Хэбэлыень Өөрын эрдэни санһаа дүүргэнэт. Тэдэ садхалан байха, хүүгэдтэнь, нялха үринэртэньшье үлэхэл.

¹⁵ Зүб шударга байһанайм түлөө нюурыетнай хараха эрхэ намда үгтэнхэй. Һэрихэдээшье, Танай дүрэ садатараа хараха аргатайб.