Псалманууд 138 - Библи

1 [Дуунай бүлэгэй хүтэлбэрилэгшэдэ. Давидай магтаал дуун.]

¹ [Дуунай бүлэгэй хүтэлбэрилэгшэдэ. Давидай магтаал дуун.] Эзэн, Та намайе туршаат, намайе мэдэнэт.

² Минии һууха, бодохыешье Та мэдэнэт. Хаана холоһоо минии һанаан бодолые ойлгонот.

³ Ябана гүб, хэбтэнэ гүб – Та нарибшалан шэнжэлнэт. Минии бүхы харгы зам Танда мэдээжэ.

⁴ Минии ганса үгэ үгүүлхымнишье урда тээ Та, Эзэн, тэрэниием гүйсэд мэдээд байнат.

⁵ Намайе тойроод дууһан байнат, Өөрын гараар намайе аршалнат.

⁶ Иимэ мэдэлгэ намда угаа гайхамшагтай, би тэрэнэй үндэртэ хүрэжэ шадахагүйб.

⁷ Танай Һүлдэһөө би хайшаа ошожо шадахабиб? Танай нюурһаа хайшаа зугадажа шадахабиб?

⁸ Минии тэнгэри руу ошоходо, Та тэндэ байнат. Минии Үхэлэй орон соо ороо заһабал, Та мүн лэ тэндэ байнат.

⁹ Үүрэй толоноор жэгүүрлэн, тэнгисэй захадашье байрлаа һаам,

¹⁰ тэндэшье гартнай намайе хүтэлхэ, баруун гартнай намайе барин байха.

¹¹ Хэрбээ би «харанхы үнэхөөр намайе тойрог, намайе хүреэлһэн гэрэл һүни болог» гээшье һаам,

¹² харанхышье Танда харанхы бэшэ, һүнишье үдэр мэтэ гэрэлтэй бэлэй. Гэрэл харанхы хоёр хоюулаа адлихан юм.

¹³ Ушар юуб гэбэл, минии досоо эрхэтэнүүдые Та бии болгоот. Эхымни хэбэл соо намайе бүрилдүүлээт.

¹⁴ Би аймшагтай болон гайхамшагтай бүтээгдэһэн тула Танда магтаал соло дууданаб. Үйлэ хэрэгүүдтнай гайхалтай, би энээниие һайн мэдэнэб.

¹⁵ Нюусаар минии бүрилдэжэ, газарай гүн соо хээлэн бүтээгдэжэ байхадашье бэеымни яһанууд Танһаа нюугаатай бэшэ бэлэй.

¹⁶ Түхэлөө оложо үрдеэгүй үрэ байхадам нюдэдтнай хараһан гээшэ. Намда тодорхойлогдоһон үдэрнүүдэй нэгэньшье болоогүй байхада тэдэ бултадаа Танай ном соо бэшэгдэнхэй байгаа.

¹⁷ Бурхан, Танай бодолнуудые ойлгохом хэды хүндэ гээшэб! Тиигээд тэдэ хэды олон гээшэб!

¹⁸ Хэрбээ тэдэниие тоолоо һаам, элһэнэй тооһоо хэды олон гээшэб! Һэрихэдээшье Тантай хамтаб!

¹⁹ Ай, Бурхан! Хорото муу хүниие Та хюдаһайт! Алууршад, намһаа холодогты!

²⁰ Тэдэ Тан тухай худал хэлэнэ, нэрыетнай дэмы дурдана.

²¹ Эзэн, Таниие үзэн ядагшадые би ямараар үзэн ядадаг гээшэбиб, Танай урдаһаа һөөргэдэгшэд намда хэды ехэ жэгшүүритэйб!

²² Туйлдаа хүрэтэрөө тэдэниие үзэн яданаб, тэдэ – минии дайсад мүн.

²³ Бурхан, намайе туршажа, бодолым мэдыт. Туршаад намайе ухаан соом байгаашые ойлгыт.

²⁴ Би зүб харгы замаар ябана гүб? Харыт даа! Элинсэг хулинсагайм зүб замаар намайе залан ябуулыт!