Псалманууд 118 - Библи

¹ Замынь түгэс, Эзэнэй һургаал заабари сахин ябаашад хэды ехэ юрөөлтэйб!

² Зарлигынь хадагалан дүүргэжэ, үнэнхэ зүрхэ сэдьхэлһээ Тэрэниие хүндэлжэ байгаашад юрөөлтэй.

³ Тэдэ гэмтэ хэрэг хэдэггүй, Тэрэнэй замаар ябадаг.

⁴ Өөрын захиралтануудые заабол бэелүүлэн байхые Та захираа бэлэйт.

⁵ Танай хуули ёһонуудые сахин байхаар замуудни бата тогтоһой!

⁶ Тиигэбэл, Танай захяа заабаринуудые харан байхадаа би эшэхэгүй бэлэйб.

⁷ Үнэнхэ зүрхэнһөө Таниие магтан байнаб, үнэн зүбэйтнай заршам шудалнаб.

⁸ Хуули ёһонуудыетнай сахин байхаб, намайе дууһан бү орхиит! ב Бээт

⁹ Залуу хүбүүн замаа сэбэрээр яагаад сахин байхаб? Танай үгые сахин байһаараа.

¹⁰ Бүхы сэдьхэл зүрхөөрөө Таниие бэдэрэн байнаб, захяа заабаринуудһаатнай алдууран байхыем бү зүбшөөгыт!

¹¹ Танай урда нүгэл үйлэдэхэгүйн тула зүрхэ сэдьхэлдээ Танай үгые шанга хадагалнаб.

¹² Эзэн, Та юрөөлтэйт! Хуули ёһонуудтаа намайе һургыт!

¹³ Танай аманһаа гараһан бүхы тогтоолнуудые би өөрын хэлээр тунхаглаа бэлэйб.

¹⁴ Ямаршье баялигта баясадагтал, Танай зарлигуудай замда баярланаб.

¹⁵ Танай захиралтанууд тушаа бодомжолноб, харгы замуудыетнай харанаб.

¹⁶ Хуули ёһонуудтатнай баясанаб, Танай үгэ мартахагүйб. ג Гиимэл

¹⁷ Намайе амиды байлгажа, үгыетнай сахин бэелүүлэхымни тула Өөрын зарасада хайра үзүүлэн хандыт.

¹⁸ Танай һургаалай гайхамшагта үзэгдэлнүүдые намда харуулхын тула нюдыемни нээгыт.

¹⁹ Би газар дэлхэй дээр ерүүл хүндэл эрхэгүй жаахамби, Өөрын захяа заабаринуудые намһаа бү хоргодуулыт!

²⁰ Танай тогтоолнуудые хододоо хүсэн эрмэлзэһээр сэдьхэлни шаналжа байнал.

²¹ Захяа заабаринуудһаатнай хазагайрдаг, бардам гү, али хараал шэнгээһэн зониие Та номгоруулаат.

²² Танай гэршэлгэнүүдые сахин хадагалдаг ушарһаам доромжолол ба шоо үзэлгые намһаа зайлуулыт.

²³ Ноёд һуужа, минии урдаһаа хэлсээ зохёожо байна. Харин би, Танай зараса, хуулинуудыетнай бүри гүнзэгыгөөр шудалнаб.

²⁴ Гэршэлгэнүүдтнай минии баясхалан, минии зүблөөшэд мүн. ד Даалэт

²⁵ Сэдьхэлни тооһо шоройдо дарагданхай, үгөөрөө намайе һэргээгыт.

²⁶ Өөрын замууд тушаа тунхаглааб, Та намда харюусаат. Өөрын хуули ёһонуудта намайе һургыт.

²⁷ Зарлигуудайтнай зам шэглэлые намда ойлгуулыт, гайхамшагта үйлэ хэрэгүүд тухайтнай бодохолби.

²⁸ Гай тодхорһоо боложо ами наһамни һалажа байна, үгөөрөө намайе шанга болгыт.

²⁹ Худал зам намһаа зайлуулыт, Өөрын һургаалые намда нигүүлэсхы хайрлыт.

³⁰ Үнэн сэхэ зам шэлээб, Танай тогтоолнуудые хүсэн-жүрөөдэн байнам.

³¹ Гэршэлгэнүүдыетнай баряад лэ ябанам, Эзэн, намайе эшхэбтэр байдалда бү оруулыт!

³² Зүрхымни үргэн мэдэлтэй болгодог ушарһаатнай Танай захиралтануудай замаар яаранам. ה Һээ

³³ Танай хуулиин замаар ябахымни һургыт, Эзэн! Би эсэс хүрэтэрөө тэрээниие дахан ябахалби.

³⁴ Намда ухаа заагыт, һургаалыетнай сахин ябахалби, бүхы зүрхөөрөө тэрэниие хадагалан байхаб.

³⁵ Һургаал заабаринуудайнгаа замаар намайе хүтэлыт, би тэрэниие хүсэнэлби.

³⁶ Зүрхыем олзо руу бэшэ, Өөрын гэршэлэл руу хандуулыт.

³⁷ Нюдыем худалһаа ондоо тээшэ шэглүүлыт, Өөрын харгы замда намда амидарал бэлэглыт.

³⁸ Өөрын зарасада найдуулһан үгэеэ бэелүүлыт, тиихэдэ би Танһаа түбэгшөөн байхалби.

³⁹ Эшхэбтэр байдалһаа би айнаб, тэрэниие намһаа холодуулыт! Танай тогтоолнууд һайн бэлэй.

⁴⁰ Анхарыт, би Танай захиралтануудые хүлеэн байнам, Өөрын зүб шударгаар намайе амидыруулыт. ו Ваав

⁴¹ Оо, Эзэн, энэрэл хайратнай, абаралтнай Танай үгын ёһоор намда ерэхэнь болтогой!

⁴² Тиигэбэл, нам тушаа муугаар хэлэдэг хүндэ харюу үгэхэ үгэ намда олдохол. Юуб гэбэл, үгэдэтнай этигэнэм.

⁴³ Үнэн зүб үгэ аманһаам бү абыт, юуб гэбэл, Танай зүб шударгада би этигэнэб.

⁴⁴ Танай һургаал заабариие хододоо, хэтэдээ сахин байхаб.

⁴⁵ Танай захиралтануудые гүйсэдхэхээ эрмэлзэдэг ушарһаа би сүлөөтэй алхалха болоноб.

⁴⁶ Хаашуулда Танай гэршэлэлгэнүүд тушаа хөөрэхэб, эшэхэгүйб.

⁴⁷ Би Танай һургаалнуудта дурлааб, тэдээндэ баясахаб.

⁴⁸ Би өөрын дурлагша һургаалнуудтатнай гараа һунгахаб, зарлигууд тухайтнай бодомжолхоб. ז Заайин

⁴⁹ Өөрын зарасада үгэһэн үгэеэ һаныт, тэрэ үгэдэ найдахымни Та захираа бэлэйт.

⁵⁰ Танай үгэ намайе амидыруулһаниинь зоболон дундам һатаарха зүйлни болоол.

⁵¹ Бардам зон намайе ехэ шоо үзэнэ, харин би Танай һургаалһаа хазагайраагүйб.

⁵² Танай урданай тогтоолнуудые һанажа, Эзэн, тэрээгээр һамаардаг байгаалби.

⁵³ Танай һургаал орхигшо муу зониие үзэхэдөө, уур хилэмни хүрэнэ.

⁵⁴ Аяншалан ондоо газарта байхадам зарлигуудтнай намда дуун мэтэ болоол.

⁵⁵ Эзэн, би хадаа нэрыетнай һүни бүри һанажа, һургаалыетнай сахин байгааб.

⁵⁶ Иигэжэ Танай захиралтануудые бэелүүлжэ, өөрын болгооб. ח Хээт

⁵⁷ Танай үгэнүүдые сахижа, «Эзэн хадаа минии хуби юм» гэжэ хэлээб.

⁵⁸ Бүхы зүрхэ сэдьхэлээрээ Таниие гуйналби, Өөрын үгэ бэелүүлжэ, намда нигүүлэсхы байгыт.

⁵⁹ Өөрын харгы замууд тушаа бодомжолон, хүлөө Танай гэршэлгэнүүд руу шэглүүлээб.

⁶⁰ Танай захиралтануудые бэелүүлхэеэ яаранаб, хойшолуулхагүйб.

⁶¹ Муу зоной урьха намайе баряа, харин би һургаалыетнай мартаагүйб.

⁶² Һүниин тэгэн дунда бодожо, зүб тогтоолнуудайтнай түлөө Таниие магтанам.

⁶³ Таниие хүндэлдэг, захиралтануудыетнай дүүргэдэг зонтой би хамтаб.

⁶⁴ Эзэн, энэрэл хайраартнай дэлхэй дүүрэнхэй, хуулинуудтаа намайе һургыт. ט Тээт

⁶⁵ Эзэн, Та амалһанаа бэелүүлэн, намда, Өөрын зарасада, һайе хэнэт.

⁶⁶ Танай захиралтануудта этигэдэг ушарһаам намда илгаруулха шадабари ба эрдэм мэдэсэ заагыт.

⁶⁷ Зобохын урда тээ буруу зүгөөр ябан байгааб. Харин мүнөө үгыетнай сахин дүүргэнэб.

⁶⁸ Та хадаа һайн ба һайе хэдэгта. Өөрын хуулинуудта намайе һургыт.

⁶⁹ Бардам зон намайе худал хуурмаг үгөөр тойруулан хүрмээд байна. Харин би бүхы зүрхэ сэдьхэлээрээ захиралтануудыетнай сахин дүүргэнэб.

⁷⁰ Тэдэнэй зүрхэн өөхөөр орёогдон хатууранхай, харин би Танай һургаалда баясанаб.

⁷¹ Зоболон дундуур гараһамни намда туһатай, юуб гэбэл, би Танай хуули ёһонуудта һуранам.

⁷² Аманһаатнай гарагша һургаал намда мянгаад алта, мүнгэн хабтаһанһаа үлүү. י Ёд

⁷³ Танай гар намайе урлан бүтээгээ бэлэй. Намайе ухаатай болгыт, би һургаал заабаринуудыетнай шудалхалби.

⁷⁴ Танһаа түбэгшөөдэг зон нам руу баяртайгаар хараха – би Танай үгэдэ этигэдэг ха юмбиб.

⁷⁵ Эзэн, Танай шиидэбэринүүд зүб шударга гэжэ мэдэнэм, Та зүб намайе хэһээгээ бэлэйлта.

⁷⁶ Өөрын зарасада, хэлэһэн үгынтнай ёһоор, энэрэл хайратнай намайе һатааруулхань болтогой.

⁷⁷ Намайе амиды мэндэ байлгахын тула үршөөл хайратнай намда хүрэг лэ, юуб гэбэл, һургаалтнай минии баяр мүн.

⁷⁸ Намайе ямаршье ушар шалтаггүй харшалжа байгааша бардам зон эшхэбтэр байдалда орог лэ.

⁷⁹ Танһаа түбэгшөөдэг, Танай гэршэлгэнүүдые мэдэдэг зон нам руу эрьехэнь болтогой.

⁸⁰ Минии эшхэбтэр байдалда орохогүйн тула зүрхэмни Танай хуули ёһонуудай урда түгэс тэгшэ байхань болтогой. כ Каап

⁸¹ Танһаа абарал хүлеэжэл байна сэдьхэлни. Би Танай үгэдэ этигэнэм.

⁸² Танай үгэ хүлеэн нюдэдни һула боложо байна. «Хэзээ намда һатаарал үршөөхэбта?» гэжэ асуунам.

⁸³ Хөө утаан соо байгааша хүхүүр мэтэ болоошье һаа, би Танай хуули ёһонуудые мартаагүйб.

⁸⁴ Танай зарасада, хэды хоног үлөөб? Намайе харшалдаг зониие хэзээ Та шиидхэхэбта?

⁸⁵ Бардам зон Танай һургаал тоонгүй, намда унаха нүхэ малтан бэлдээ.

⁸⁶ Танай бүхы һургаал заабаринууд – үнэн зүб. Намайе ямаршье шалтаггүй харшалжа байна. Туһалыт намда!

⁸⁷ Намайе газарай хүрьһэнһөө аршан һалгаан алдаа. Харин би Танай тушаалнуудые орхёогүйб.

⁸⁸ Өөрын энэрэл хайраар намда амидарал үршөөгыт! Танай үгэһэн гэршэлгэнүүдые би сахин байхалби. ל Лаамэд

⁸⁹ Эзэн, Танай үгэ тэнгэридэ хэтэ мүнхэдөө баталагданхай.

⁹⁰ Танай үнэн зүб үеһөө үе дамжан оршохо. Та газар дэлхэйе бүтээн табяат, тэрэ оршон байна.

⁹¹ Танай зарлигаар бүхы юумэн мүнөө хүрэтэр байна, бүгэдэ Танда алба хэнэ.

⁹² Минии баяр бологшо Танай һургаалай үгы һаань, би зоболон дундаа хосорхо байгааб.

⁹³ Хэзээшье Танай зарлигуудые мартахагүйб, тэдээгээр Та намайе амидыруулнат.

⁹⁴ Би Танайб. Намайе абарыт, Танай зарлигуудта би ханданам.

⁹⁵ Усадхахын тула хорото муу зон намайе отожо байна. Харин би Танай заабаринуудай гүн руу тэгүүлнэм.

⁹⁶ Түгэс түгэлдэр бүхы юумэндэ заха хизаар харагдана. Харин Танай һургаал заабаринууд заха хизааргүй. מ Мээм

⁹⁷ Танай һургаалда би угаа дуратайб! Бүхэли үдэртөө тэрээн тушаа бодомжолном.

⁹⁸ Танай һургаал заабари хэтэ мүнхэдөө намтай хамта, тэрэ намайе дайсадһаам сэсэн мэргэн болгоол.

⁹⁹ Өөрын багшанарһаа би сэсэн мэргэн болонхойб, юуб гэбэл, Танай зарлигууд тушаа бисалгалнам.

¹⁰⁰ Танай зарлигуудые сахидаг ушарһаа би наһажаал зонһоо сэсэн мэргэн болонхойб.

¹⁰¹ Хүлнүүдээ муу зам руу гэшхүүлнэгүйб. Юуб гэбэл, Танай үгэ сахинам.

¹⁰² Танай тогтоолнуудһаа би хазагайрнагүйб. Юуб гэбэл, Та намайе һурганат.

¹⁰³ Танай үгэ амталхада хэды амтатайб! Минии аманда тэдэ зүгын балаһаашье амтатай.

¹⁰⁴ Танай зарлигууд намда эрдэм мэдэсэ үгэнэ, худал хуурмаг замые би үзэн яданам. נ Нүүн

¹⁰⁵ Танай үгэ – минии хүлдэ гэрэл дэн, намда замым гэрэлтүүлнэ.

¹⁰⁶ Танай үнэн сэхэ тогтоолнуудые сахин байхаб гэжэ тангариглаа бэлэйб, тангаригаа бэелүүлхэб.

¹⁰⁷ Эзэн, би харшалуулагдаад байнам. Өөрын амалһанай ёһоор, намда ами наһа үршөөгыт.

¹⁰⁸ Эзэн, минии аманһаа гарагша һайн дуранай үргэл хүлеэн абыт, Өөрын тогтоолнуудые намда заагыт.

¹⁰⁹ Ами наһамни гай тодхорто саг үргэлжэ ороно. Харин би Танай һургаал мартаагүйб.

¹¹⁰ Муу муухай зон намда урьха занга табяа, харин би Танай зарлигуудһаа хазагайраагүйб.

¹¹¹ Би Танай һургаалнуудые хэтэ мүнхын уг залгамжалан дамжуулха зүйл болгон абааб. Юуб гэбэл, тэдэ зүрхэнэйм баяр баясхалан мүн.

¹¹² Би Танай хуулинуудые сахин бэелүүлхээр зүрхэеэ хэтэ мүнхэдөө, эсэс хүрэтэр зорюулааб. ס Саамэх

¹¹³ Би хоёр һанаатай зониие үзэн ядададагби, харин Танай һургаалда дуратайб.

¹¹⁴ Та болбол минии хорохо газар, минии бамбай мүн. Үгыетнай хүлеэдэгби.

¹¹⁵ Бузар муу хэрэг хэгшэд, намһаа зайлагты. Бурханайнгаа тогтоолнуудые би сахин байхаб.

¹¹⁶ Амалһанайнгаа ёһоор, намайе дэмжэн бэхижүүлыт. Амиды мэндэ байлгыт, найдажа байхадам эшхэбтэр байдалда бү оруулыт.

¹¹⁷ Намайе дэмжыт, тиихэдэтнай абарагдахаб, хуулинуудыетнай хододоо шудалан анхаран байхаб.

¹¹⁸ Хуулинуудһаатнай хазагайрагшадые бултыень Та голоот, юуб гэбэл, мэхэ гохонь дэмы хооһон.

¹¹⁹ Дэлхэйн бүхы хорото һанаатануудые нүүрһэнэй хог мэтээр хаянат. Тиимэһээ би Танай гуримда дуратайб.

¹²⁰ Бэемни Танһаа айжа шэшэрнэ. Танай зага шүүбэриһээ айнаб. ע Аайин

¹²¹ Би шударга ёһо ба үнэн зүбые үйлэдэн байгааб. Үлдэжэ байгаашадтам намайе бү үгыт.

¹²² Өөрын зарасада һайн һайханай түлөө баталга болыт. Бардам зондо намайе бү дарлуулыт.

¹²³ Танай абарал, Танай үнэн зүб үгые хүлеэн, минии нюдэд һулараад байна.

¹²⁴ Энэрэл хайрынгаа хэмээр намда, Өөрын зарасада, хандыт, хуулинуудтаа намайе һургыт.

¹²⁵ Би Танай зарасаб. Намда ухаа заагыт. Тиихэдэ би Танай һургаал заабаринуудые мэдэдэг болохоб.

¹²⁶ Эзэнэй хэрэг ябуулха саг ерээ, юуб гэбэл, Танай һургаал эбдэгдээ.

¹²⁷ Би Танай тогтоолнуудта алтанһаа, шэжэр алтанһаа үлүү дуратайб.

¹²⁸ Би Танай зарлигуудай сэхэ замаар ябанам, худал хуурмагай зам үзэн яданаб. פ Пээ

¹²⁹ Танай гэршэлгэнүүд гайхамшаг, тиимэһээ сэдьхэлни тэдэниие сахидаг.

¹³⁰ Танай үгэнүүдэй тунхаглал гэгээрүүлнэ, юрын зониие ухааруулна.

¹³¹ Танай захиралтануудые угаа хүсэн байһандаа амаа ангайн аахилнаб.

¹³² Нэрэдэтнай дуратай зондо юу хэдэгтэл адляар нам руу хаража, намайе хайрлыт.

¹³³ Танай үгэ алхамыем бата болгог лэ, ямаршье буруу юумэндэ намайе эзэмдэхыень бү зүбшөөгыт.

¹³⁴ Зоной дарлалтаһаа намайе сүлөөлыт, Танай захиралтануудые сахин байхалби.

¹³⁵ Гэрэлтэмэ нюур шарайгаараа намайе, Өөрын зарасые, гэгээрүүлыт, хуулинуудтаа намайе һургыт.

¹³⁶ Танай хуули зоной сахидаггүй ушарһаа нюдэнһөөм урасхал нулимса урдана. צ Цадээ

¹³⁷ Эзэн, Та хадаа шударга ба зарга шүүбэритнай зүб шударга мүн.

¹³⁸ Өөрын һургаалнуудые Та захин дамжуулаат, тэдэ хадаа үнэн зүб ба сасуулшагүй үнэн мүн.

¹³⁹ Танай үгые дайсадайм мартаһанда би угаа хилэгнэн байнаб.

¹⁴⁰ Танай үгэ болбол хайлуулһан сэбэр алтан мэтэ. Би, зарасатнай, тэрээндэ угаа дуратайб.

¹⁴¹ Би доройтонхойб, шоологдонхойб. Гэбэшье захиралтануудыетнай мартаагүйб.

¹⁴² Танай зүб шударга – хэтэ мүнхын зүб шударга, һургаалтнай – үнэн зүб.

¹⁴³ Бэрхэшээл ба зоболон намайе дайраа. Гэбэшье Танай зарлигууд – минии баяр мүн.

¹⁴⁴ Танай һургаалай үнэн зүб хэтэ мүнхын, амиды байхым тула намайе ухаатай болгыт. ק Кооп

¹⁴⁵ Би бүхы зүрхэ сэдьхэлээрээ хашхаран байнаб: Эзэн, намда харюусыт. Танай хуулинуудые сахин байхаб.

¹⁴⁶ Би Тан руу хашхарнаб: намайе абарыт. Танай зарлигуудые сахин бэелүүлхэб.

¹⁴⁷ Үүр сайхые хүлеэнгүй, Таниие дууданаб, Танай үгэдэ найданаб.

¹⁴⁸ Танай үгэ тунгаан бодохын тула би бүхэли һүниндөө нюдөө нээгээд байнаб.

¹⁴⁹ Эзэн, Өөрын энэрэл хайрын ёһоор минии абяа дуулыт. Өөрын тогтоолой ёһоор намда амидарал үршөөгыт.

¹⁵⁰ Хорон худал дахагшад дүтэлжэ байна. Танай һургаалһаа тэдэ хэды холоб!

¹⁵¹ Эзэн, Та ойрохон байнат. Бүхы тогтоолнуудтнай – үнэн зүб.

¹⁵² Танай гэршэлгэнүүд тушаа үнинэй мэдэнэб. Та тэдэниие хэтэ мүнхэдөө баталаат. ר Рээш

¹⁵³ Минии зоболон хаража, намайе абарыт. Юуб гэбэл, би Танай һургаал мартадаггүйб.

¹⁵⁴ Минии хэрэгые аршалжа, намайе хайрлыт. Амалһанайнгаа дагуу намайе амидыруулыт.

¹⁵⁵ Абарал хадаа хорото муу зонһоо холо байдаг, юуб гэхэдэ, тэдэ Танай зарлигуудые бэдэржэ байдаггүй.

¹⁵⁶ Эзэн, Танай үршөөлнүүд агууехэ. Амалһанайнгаа дагуу намайе амидыруулыт.

¹⁵⁷ Намайе харшалагшад болон үһөөтэ дайсадайм олон болобошье, би Танай заабаринуудһаа хазагайрдаггүйб.

¹⁵⁸ Мэхэтэйшүүлые хараад жэрхэдэгби. Юуб гэбэл, тэдэ Танай үгэ сахин дүүргэдэггүй.

¹⁵⁹ Танай зарлигуудта хэды ехэ дуратайем харыт. Эзэн, энэрэл хайраараа намайе амидыруулыт.

¹⁶⁰ Танай үгын удха үнэн ба Танай зүб шударга тогтоол бүхэн хэтэ мүнхэдөө. ש Шиин

¹⁶¹ Ноёд намайе ямаршье шалтаггүй харшалдаг. Харин зүрхэмни Танай үгэһөө һүрдэдэг.

¹⁶² Ехэ олзо олоһон хүн шэнги Танай үгэдэ баясадагби.

¹⁶³ Худал хуурмагые үзэн ядан жэрхэдэгби, харин Танай һургаалда дуратайб.

¹⁶⁴ Зүб шударга тогтоолнуудһаатнай боложо, би үдэртөө долоо дахин Таниие магтадагби.

¹⁶⁵ Хуулидатнай дуратайшуул угаа амар амгалан байдаг, тэдэниие бүдэрүүлхэ зүйлшье байдаггүй.

¹⁶⁶ Эзэн, Танай абаралда найдадагби, Танай захиралтануудые дүүргэдэгби.

¹⁶⁷ Сэдьхэлни Танай заабаринуудые сахин дүүргэдэг, би тэдээндэ хизааргүй ехэ дуратайб.

¹⁶⁸ Би Танай захиралтануудые болон гэршэлгэнүүдые сахидагби, юуб гэбэл, минии бүхы хэрэгүүд Танай урда байдаг. ת Таав

¹⁶⁹ Эзэн, хашхархам Танда дуулдаг лэ. Амалһанайнгаа дагуу намда ухаа хайрлыт.

¹⁷⁰ Гуйлтыем Өөрын урда байлгыт. Амалһанайнгаа дагуу намайе абарыт.

¹⁷¹ Намда зарлигуудаа заадаг ушарһаатнай урални магтан байг лэ.

¹⁷² Бүхы захиралтануудтнай зүб шударга ушарһаа хэлэмни үгыетнай дуулаг лэ.

¹⁷³ Танай зарлигуудые шэлэһэн ушарһаам Танай гар намда туһалхаар бэлэн болог лэ.

¹⁷⁴ Эзэн, би Танай абаралые хүсэн тэгүүлдэг, хуулитнай минии баяр мүн.

¹⁷⁵ Таниие магтан байхым тула сэдьхэлымни амиды байлгыт. Тогтоолнуудтнай намда туһалаг лэ.

¹⁷⁶ Төөриһэн хониндол би замһаа хазагайрааб. Зарасаа бэдэржэ олыт. Юуб гэбэл, Танай захиралтануудые би мартадаггүйб.