Псалманууд 131 - Библи1 [Үгсэлгын дуун.] 1 [Үгсэлгын дуун.] Эзэн, Давид тушаа, бүхы зоболонгыень һаныт. 2 Танда, Эзэндэ, яажа тангариглаһыень, Танда, Яковай Хүсэтэ Бурханда, иигэжэ амалһыень: 3 «Нээрээ би гэртээ орохогүйб, орон дээрээшье хэбтэхэгүйб, 4 унтахаар нюдөөшье анихагүйб, зубхяашье буулгахагүйб, 5 Эзэндэ гэжэ газар, Яковай Түгэс Хүсэтын оршохо газар олотороо!» 6 Харыт, бидэ энээн тушаа Эпраатада дуулажа, энээниие Иарай таряалан дээрэ олообди. 7 Оршодог газартань ошоё, хүлдэнь һүгэдэе! 8 Эзэн, Та хүсэ шадалайнгаа ханзатай хамта Өөрын амарха газарта заларыт! 9 Санаартадтнай хубсаһаар мэтээр зүб шударгаар хубсалаг, Танай үнэн сэхэ зон баясаг! 10 Зараса Давидайнгаа түлөө шэлэн ёһолһон нэгээ бү буруушаагыт! 11 Эзэн Давидта үнэн зүб ба бусаагдахагүй тангаригаар тангариглахадаа, «Шинии хүүгэдые, үри һадаһыеш хан шэрээдэш һуулгахаб! 12 Хэрбээ тэдэ Намтай хэһэн хэлсээндэ үнэн сэхэ, Минии һургаал заабариие сахин байбалнь, тиигэбэл, үхи хүүгэдынь хэтэһээ хэтэдэ хан шэрээдэш заларан байха!» гээ бэлэй. 13 Юуб гэбэл, Эзэн Сиониие шэлээ, Өөрын байра болгоо: 14 «Эндэ Минии амарха газар мүнхэдөө болохо, Би энээниие шэлээб, эндэ байрлахаб! 15 Тэрэнэй хоол хүнэһые элбэгээр юрөөхэб, ядуу зонииень эдеэ хоолоор садхаан байхаб. 16 Санаартадыень абаралаар хубсалуулхаб, Намда үнэн сэхэ зониинь баясан байг. 17 Тэндэ Давидай хүсэ шадал ургуулхаб, Өөрын тоһолон шэлэгшын дэнгые унтаруулхагүйб. 18 Дайсадынь эшхэбтэр муу байдалда оруулхаб. Толгой дээрэнь титим яларха!» |
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
Institute for Bible Translation, Russia